DANIELE (SEGERIKA) 3

₂₄ Mme ba ne ba tsamaya mo gare ga kgabo ya molelo, ba opelela Modimo difela, ba baka Morena.

₂₅ Asaria a ema mo gare ga molelo, mme a simolola go rapela a re, ₂₆ “O a bakega, Morena Modimo wa borraetsho, mme O tšhwanelwa ke pako, leina la gago le tlotlwa ka metlha yotlhe. ₂₇ Mo go tsotlhe tse O di dirileng tshiamo ya gago e a bonala: ditsholofetso tsa gago di aga di diragala ka boikanyego, ditsela tsa gago ga di nke di sokama, dikatlholo tsa gago di tlhola di le boammaaruri. ₂₈ O atlhotse sentle mo dikutlo-botlhokong tsotlhe tse O di re belesitseng; Wa bo wa di belesa Jerusalema, motse o o boitshepo wa borraaronamogolwagolwana, gonne ke ka ntlha ya dibe tsa rona O re diretseng jaaka O re diretse jaana, ke gore ka tshiamo le ka mo re tšhwanelang ka teng. ₂₉ Ee, e le ruri, re leofile mme ra dira molato ka go go hularela; ee, e le ruri, re leofile thata; ga re a ka ra reetsa ditaelo tsa Molao wa gago, ₃₀ Ga re a ka ra dira se re neng re boleletšwe go se dira gore tsotlhe di re siamele. ₃₁ Ee, fa O ne O ntse O re belesa dikutlo-botlhoko tsotlhe, O re dira tsotlhe tse O di re dirileng, go ne go siame ka botlalo gore O re dire jalo. ₃₂ O re neetse thata ya baba ba rona, ya batho ba ba se nang molao, ba ba se nang Modimo go feta ba bangwe botlhe, ya kgosi e e sa siamang, e e sa siamang go feta tse dingwe tsotlhe mo lefatsheng lotlhe. ₃₃ Gompieno le go bula melomo tota ga re kake ra e bula, ba ba go direlang le ba ba go obamelang ba tlhabiwa ke ditlhong e bile ba a tlontlologa. ₃₄ Oh! O se ka wa re tlogelela ruri ka ntlha ya leina la gago; O se ka wa itatola kgolagano ya gago, ₃₅ O se ka wa tlosa botsalano jwa gago mo go rona, ka ntlha ya ga Abrahama, tsala ya gago, ka ntlha ya ga Isaka, motlhanka wa gago, le ka ntlha ya ga Iseraele, moitshepi wa gago, ₃₆ yo O mo solofeditseng lotso lo lontsintsi jaaka dinaledi tsa legodimo le ditlhaka tsa motlhaba wa lotshitshi lwa lewatle. ₃₇ Morena, jaanong re fetiwa ke ditšhaba tsotlhe; jaanong re nyadiwa mo lefatsheng lotlhe gompieno ka ntlha ya dibe tsa rona. ₃₈ Mo nakong e ga re na moeteledipele, moprofeta, kgosana; ga re na setlhabelo se se tshujwang gotlhelele, setlhabelo, neelo, insense; ga re na felo fa re ka go neelang mabutšwa-pele gone mme ra bona botsalano jwa gago. ₃₉ Fela a pelo e e ikwatlhayang le moya o o ikokobeditseng di amogelesege mo go wena jaaka ditlhabelo tsa diphelefu le dipowana tse di tshujwang gotlhelele, jaaka diketekete tsa dikonyana tse di nonneng. ₄₀ Dira gore setlhabelo sa rona se nne jalo mo go wena gompieno mme a e nne thato ya gago gore re go latele ka pelo yotlhe gonne ba ba go ikanyang ga ba nke ba tlhabiwa ke ditlhong. ₄₁ Jaanong re go latela ka dipelo tsa rona tsotlhe, re a go boifa, mme re batla sefatlhogo sa gago gape. ₄₂ O se ka wa re tlhabisa ditlhong; re tšhware ka bonolo jaaka O le bonolo mme O tletse boutlwelo-botlhoko. ₄₃ Re namole jaaka go tšhwanela dikgakgamatso tsa gago; a leina la gago le bakwe, Morena. ₄₄ A ba ba tšhwereng batlhanka ba gago mašwe ba tseane; a ba khurumediwe ke ditlhong, ba amogwe thata yotlhe ya bone, mme ba koafadiwe. ₄₅ A ba ke ba ithute gore ke wena fela O leng Modimo le Morena yo o bakegang mo lefatsheng lotlhe.”

