EKESODU 30

₁“Le gona o dire aletare ya go tshuba maswalo; o e dire ka dipati tsa mokgwa. ₂Boleele jwa yona e nne letsogo le boatlhamo jwa yona e nne letsogo; e nne le dikhutlo di le nne; bogodimo jwa yona e nne mabogo a le mabedi. Dinaka tsa yona di fetele kwa tlase go nna maoto. ₃O e manege gouta e e sa pekwang, e bong bophaphathi jwa yona le dithoko tsa yona tsotlhe le dinaka tsa yona. O e gaole ka gouta mo tikologong. ₄O e direle melepo e le mebedi ya gouta, e nne fa tlase ga segaolo mo ntlheng tse pedi; o e gokelele mo ditlhakoreng tse pedi tsa yona gore go somelwe dithobane mo go yona go e sikara.

₅“O be o betle dithobane tsa morukuru, o di manege gouta. ₆O e bee ka fa ntle ga lesire le le sirileng Letlole la Tshupo, e lebaganye le sekhurumelo sa thuanyo se se mo godimo ga tshupo ya molao kwa ke tla kopanang nao teng.

₇“A Arone a tshubele maswalo a a nkgang monate mo go yona; a a tshube mo mosong mongwe le mongwe, fa a baakanya dipone. ₈E ne e re fa Arone a tshuba dipone mantsiboa a a tshuba; a go kuisiwe musi jalo ka gale fa pele ga Morena mo ditshikeng tsa lona. ₉Lo se ka lwa tshuba maswalo a sele mo go yona le e seng setlhabelo sa phiso le fa e le tshupelo ya dijo; le tshupelo ya noo lo se ka lwa e tshela mo go yona. ₁₀A Arone a dire tsa thuanyo mo dinakeng tsa yona gangwe ka ngwaga; a a dire tsa thuanyo mo go yona ka madi a setlhabelo sa boleo gangwe ka ngwaga. A go nne jalo mo ditshikeng tsotlhe tsa lona. E boitshepotshepo mo Moreneng.”

₁₁Jaanong Morena a bua le Moše a re: ₁₂“E re fa o bala Baiseraele ba mephato e e kuiwang, a mongwe le mongwe yo o kuiwang a ntshetse Morena segololo sa bophelo jwa gagwe gore kotlo e se ka ya ba wela, fa ba balwa. ₁₃Se mongwe le mongwe wa mephato e e kuiwang a tshwanetseng go se ntsha ke bontlhanngwe jwa šekele ya Felo-ga-Boitshepo e e leng digera di le 20. Bontlhanngwe joo jwa šekele a e nne lekgetho la Morena. ₁₄Mongwe le mongwe wa mephato e e kuiwang yo o dinyaga di le 20 le go feta foo a a ntshe lekgetho la Morena. ₁₅E ne e re fa lo ntshetsa Morena lekgetho le e leng segololo sa maphelo a lona mohumi a se ke a oketsa, modidi a se ke a tlhaetsa bontlhanngwe jwa šekele. ₁₆Madi ao a thuanyo o a tsee mo Baiseraeleng, o a beele tirelo ya Tempelana ya Boipontsho gore Baiseraele ba gopolwe fa pele ga Morena, mme lo tle lo fiwe boitshwarelo.”

₁₇Morena a ba a bua le Moše a re: ₁₈“Le gona o dire mogopo o o tlhapelang wa kgotlho le lekoto la ona la kgotlho. O o bee fa gare ga Tempelana ya Boipontsho le aletare, o tshele metsi mo go ona ₁₉gore Arone le bomorwawe ba tlhape diatla le dinao ka ona. ₂₀E ne e re fa ba tsena mo Tempelaneng ya Boipontsho ba tlhapa ka metsi gore ba se ka ba swa; gongwe fa ba atamela fa aletareng go direla Morena ka go mo tshubela setlhabelo sa molelo ₂₁a ba tlhape diatla le dinao, e se re gongwe ba swa. A selo se e nne molao o o sa khutleng mo go bone; mo go ene le mo baneng ba gagwe le go ya pele.”

₂₂Morena a ba a bua le Moše a re: ₂₃“Tsaya ditswaiso tse di molemolemo, e bong boroku jwa mera jo bo nkgang monatenate jwa dišekele di le 500 le bontlhanngwe jwa selekanyo seo jwa makwati a kinamone a a nkgang monate, e bong dišekele di le 250 le lotlhaka lo lo tswaisang lwa dišekele di le 250 ₂₄le makwati a kasia a dišekele di le 500 tsa šekele ya Felo-ga-Boitshepo le hina ya lookwane lwa setlhare sa olefa. ₂₅O dire lookwane lwa tlotso lo lo boitshepo ka tsona, e nne setlolo sa lookwane se se tlhakantsweng ka ditswaiso tseo, e nne tiro ya go tlhakanya ka botswerere. A e nne lone lookwane lwa tlotso lo lo boitshepo.

₂₆“Jaanong o tlotse Tempelana ya Boipontsho ka lone le Letlole la Tshupo ₂₇le lomati lwa dinkgwe tsa tshupo le didiri tsotlhe tsa lone le setlhomo sa dipone le didiri tsa sona le aletare ya go tshubela maswalo; ₂₈le aletare ya setlhabelo sa phiso le didiri tsotlhe tsa yona le mogopo o o tlhapelang le lekoto la ona. ₂₉O di itshepise jalo gore di nne boitshepotshepo, mongwe le mongwe yo o di amang o tla itshepa.

₃₀“Le gona o tlotse Arone le bomorwawe, o ba itshepise gore ba ntirele e le baperesiti. ₃₁Mme o bolelele Baiseraele o re: ‘Ke lone lookwane lwa me lwa tlotso lo lo tshwanetseng go kaiwa boitshepo ke ditshika tsotlhe tsa lona. ₃₂Lo se ka lwa tshelwa mo mmeleng wa motho o sele; lo se ka lwa dira setlolo se se tlhakantsweng jalo. Se boitshepo. Lo se kae boitshepo! ₃₃Mongwe le mongwe yo o ka tlhakanyang se se ntseng jalo, gongwe a se naya motho o sele, o tshwanetse go bolawa le go tlosiwa jalo mo morafeng wa ga gabo.’ ”

₃₄Morena a ba a raya Moše a re: “Tsaya tse di nkgang monate, e bong boroku jwa setlhare sa Storakese le kgetla ya lewatle le boroku jwa Galabano, e le makga a a monate le matlhare a leswalo a a sa pekwang; a di tsewe ka go lekalekana ga tsona. ₃₅O dire tse di kuisang musi ka tsona di tlhakantswe ka botswerere di lokilwe ka letswai, di le phepa, di le boitshepo. ₃₆Tsaya go gongwe ga tsona, o sile, e nne bupe; o bo bee fa pele ga Letlole la Tshupo mo Tempelaneng ya Boipontsho kwa ke tla kopanang nao teng. A bo kaiwe boitshepotshepo ke lona. ₃₇Jaanong fa lo itirela tse di kuisang musi, lo se ka lwa di tlhakanya jaaka tseo. A tseo e nne tse di boitshepo tsa Morena mo go lona. ₃₈Mongwe le mongwe yo o dirang tse di ntseng jalo go dupa monate wa tsona, a a bolawe, a kumolwe mo morafeng wa ga gabo.”