BARUKU 5

₁Jerusalema, apola diaparo tsa khutsafalo le kutlobotlhoko, O apare bontle jwa kgalalelo ya Modimo ka bosafeleng.

₂O iphuthe ka kobo ya tshiamo ya Modimo, mme mo tlhogong O itshitshege serwalo sa serwalo sa kgalalelo ya Mosakhutleng: ₃gonne Modimo o ikaeletse go bontsha ditšhaba tsotlhe tse di ka fa tlase ga legodimo phatsimo ya gago, ₄gonne leina le Modimo o tlaa le go nayang ka bosakhutleng e tlaa nna le: “Kagiso ka ntlha ya tshiamo, le tlotla ka ntlha ya bosemodimo.”

₅Tsoga, Jerusalema, O eme kwa godimodimo, mme O lebe kwa botlhabatsatsi: O bone bana ba gago ba phuthwa kwa bophirimatsatsi le kwa botlhabatsatsi, ba laolwa ke o o Boitshepo, ba itumetse ka ntlha ya gore Modimo o ba gakologetšwe.

₆Le mororo ba ne ba go tlogela ba tsamaya ka maoto, ba kgokgowediwa ke baba, Modimo jaanong o ba go busetsa ba ntse jaaka bana ba segosi, ba tla ba sikerwe ka kgalalelo.

₇Gonne Modimo o laetse gore thaba nngwe le nngwe e kokobediwe le makgabana a a nnelang ruri le one a kokobediwe, dikgophu di katelwe go dira mafelo a a phaphathilweng gore Iseraele a bo a ka tsamaya a bolokesegile mo kgalalelong ya Modimo.

₈Mme dikgwa le ditlhare tsotlhe tse di nkgang monate di tlaa laelwa ke Modimo go direla Iseraele moriti; ₉Gonne Modimo o tlaa goga Iseraele ka boitumelo, mo leseding la kgalalelo ya one, ka boutlwelo-botlhoko jo bo tlaa bong bo tšwa mo go one le tshiamo.

A ke mafoko a lokwalo lo Jeremia a neng a lo kwalela botlhe ba ba neng ba tlaa tloga ba isiwa kwa Babilone ke kgosi ya Mababilone e le magolegwa, go ba bolelela melaetsa e Modimo o neng o e mo neetse: