2 DITIRAFALO 28

₁Ahase o ne a le dinyaga di le 20, fa a nna kgosi, a busa dinyaga di le 16 kwa Jerusalema; fela a se ka a dira tse di siameng mo matlhong a Morena jaaka Dafita rraagwe mogolwagolwane. ₂Mme a sepela mo ditseleng tsa dikgosi tsa Iseraele. Le gona a direla boBaale ditshwantsho tse di bopilweng. ₃A fisa maswalo ka esi mo mogorogorong wa Morwa-Hinome, a ba a fisa bomorwawe ka molelo jaaka e ne e le maila a a boitshegang a baheitane, ba Morena o neng a ba lelekile fa pele ga Baiseraele. ₄A ba a dira ditlhabelo le go tshuba maswalo kwa dithoteng tsa tlhabelo le mo dithabeng le fa tlase ga setlhare sengwe le sengwe se setala.

₅Ke fa Morena, Modimo wa gagwe, a mo neela mo diatleng tsa kgosi ya Basiria, ba mo fenya ba thopa ba bantsi ba ga gabo, ba ba isa botshwarong kwa Damaseko. Le gona a neelwa mo diatleng tsa kgosi ya Iseraele, ya mo fenya ya nna polao e kgolo, ₆ka Pheka morwa Remalea a ne a bolaya ba le 120 000 ba Juta ka letsatsi le le lengwe, botlhe bao e le bagale; gonne ba ne ba tlogetse Morena, Modimo wa borraabo. ₇Sigeri mogale wa Moeferaime a bolaya Maaseya, morwa kgosi, le Aserikame, mookamedi wa ntlo ya yona, le Elekana, seatla sa kgosi. ₈Baiseraele ba isa ba le 200 000 ba ga bone mo botshwarong, e le basadi le bomorwa le bomorwadi; le gona ba thopa thopo e kgolo mo go bone, ba e isa kwa Samaria.

₉Mme teng go ne go le moporofeti wa Morena, leina la gagwe e le Otete; ene a tswa a kgatlhantsha ba mephato ba ba boelang kwa Samaria, a ba raya a re: “Kana e re ka Morena, Modimo wa borraeno, a galefetse Bajuta, o ba neetse mo diatleng tsa lona, mme lona lo ba bolaile ka letlhoo le le setlhogo, mo go bileng go fitlhile kwa legodimong. ₁₀Jaanong lo bile lo re lo gatelela ba Juta le Jerusalema go nna batlhanka le malata a lona. A fa lo iteba, lo iphitlhela lo se na melato fa pele ga Morena, Modimo wa lona? ₁₁Jaanong he, nkutlweng lo buse batshwarwi ba lo ba thopileng kwa go ba ga bone; go seng jalo Morena o tla lo tukela bogale.”

₁₂Ga ema banna ba ditlhogo tsa Baeferaime e bong Asaria morwa Johanane le Beregia morwa Mesilemothe le Jehesekia morwa Sadume le Amasa morwa Hatelai ba emelana le ba ba tswang kwa ntweng, ₁₃ba ba raya ba re: “Se tliseng batshwarwi mono! Gonne lo ka tloga lwa re imetsa molato fa pele ga Morena ka go oketsa maleo a rona le melato ya rona. Kana molato wa rona o mogolo, mme Baiseraele ba ka tukelwa bogale.” ₁₄Ke fa ba ba tlhometseng ba tlogela batshwarwi le thopo fa pele ga dikgosana le phuthego yotlhe. ₁₅Mme banna bao ba ba badilweng ka maina ba ema, ba babalela batshwarwi, ba apesa botlhe ba ba sa ikategang ba bone ka dilo tsa thopo, ba ba naya diaparo le ditlhako le dijo le dino le ditlolo, ba palamisa botlhe ba ba bokoa mo dieseleng, ba ba isa kwa Jerigo motseng wa mekolane kwa go ba ga bone, ba be ba boela kwa Samaria.

₁₆Ka sebaka seo kgosi Ahase a roma batho kwa dikgosing tsa Asiria gore di tle go mo thusa. ₁₇Gape le gona ga tla Baetomo, ba fenya Bajuta, ba isa batho mo botshwarong. ₁₈Bafelesita le bone ba bolola go thukhutha mo metseng ya naga e e kwa tlase le ya naga ya borwa ya Juta; ba thopa Betšhemeše le Ayalone le Geterothe le Sogo le metsana ya teng le Thimena le metsana ya teng le Gimeso le metsana ya teng, ba nna gona. ₁₉Gonne Morena o ne a kokobetsa Bajuta ka ntlha ya ga Ahase kgosi ya Juta, ka a atisa boikepo mo Juta, a leofela Morena ka boikanyologo. ₂₀Ga ba ga tla Thigelathe-Philesere kgosi ya Asiria, a mo tlhasela, a mo pitlaganya, mme a se ka a mo thusa. ₂₁Gonne le fa Ahase a ne a thukhuthile Ntlo ya Morena le matlo a kgosi le dikgosana dilo, a di naya kgosi ya Asiria, ga se ka ga mo thusa sepe.

₂₂Le ka sebaka sa go pitlaganngwa jalo a tswelela pele go leofela Morena ka boikanyologo, ene kgosi Ahase. ₂₃A tlhabela medimo ya Damaseko e e mo fentseng, a ithaya a re: “E re ka medimo ya dikgosi tsa Siria e di thusa, ke tla e direla ditlhabelo gore e nthuse,” mme e ne e le yona e e mo digang le Baiseraele botlhe. ₂₄Ahase a ba a phutha dilo tsa Ntlo ya Modimo a di thubaganya, a tswala ditswalo tsa Ntlo ya Morena, a itirela dialetare mo sekhutlong sengwe le sengwe sa Jerusalema. ₂₅Le gona a dira dithota tsa tlhabelo mo motseng mongwe le mongwe wa Juta go tshubela medimo e sele maswalo, a gakaletsa Morena, Modimo wa borraagwe, pele.

₂₆Ditirafalo tse dingwe tsa gagwe le ditiro tsotlhe tsa gagwe tsa pele le tsa morago kana di kwadilwe mo lokwalong lwa dikgosi tsa Juta le Iseraele. ₂₇Mme Ahase a robala le borraagwe, a fitlhwa mo motseng wa Jerusalema; gonne ba se ka ba mo isa kwa mabitleng a dikgosi tsa Juta. Mme Hesekia morwawe a nna kgosi mo boemong jwa gagwe.