1 SAMUELE 11

₁Morago ga moo ga bolola Nahase wa Moamone, a dikanyetsa motse wa Jabese kwa Gileate ka ntwa; ke fa banna botlhe ba Jabese ba raya Nahase ba re: “Dira kgolagano le rona, mme re tla go direla.”

₂Mme Nahase wa Moamone a ba fetola a re: “Kgolagano e nke e dirang le lona ke ya go re: Lona lotlhe ke lo gonye matlho a le le jang, ke direle Baiseraele botlhe tshotlego jalo.”

₃Bagolo ba Jabese ba mo araba ba re: “Re fe sebaka sa malatsi a supa gore re rome barongwi kwa nageng yotlhe ya Iseraele. Jaanong e tla re fa go se na ope yo o re thusang, re go ineele.”

₄Barongwi bao ba fitlha kwa Gibea wa ga Saule, ba bolela mafoko ao mo ditsebeng tsa batho. Ke fa batho botlhe ba tlhatlosa mantswe ba lela. ₅E ne e le gona Saule a gorogang, a tswa kwa tshimong a setse dikgomo morago. Saule a botsa a re: “Batho ba lelelang?” Ba mmolelela mafoko a banna ba Jabese. ₆Ya re Saule a utlwa mafoko ao, Mowa wa Modimo wa mo tsena, mme a tuka bogale. ₇A tsaya dikgomo di le pedi, a di tlhaba, a di kgabetlela, a romela dinama kwa nageng yotlhe ya Iseraele ka barongwi a re: “Yo o sa bololeng a sala Saule le Samuele morago, dikgomo tsa gagwe di tla dirwa jalo.” Ke fa poifo ya Morena e wela batho, mme ba bolola jaaka monna a le mongwe. ₈Jaanong a ba bala kwa Beseke: Baiseraele ba le 300 000, banna ba Juta ba le 30 000. ₉A laela barongwi bale ba ba tlileng a re: “Bolelelang banna ba Jabese kwa Gileate jaana lo re: ‘E tla re kamoso fa letsatsi le le bolelo, lo bone thuso.’ ” Ya re barongwi ba fitlha, ba bolelela banna ba Jabese jalo, mme ba itumela. ₁₀Jaanong banna ba Jabese ba raya Baamone ba re: “Kamoso re tla ineela mo go lona gore lo re direle tsotlhe ka fa lo bonang ka teng.”

₁₁Ya re kamoso mo mosong Saule a kgaoganya banna ditlhopha di le tharo; ba tsena mo bothibelelong jwa Baamone ka tiso ya masa, ba bolaya Baamone go ya bolelong jwa motshegare. Masalela a bone a phatlalala, go se ba le babedi ba ba setseng mmogo.

₁₂Ke fa banna ba raya Samuele ba re: “Ke bomang ba ba boditseng ba re: ‘A Saule o tla re busa?’ Ntshang banna bao gore re ba bolae!”

₁₃Mme Saule a re: “A go se ka ga bolawa ope ka letsatsi le, gonne Morena o dirafaditse pholoso mo Iseraeleng kajeno.” ₁₄Samuele ene a raya banna a re: “Tlaang a re yeng kwa Gilegala, re tlhomamise bogosi teng sešwa.” ₁₅Ke fa banna botlhe ba ya kwa Gilegala, ba dira Saule kgosi sešwa fa pele ga Morena teng kwa Gilegala; ba tlhaba ditlhabelo tsa tebogo teng fa pele ga Morena. Saule le banna botlhe ba Iseraele ba itumela thata gona.