BARUKU 1

₁A ke mafoko a lokwalo lo lo neng lwa kwalwa kwa Babilone ke Baruku morwa Neraia, morwa Mahaseya, morwa Setekia, morwa Hasadia, morwa Hilekia, ₂mo ngwageng wa botlhano, fa kgwedi e tlhola malatsi a supa, ka nako e Makaledia a neng a tsaya Jerusalema a bo a mo tshuba ka yone. ₃Baruku o ne a balela mafoko a lokwalo lo godimo, a balela Jekonia, kgosi ya Juta, le batho botlhe ba ba neng ba tsile go utlwa palo e, ₄a a balela batlotlegi le barwa kgosi, le bagolwane; le batho botlhe fela, ke gore ba bannye le ba bagolo, botlhe ba ba neng ba nna kwa Babilone go bapa le noka ya Sude.

₅E rile ba a utlwa ba lela, ba itima dijo mme ba rapela fa pele ga Morena; ₆mme ba kgobokanya madi a mantsi fela ka mo motho mongwe le mongwe a neng a ka kgona ka teng, ₇ba bo ba romela kwa Jerusalema, ba a romelela moprista Joyakime, morwa Hilekia, morwa Sadume le baprista ba bangwe, le batho botlhe ba ba neng ba nna nae kwa Jerusalema.

₈E ne e le Baruku yo e neng ya re fa Sifane a tlhola malatsi a le lesome a tsaya dijana tsa ntlo ya Morena, tse di neng di ntshitšwe mo Tempeleng, a di busetsa kwa lefatsheng la Juta; dijana tse ke tsa selefera tse Setekia morwa Josia, kgosi ya Juta, a neng a laetse gore di dirwe, ₉fa Nebukatenesare kgosi ya Babilone a sena go koba Jekonia mo Jerusalema a mo isa kwa Babilone, mmogo le magosana, badiri ba tshipi, banna ba maemo le batho fela.

₁₀Ba kwala ba re, “Ka se re lo romelela madi a ka one lo ka duelelang ditlhabelo tse di fisiwang gotlhelele, dineelo tsa sebe, le insense; lo baakanye dineelo, lo bo lo di direla mo godimo ga aletara ya Morena Modimo wa rona. ₁₁Lo rapeleleng botshelo jo boleele jwa ga Nebuketenesare kgosi ya Babilone, le jwa morwawe Belešasare, le gore malatsi a bone mono lefatsheng a nnele ruri jaaka magodimo. ₁₂Lo rapeleng Morena gore a re neye thata le tlhaloganyo e e sedi e le gore re tle re tshele ka fa tlase ga tshireletso ya ga Nebukatenesare kgosi ya Babilone le ya morwawe Belešasare, le gore e tle e re re ntse re ba direla jaana nako e telele re tle re dire gore ba re rate. ₁₃Gape lo re rapeleleng Morena, Modimo wa rona, gonne re o leofetse, mme bogale le kgalefo ya Morena ga e ise e be e tlosiwe mo go rona. ₁₄La bofelo lo tšhwanetse go balela lokwalo lo re lo lo romelelang lo kwa godimo, mme ka mokgwa oo lo dire boipolelo jwa lona jwa mo pontsheng mo tlung ya Morena mo letsatsing la moletlo le mo malatsing a mangwe a kgobokano e kgolo e e laotšweng.”

₁₅Lo tshwanetse go re:

“Tshiamo ke ya Morena Modimo wa rona, mme ponalo ya ditlhong tse di re tlhabang gompieno ke ya rona, batho ba Juta le baagi ba Jerusalema, ₁₆ke ya dikgosi le dikgosana tsa rona, baprofeta ba rona, le borraaronamogolwagolwana ₁₇gonne re leofile Morena a ntse a re lebile, ₁₈ga re a ka ra mo utlwa, ra reetsa lentšwe la Morena Modimo wa rona le re bolelela gore re tshegetse melao e Morena o e re tlhometseng. ₁₉Fa e sale letsatsi le Morena a neng a ntsha borraaronamogolwagolwana mo lefatsheng la Egepeto ka lone go fitlhelela gompieno ga re ise re ke re utlwe Morena Modimo wa rona, re nne le boikanyego, re ntse re gana go reetsa lentšwe la one. ₂₀Ke gone ka moo dikhutsafalo le diphutso tse Morena a saleng a di bolela ka motlhanka wa gagwe Moše ka letsatsi le a neng a ntsha borraaronamogolwagolwana mo lefatsheng la Egepeto ka lone a ya go ba naya lefatshe le le elelang masi le dinotshe, di re wetseng godimo, ke gore dikhutsafalo tse re di utlwang gompieno. ₂₁Ga re a ka ra bo ra reetsa lentšwe la Morena Modimo wa rona mo mantšweng a baprofeta ba o neng wa nna wa re ba romelela. ₂₂Rotlhe re ne ra reetsa se dipelo tsa rona tse di bosula di neng di re se bolelela, mme jalo ra utlwana le go direla medimo e sele, le go dira se se sa itumediseng Morena Modimo wa rona.”