2 MAKABISE 13

₁Mo ngwageng wa 149 Judase le banna ba gagwe ba ne ba utlwa gore Antiokuse Eupatore o tla ka mophato wa ntwa go tla go tlhasela Juta, ₂mme e bile a na le Lisiase, motlamedi wa gagwe le letsogo la gagwe. Go feta moo o ne a na le mophato wa Magerika, o na le batlhabani-batsamai ba le 110 000, batlhabani-bapalami ba le 5 300, ditlou di le 22, le dikara di le 300 di tsentswe disegi.

₃Menelause a tsena mo lesomong la bone, mme ka boitimokanyi jo bogolo a nnela go nna a kgothatsa Antiokuse ka gore o ne a solofela go nna a ntse a tlhomilwe mo tirong ya gagwe, e seng ka gore o ne a batlela lefatshe la gagwe letlhogonolo. ₄Fela Kgosi ya dikgosi o ne a tsosa bogale mo go Antiokuse gore a galefele molotsana yo, yo o neng a le molato. Mme e rile Lisiase a tlhalosetsa kgosi gore Manelause ke ene a dirang matshwenyego a otlhe, Antiokuse a laela gore a isiwe kwa Berea mme gone koo a bolaiwe ka mekgwa e go neng go bolaiwa batho ka yone teng. ₅Mo felong fa go na le kago e e goletseng kwa godimo ya phemelo, bogodimo jwa yone ke dikubiki di le 50, e tladitswe molora. Mme e na le mohama o o kgolokwe o o mokgokolosa thata, o ya tlase ka fa ntlheng tsotlhe, o ya o lebile melora. ₆Fa mongwe a bonywe molato wa go utswa dilo tse di boitshepo, kgotsa a na le melato mengwe e e bosula thata, ba mo tseela kwa godimo mme ba mo kgoromeletse kwa tlase gore a swe. ₇Moitimokanyi yo go tweng Menelause yo, o ne a atlholelwa go swa jaana, le phitlho tota a se ka a bo a tlotliwa ka yone. ₈Mme selo se e ne e le tshiamo e e mo tshwanetseng sentle. Ka gonne o ne a leofetse aletara gantsi e molelo wa yone le molora wa yone tota o neng o le boitshepo; e ne ya nna mo meloreng mo a neng a swela gone.

₉Jaanong kgosi e ne e ntse e tla, e tletse maikutlo a a bosetlhogo go tla go bontsha Bajuta dilo tse di maswe go feta tse di neng di kile tsa diragala ka nako ya ga rraagwe. ₁₀E rile Judase a utlwa selo se a laela batho gore ba rapele Morena bosigo le motshegare, gore fa e le gore o batla go thusa a tle go thusa ₁₁botlhe ba ba neng ba tloga ba tseelwa Molao, lefatshe la bone le Tempele e e boitshepo, le gore a se ka a bo a dumelela gore batho ba e neng e le gone ba re ba iketla, ba wele mo diatleng tsa baheitane ba ba tlhapatsang ba. ₁₂E rile botlhe, ba le seoposengwe, ba sena go utlwa ditaelo tsa ga Judase, mme ba sena go kopa Morena yo o boutlwelo-botlhoko ba tlhola ba lela, ba itima dijo, ba rapaletse malatsi a le mararo, a ba kgothatsa mme a ba bolelela gore ba nne gaufi nae.

₁₃Ya re a sena go tseela bagolwane fa thoko mme a rerisantse nabo, o ne a ikaelela gore a se ka a emela lekoko la kgosi gore le tlhasele Juta mme le gape motse mme a tswele kwa ntle go ya go tlhabana go fenya ka thuso ya Modimo. ₁₄A tlogela se se tlaa diragalang mo Mmoping wa lefatshe, mme a kgothatsa batlhabani ba gagwe gore ka bopelokgale ba lwele melao, Tempele, motse, lefatshe la bone le mekgwa ya bone go fitlhelela ba bo ba swa. Ke fa a emisa lekoko la gagwe gaufi le Modeine. ₁₅A naya banna ba gagwe lefoko le la segopotso: “Phenyo e tswa Modimong”. A bo a tsaya mophato wa makawana a a pelokgale thata, a a tlhophilweng, mme ka bone a ya go tlhasela tante e kgolo ya kgosi bosigo. Mo bothibelelong a bolaya batho ba ka nna 2 000. Mme banna ba gagwe ba tlhaba tlou e tonatona go feta ditlou tse dingwe mmogo le mokgweetsi wa yone. ₁₆Kgabagare ba tsenya letshogo le lentsi thata le modubadube mo bothibelong. Ba bo ba boela kwa morago, ba fentse. ₁₇Go ne go feleditswe jaana fa mahube a tlhaga, Morena a sireleditse Judase.

₁₈Jaanong kgosi e rile e sena go bona bopelokgale jwa Bajuta, ya leka go tlhasela mafelo a bone a phemelo ka mokgwa wa botlhale jwa ntwa. ₁₉A ya go tlhasela Bethesure, felo fa go thata ga phemelo ga Bajuta. Fela o ne a kgoromelediwa kwa morago, a tlhaselwa gape, a bo a fenngwa. ₂₀Judase a romelela lekoko la batlhabani-balebeledi sengwe le sengwe se ba neng ba se tlhoka. ₂₁Fela Rohodokuse yo e neng e le wa lekoko la Bajuta, o ne a bolelela baba ka sephiri. Motho yo o ne a lemogwa, a tshwarwa, mme a tsenngwa mo kgolegelong. ₂₂Kgosi e ne ya buisana la bobedi le lekoko la batlhabani-balebeledi ba Bethesure. A dira ditsholofetso tsa botsala a bo a di amogela, a ya go ikhutsa, a bo a ya go tlhasela Judase le banna ba gagwe, fela a fenngwa. ₂₃Ke fa a bolelelwa gore Filipo, yo mmuso o neng o tlogetswe mo diatleng tsa gagwe kwa Antioko, o ne a tsositse mokubukubu. A sala a gamaregile fela fa a utlwa selo se. A simolola go buisana le Bajuta. A ineela, mme a ikana gore o tlaa dira ka mo ba batlang ka teng. A dumalana nabo, a ntsha tshupelo, a tlotla Tempele mme a naya Felo mo go boitshepo dimpho tse dintsi. ₂₄O ne a amogela Makabeuse ka bopelonomi. A bo a tlogela Hegemonidese e le motsamaisi wa batlhabani, a mo dira molaodi wa lefatshe go tswa Petolemise go ya kwa kgaolong ya Magerrenia. ₂₅Mme a ya Petolemaise. Baagi ba Petolemaise ba ne ba se ka ba dumalana le tumalano ya gagwe. Ba bolela go sa rateng ga bone, ba bo ba batla gore mafoko a yone a dirololwe. ₂₆Lisiase a tlhatloga bopalamo jwa go bua mo pontsheng, mme ka bojotlhe jwa gagwe a femela mafoko a. Phemelo ya gagwe ya dira gore ba dumele ba bo ba ritibale. Ka mokgwa o a dira gore ba rate. Ke fa a ikgogela kwa Antioko.

Go lekanye go bolela ikaga go tlhasela le go boa ka morago ga kgosi.