DOITERONOMIO 30

₁“E tla re fa dilo tsotlhe tseo di go dirafalela, e bong tshegofatso le khutso tse ke di beileng fa pele ga gago, mme o di elelelwa kwa ditšhabeng tsotlhe kwa Morena, Modimo wa gago, o go leleketseng gona, ₂o boela kwa Moreneng, Modimo wa gago, o reetsa lentswe la gagwe fela jaaka ke go laela kajeno, wena le bana ba gago, ka pelo yotlhe le ka mowa otlhe, ₃gona Morena, Modimo wa gago, o tla fetola tatlhego ya gago, a go tlhomogela pelo, a go phutha gape kwa merafeng yotlhe kwa Morena, Modimo wa gago, a ne a go falaleditse gona. ₄Le fa bafaladi ba gago ba le kwa mafelelong a legodimo, Morena, Modimo wa gago, o tla go phutha gona, a go tsaya gona. ₅Morena, Modimo wa gago, o tla go busetsa kwa lefatsheng le borraeno ba neng ba le ruile gore le go boele; o tla ba a go direla tse di molemo, a go atisa bogolo go borraeno. ₆Foo Morena, Modimo wa gago, o tla go rupisa pelo le bana ba gago gore o tle o rate Morena, Modimo wa gago, ka pelo yotlhe le ka mowa otlhe gore o tle o tshele. ₇Mme dikhutso tsotlhe tseo Morena, Modimo wa gago, o tla di dirafaletsa baba ba gago le ba ba go tlhoileng ba ba neng ba go bogisa. ₈Mme wena o tla tlhabologa, o reetsa lentswe la Morena, o dira ka fa ditaolong tsotlhe tsa gagwe tse ke di go laelang gompieno. ₉Morena, Modimo wa gago, o tla go naya letlotlo la tse di molemo mo tirong yotlhe ya diatla tsa gago le la maungo a mmele wa gago le la letsalo la diruiwa tsa gago le la maungo a masimo a gago; gonne Morena o tla go itumelela gape molemong jaaka a ne a itumelela borraeno ₁₀fa o reetsa lentswe la Morena, Modimo wa gago, mo o bileng o tlhokomela ditaolo tsa gagwe le melao ya gagwe tse di kwadilweng mo lokwalong lo lwa molao; fa o boela kwa Moreneng, Modimo wa gago, ka pelo yotlhe le ka mowa otlhe.

₁₁“Gonne taolo eo e ke e go laelang kajeno ga e ka ke ya go palela le gona ga e kgakala nao. ₁₂Ga e kwa legodimong mo go ka tweng: ‘Ke mang yo o tla re tlhatlogelelang kwa legodimong a e re tseela, a e re utlwisa gore re e dirise?’ ₁₃Le gona ga e kwa moseja ga lewatle mo go ka tweng: ‘Ke mang yo o tla re tshelelelang kwa moseja ga lewatle, a e re tseela, a e re utlwisa gore re e dirise?’ ₁₄Mme lefoko le gaufi thata nao, le mo molomong wa gago le mo pelong ya gago gore o le dirise.

₁₅“Bona, kajeno ke beile botshelo le tlhogonolo le loso le tatlhego fa pele ga gago. ₁₆Se ke se go laelang kajeno ke go rata Morena, Modimo wa gago, le go sepela mo ditseleng tsa gagwe le go tlhokomela ditaolo tsa gagwe le melao ya gagwe le ditshiamelo tsa gagwe gore o tle o tshele, o ntsifale, mme Morena, Modimo wa gago, a go tshegofatse mo lefatsheng le o tla tsenang mo go lone gore e nne la gago. ₁₇Mme fa dipelo tsa lona di hulara, lo sa utlwe, mme lo raelega, lo obamela medimo e sele, lo e direla, ₁₈gona ke lo itsise kajeno gore lo tla latlhega tota; ga lo kitla lo phela malatsi a mantsi mo lefatsheng le lo tla tshelang Joretane go tsena mo go lone go le rua. ₁₉Ke dira legodimo le lefatshe basupi ba ba supang ka ga lona gore ke beile botshelo le loso le tshegofatso le khutso fa pele ga lona. Itlhopheleng he botshelo gore lo tle lo tshele, lona le bana ba lona, ₂₀ka go rata Morena, Modimo wa lona, le ka go utlwa lentswe la gagwe le ka go mo ineela; gonne ke tsona di ka lo tshedisang, tsa atisa malatsi a lona gore lo nne mo lefatsheng le Morena a le ikanetseng borraeno Aborahame le Isaka le Jakobe go le ba naya.”