₄₆ Nako e yotlhe, batlhanka ba kgosi ba ba neng ba latlhetse banna ba mo leisong la leubelo, ba ne ba ntse ba iteelela molelo ka magala, tere, ditodi le dikgong tsa metlhakolane ₄₇ go fitlhelela kgabo ya molelo e gola e nna boleele jwa dikhubiki di le 49 go feta leso la leubelo ₄₈ mme, ya re di lakaselela kwa ntle tsa bolaya Makaledea a a neng a eme go le dikologa.

₄₉ Fela moengele wa Morena a fologela mo iso go bapa le Asaria le balekane ba gagwe; a kgaphela dikgabo tsa molelo kwa ntle, ₅₀ mme bone a ba budulela, ba le mo gare ga leiso, botsiditsana jo e kete jwa phefo le monyo, mo e leng gore mololelo o ne wa se ka wa bo wa ba ama le go ba ama go ba utlwisa botlhoko kgotsa go ba hutsafatsa.

₅₁ Ke fa boobararo ba simolola go opela mmogo, ba baka e bile ba boka Modimo, gone mo isong, ka mafoko a; ₅₂ “A O bakwe, Morena Modimo wa borraetsho, O bokwe mme O tlotlomadiwe ka bosakhutleng. A go bakwe leina la gago le le tlotlegang le le boitshepo, le bokwe mme le tlotlomadiwe ka bosakhutleng.

₅₃ “A O bakwe mo Tempeleng ya kgalalelo ya gago e e boitshepo, O godisiwe mme O galalediwe ka bosakhutleng go feta sengwe le sengwe; ₅₄ O bakwe mo setilong sa bogosi jwa gago, O bokwe mme O godisiwe ka bosakhutleng go feta sengwe le sengwe.

₅₅ “A O bakwe, wena molekanyi wa matengteng, Yo o dutseng mo godimo ga dikheruba. O bakwe mme O galalediwe ka bosakhutleng go feta sengwe le sengwe.

₅₆ “O bakwe mo lewaping, O godisiwe mme O galalediwe ka bosakhutleng go feta sengwe le sengwe.

₅₇ “Bakang Morena, lona dilo tsotlhe tse Morena o lo dirileng; lo mo galaletseng lo mmokeng ka bosakhutleng.

₅₈ “Lona baengele ba Morena, lotlhe bakang Morena; lo mo galaletseng mme lo mmokeng ka bosakhutleng.

₅₉ “Lona magodimo, bakang Morena; lo mo galaletseng mme lo mmokeng ka bosakhutleng.

₆₀ “Lona metsi a a kwa godimo ga magodimo, bakang Morena: lo mo galaletseng mme lo mmokeng ka bosakhutleng.

₆₁ “Lona dithata tsa Morena, lotlhe bakang Morena: lo mo galaletseng mme lo mmokeng ka bosakhutleng.

₆₂ “Lona letsatsi le ngwedi, bakang Morena: lo mo galaletseng mme lo mmokeng ka bosakhutleng.

₆₃ “Lona dinaledi tsa legodimo, bakang Morena: lo mo galaletseng mme lo mmokeng ka bosakhutleng.

₆₄ “Lona mekomakomane le menyo, bakang Morena: lo mo galaletseng mme lo mmokeng ka bosakhutleng.

