2 SAMUELE 15

₁E rile morago ga moo Abesalomo a ipatlela koloi le dipitse le banna ba le 50 ba ba mo dikanyetsang. ₂Le gona Abesalomo o ne a tle a phakele a eme fa thoko ga tsela e e yang kwa kgotleng, mme mongwe le mongwe yo o nang le kgang, fa a ya kwa kgosing go atlholelwa, Abesalomo a mmitse, a mmotse a re: “O tswa kwa motseng ofe?” Mme e re fa a araba a re: “Motlhanka wa gago o tswa mo go longwe lwa ditso tsa Iseraele,” ₃Abesalomo a mo ree a re: “Bona, mafoko a gago a siame, a utlwala sentle, mme ga go na ope kwa kgosing yo o tla go reetsang.” ₄Abesalomo a bue gape a re: “E kete nka bo ke beilwe moatlhodi mo lefatsheng gore mongwe le mongwe yo o nang le kgang le molato a tle kwa go nna, ke tle ke mo atlholele.” ₅Mme e ne ya re fa mongwe a atamela go mo ikobela, Abesalomo a ntshe letsogo, a mo tshware, a mo atle. ₆Baiseraele botlhe ba ba tlang kwa kgosing go sekwa, Abesalomo a ba direle ka mokgwa oo. A utswa dipelo tsa banna ba Iseraele jalo.

₇Jaanong ya re dinyaga tse nne di sena go feta, Abesalomo a raya kgosi a re: “Nte ke ye kwa Heberone, ke ye go dirafatsa maikano a me a ke a ikanetseng Morena. ₈Gonne motlhanka wa gago o ikanne maikano a le kwa Kesure kwa Siria a re: ‘Fa Morena a ka mpusetsa tota kwa Jerusalema, ke tla direla Morena kwa Heberone.’ ”

₉Kgosi ya mo raya ya re: “Tsamaya ka kagiso!” Mme a nanoga a ya kwa Heberone. ₁₀Mme Abesalomo o ne a romile barongwi ka sephiri kwa ditsong tsotlhe tsa Iseraele go ya go re: “E re lo utlwa tumo ya lonaka, lo re: ‘Abesalomo ke kgosi kwa Heberone!’ ” ₁₁Mme banna ba le 200 ba ya le Abesalomo, ba tswa mo Jerusalema ba laleditswe; ba ya fela ba sa itse sepe. ₁₂Le gona ya re Abesalomo a ntse a dira ditlhabelo, a roma motho go ya go bitsa Ahithofele wa Gilo, mogakolodi wa ga Dafita kwa Gilo motseng wa ga gabo. Mme moferefere wa gola, batho ba ba gogang le Abesalomo ba nna ba ntsifalela pele.

₁₃Mme ya re go tla yo o begelang Dafita gore dipelo tsa Baiseraele botlhe di tshaba le Abesalomo, ₁₄Dafita a raya batlhanka botlhe ba gagwe ba ba nang nae mo Jerusalema a re: “Nanogang re tshabeng; kwa ntle ga moo ga re ka ke ra falola mo go Abesalomo. Itlhaganeleng re tsamae, e se re gongwe a akofa a re fitlhela, a re digela tatlhegong, a bolaya motse o ka bogale jwa tšhaka.”

₁₅Jaanong batlhanka ba kgosi ba raya kgosi ba re: “A go dirwe gotlhe ka fa kgosi morena wa rona a ratang ka teng. Bona, re batlhanka ba gago.” ₁₆Kgosi ya tswa jalo, ya salwa morago ke ba lapa la yona botlhe. Fela kgosi ya tlogela bagadingwana ba le some go disa ntlo. ₁₇Ya re kgosi e se na go tswa le batho botlhe ba ba e salang morago, ba ema fa ntlong ya bofelo, ₁₈ga nna ga feta batlhanka botlhe ba yona; ga feta le Bakerethi le Baphelethe botlhe fa pele ga kgosi le Bagathe botlhe, e bong banna ba ba 600 ba ba neng ba tla le ene jale fa a tswa kwa Gathe. ₁₉Mme kgosi ya raya Ithai wa Mogathe ya re: “Wena o elang le rona? Boa o ye go nna le kgosi; gonne wena o mofaladi, le gona o lelekilwe kwa ga eno. ₂₀O magorogo-mašwa, a kajeno nka go kgarakgatsha go ya le rona? Kana ke tsamaya fela, ga ke itse kwa ke yang teng. Boa, o boe le bomorwa-rraago. A Morena a go direle bopelotlhomogi le boammaaruri!”

