Bafelesita ba thopa Letlole la Modimo
1Mme lefoko la ga Samuele la tla kwa Baiseraeleng botlhe. Jaanong ka sebaka seo Bafelesita ba kgobokana go tlhabana le Baiseraele. Ke fa Baiseraele ba bolola go ba kgatlhantsha go tlhabana nabo, ba thibelela kwa Ebenesere, mme Bafelesita ba thibelela kwa Afeke. 2Jaanong ya re Bafelesita ba ema ka thulaganyo go kgatlhantsha Baiseraele, mme tlhabano e tlhaselana, Baiseraele ba fenngwa ke Bafelesita. Bao ba bolaya ba e ka nnang ba le 4 000 mo nageng ya tlhabano. 3Mme ya re banna ba fitlha kwa bothibelelong, bagolo ba Iseraele ba re: “Ke ka ntlha ya eng fa Morena a re bolaisitse Bafelesita kajeno? A re yeng go itseela Letlole la Kgolagano ya Morena kwa Silo gore le tle mo gare ga rona, le tle le re golole mo diatleng tsa baba ba rona.” 4Ke fa morafe o roma kwa Silo, ba tsaya teng Letlole la Kgolagano ya Morena wa masomosomo yo o dutseng godimo ga boKerubime. Teng koo ga bo go le bomorwa Eli ba babedi, Hofeni le Phinehase, ba le fa Letloleng la Kgolagano ya Modimo, ba tla nalo.
5Ya re Letlole la Kgolagano ya Morena le tsena mo bothibelelong, Baiseraele botlhe ba duduetsa ka tuduetso e kgolo, mo lefatshe le bileng la duma. 6Ya re Bafelesita ba utlwa modumo wa tuduetso, ba re: “Tuduetso e kgolo e ke modumo wa eng mo bothibelelong jwa Bahebere?” Ya re ba lemoga gore Letlole la Morena le tsenye mo bothibelelong, 7ba boifa, gonne ba ne ba re: “Modimo wa bone o tlile kwa go bone kwa bothibelelong,” e bile ba re: “A tatlhego ya rona wee! Gonne ga go ise go ke go dirafale tse di ntseng jalo ka motlha ope. 8A tatlhego ya rona wee! Ke mang yo o tla re pholosang mo diatleng tsa medimo e e thata eo? Ke yona medimo e e bolaileng Baegepeto ka dipetso tsa mefutafuta mo sekakeng. 9Lona Bafelesita, itshupeng lo le bagale, lo eme senna, e se re gongwe lwa direla Bahebere jaaka bone ba lo diretse. Emang senna, lo tlhabaneng!”
10Bafelesita ba tlhabana, Baiseraele ba fenngwa, ba tshabela botlhe kwa ditenteng tsa bone. Ya nna polao e kgolo thata. Mo Baiseraeleng ga wa ba le 30 000 ba dinao. 11Le Letlole la Modimo la tsewa; le bomorwa Eli ba babedi, Hofeni le Phinehase ba swa.
Loso lwa ga Eli
12Mme monna wa Mobenyamene a tshaba mo tlhabanong, a siana, a fitlha kwa Silo ka letsatsi leo, a ikgagotse diaparo, a itshetse mmu mo tlhogong. 13A goroga, a fitlhela Eli a dutse mo sedulong fa thoko ga tsela a lebeletse, ka pelo ya gagwe e ne e boifela Letlole la Modimo. Monna yoo a tsena, a begela motse tse o di bonyeng. Ke fa motse otlhe o lela. 14Ya re Eli a utlwa modumo wa selelo a botsa batho a re: “Modumo wa tlhodio e ke wa eng?” Monna yole a akofa, a fitlha, a begela Eli. 15Eli o ne a le dinyaga di le 98; matlho a gagwe a ne a eme, a sa tlhole a bona. 16Monna yole a raya Eli a re: “Ke gorogile ke tswa kwa tlhabanong. Ke tshabile kwa tlhabanong kajeno.” Mme Eli a botsa a re: “Go ntse jang, morwaaka?”
17Mmegi a araba a re: “Baiseraele ba tshabile fa pele ga Bafelesita. Le gona morafe o bolailwe segolo, e bile bomorwao ba babedi, Hofeni le Phinehase, ba sule. Le Letlole la Modimo le tserwe.”
18Mme ya re a umaka Letlole la Modimo, Eli a wa mo sedulong, a wa ka sa morago fa thoko ga kgoro, a robega molala, a swa. Gonne o ne a tsofetse, e le monna yo o bokete. O ne a siamisitse Baiseraele dinyaga di le 40.
Loso lwa mosadi wa ga Phinehase
19Mme ngwetsi wa gagwe, mosadi wa ga Phinehase, o ne a ithwele, a le gaufi le go belega. Ya re ene a utlwa mafoko a a reng, Letlole la Modimo le tserwe le a a reng, go sule rratswalaagwe le monna wa gagwe, a kudupana, a belega, gonne leralalo la gagwe la mo tshwara. 20Jaanong ya re a swa, basadi ba ba emeng fa go ene ba re: “Se boife, gonne o belege ngwana wa mosimane.” Mme a se ka a araba le e seng go ela tlhoko. 21Mme a bitsa mosimanyana Ikabote, a re: “Kgalalelo e ile ya tlogela Iseraele;” a re jalo ka ntlha ya Letlole la Modimo le le thopilweng le ka ntlha ya ga rratswalaagwe le monna wa gagwe. 22A ba a re: “Kgalalelo e ile ya tlogela Iseraele; gonne Letlole la Modimo le tserwe.”