₆₅ “Lona diphefo, lotlhe bakang Morena: lo mo galaletseng mme lo mmokeng ka bosakhutleng.

₆₆ “Lona melelo le mogote, bakang Morena: lo mo galaletseng mme lo mmokeng ka bosakhutleng.

₆₇ “Lona serame le mogote, bakang Morena: lo mo galaletseng mme lo mmokeng ka bosakhutleng.

₆₈ “Lona menyo le dirangwana, bakang Morena: lo mo galaletseng mme lo mmokeng ka bosakhutleng.

₆₉ “Lona kgogotšhwane le serame, bakang Morena: lo mo galaletseng mme lo mmokeng ka bosakhutleng.

₇₀ “Lona dikapetlana le kapoko, bakang Morena: lo mo galaletseng mme lo mmokeng ka bosakhutleng.

₇₁ “Lona masigo le metshegare, bakang Morena: lo mo galaletseng mme lo mmokeng ka bosakhutleng.

₇₂ “Lona lesedi le lefifi, bakang Morena: lo mo galaletseng mme lo mmokeng ka bosakhutleng.

₇₃ “Lona legadima le maru, bakang Morena: lo mo galaletseng mme lo mmokeng ka bosakhutleng.

₇₄ “A lefatshe le bake Morena: le mo galaletse mme le mmoke ka bosakhutleng.

₇₅ “Lona dithaba le makgabana, bakang Morena: lo mo galaletseng mme lo mmokeng ka bosakhutleng.

₇₆ “Sengwe le sengwe se se golang mo lefatsheng, bakang Morena: lo mo galaletseng mme lo mmokeng ka bosakhutleng.

₇₇ “Lona metšwedi ya metsi, bakang Morena: lo mo galaletseng mme lo mmokeng ka bosakhutleng.

₇₈ “Lona mawatle le dinoka, bakang Morena: lo mo galaletseng mme lo mmokeng ka bosakhutleng.

₇₉ “Lona diphologolo tsa lewatle le sengwe le sengwe se se tshelang mo metsing, bakang Morena: lo mo galaletseng mme lo mmokeng ka bosakhutleng.

₈₀ “Lona dinonyane tsa legodimo, lotlhe bakang Morena: lo mo galaletseng mme lo mmokeng ka bosakhutleng.

₈₁ “Lona diphologolo tsa naga le tse di ruilweng, bakang Morena: lo mo galaletseng mme lo mmokeng ka bosakhutleng.

₈₂ “Lona bana ba batho, bakang Morena: lo mo galaletseng mme lo mmokeng ka bosakhutleng.

₈₃ “Wena Iseraele, baka Morena: O mo galaletse mme O mmoke ka bosakhutleng.

₈₄ “Lona baprista, bakang Morena: lo mo galaletseng mme lo mmokeng ka bosakhutleng.

₈₅ “Lona batlhanka ba Morena, bakang Morena: lo mo galaletseng mme lo mmokeng ka bosakhutleng.

₈₆ “Lona mewa le dipelo tsa basiami, bakang Morena: lo mo galaletseng mme lo mmokeng ka bosakhutleng.

₈₇ “Lona batho ba ba borapedi le ba ba boikokobetso, bakang Morena: lo mo galaletseng mme lo mmokeng ka bosakhutleng.

₈₈ “Lona Anania, Asaria, Mishaele, bakang Morena: lo mo galaletseng mme lo mmokeng ka bosakhutleng. Gonne o re phamotse mo bobipong, a re falodisa seatla sa loso, a re ntsha mo leisong le le fisang le molelo, a re namola mo gare ga kgabo ya molelo.

₈₉ “Lo lebogeng Morena, gonne o molemo, gonne lorato lwa gagwe ga lo fele.

₉₀ “Lona lotlhe ba lo obamelang Modimo wa medimo, lo o bakeng, lo o bokeng mme lo o lebogeng, gonne lorato lwa one ga lo fele.”