₂₁Mme Ithai a fetola kgosi a re: “Ka bophelo jwa Morena le ka bophelo jwa kgosi mong wa me! Ruri, mo felong kwa kgosi mong wa me o tla nnang gona, motlhanka wa gago le ene o tla nna gona, le fa go iwa losong gongwe bophelong.”

₂₂Ke fa Dafita a raya Ithai a re: “Yaa o fete!” Ithai wa Mogathe a feta le banna botlhe ba gagwe le bana botlhe ba ba nang nae. ₂₃Mme lefatshe lotlhe la lela ka lentswe le legolo, fa batho botlhe ba ntse ba feta. Kgosi ya ba ya tshela nokana ya Kiterone, le batho botlhe ba tshela ka tsela e e yang kwa sekakeng.

₂₄Ga fitlhelwa Satoke le ene le Balefi botlhe ba na nayo ba rwele Letlole la Kgolagano ya Modimo, ba baya Letlole la Modimo fa fatshe, mme Abjathare a dira setlhabelo, go ya batho botlhe ba ba tswang mo motseng ba fetse go feta. ₂₅Mme kgosi ya raya Satoke ya re: “Busetsa Letlole la Modimo kwa motseng. Fa ke bona bopelotlhomogi mo matlhong a Morena, o tla mpusa, a le mponisa gape le moago wa gagwe. ₂₆Fela fa a ka re: ‘Ga o nkgatlhe!’ foo ke fano, a a dire ka nna ka fa a ratang ka teng.” ₂₇Kgosi ya ba ya raya Satoke moperesiti ya re: “Wena Mmoni, boela kwa motseng ka kagiso, le Ahimaase morwao le Jonathane morwa Abjathare, bomorwaa-lona ba babedi a ba ye le lona. ₂₈Itseng gore, nna ke tla leta kwa madibogong a Lebala la Joretane go ya lo be lo nthomele lefoko la go nkitsise.” ₂₉Satoke le Abjathare ba busetsa Letlole la Modimo jalo kwa Jerusalema, ba nna teng.

₃₀Mme Dafita a tlhatlogela mo mokonnye wa ditlhare tsa olefa, a tlhatloga a ntse a lela a ikhurumeditse, a tsamaya a sa rwala sepe mo dinaong; le batho botlhe ba ba nang nae ba ikhurumeditse, ba tlhatloga ba ntse ba lela. ₃₁Ya re Dafita a begelwa go twe, Ahithofele le ene o mo moferefereng, o goga le Abesalomo, Dafita a re: “Morena, a ko o senye maano a ga Ahithofele!”

₃₂Mme ya re Dafita a fitlha kwa setlhoeng sa thaba kwa go neng go tle go obamelwe Modimo gona, a fitlhela Husai wa Moaregi, a kgatlhana nae a ikgagotse kobo, a itshetse mmu tlhogong. ₃₃Ene Dafita a mo raya a re: “Fa o tswelela pele le nna, o tla nkimela. ₃₄Mme fa o ka boela kwa motseng, wa raya Abesalomo wa re: ‘Kgosi, ke rata go nna motlhanka wa gago; mo metlheng ya pele ke ne ke le motlhanka wa ga rraago, mme jaanong ke motlhanka wa gago!’ Foo o ka ntogololela maano a ga Ahithofele. ₃₅Le gona baperesiti Satoke le Abjathare kana ba na nao teng! Tsotlhe tse o tla di utlwang mo lapeng la kgosi o tla di sebele Satoke le Abjathare baperesiti. ₃₆Kana teng bomorwaabo ba babedi ba na nabo, Ahimaase wa ga Satoke le Jonathane wa ga Abjathare. Mafoko otlhe a lo tla a utlwang lo a nthomele ka bone.”

₃₇Husai, tsala ya ga Dafita ya tsena jalo mo motseng, fa Abesalomo le ene a tsena mo Jerusalema.