HESEKIELE 16

₁Lefoko la Morena la ba la tla kwa go nna la re: ₂“Morwa-motho, itsise Jerusalema makgapha a gagwe ₃o re Morena Modimo o bua jaana le Jerusalema a re:

“Tlhago ya gago le botsalo jwa gago ke tsa lefatshe la Bakanana. Rraago ke Moamori, mmaago ke Mohethe. ₄Botsalo jwa gago bo ne bo le jaana: E rile ka letsatsi le ò tsalwang ka lone, kolane ya gago ya se ka ya kgaolwa, wa se ka wa tlhapisiwa ka metsi gore ò nne phepa; wa se ka wa sidilwa ka letswai le e seng go phuthelwa ka masela. ₅Go ne go se leitlho le le go utlwelang botlhoko go ka go direla sengwe sa tseo le go ka go tlhomogela pelo, mme wa latlhelwa kwa nageng ka ntlha ya nyatsego ya bophelo jwa gago ka letsatsi le ò tsetsweng ka lone.

₆“Mme ka feta fa go wena, ka go bona ò bidikama ò tletse madi, ka go raya ò le mo mading a gago ka re: ‘Phela!’ Ka ba ka go raya gape ò le mo mading a gago ka re: ‘Phela!’ ₇Ka go ntsifatsa segolo jaaka ditlhogi tsa naga, mme wa gola, wa nna mogolo, wa nna montle thata. Ò ne ò dule mabele, moriri wa gago o ne o godile, mme ò ne ò sa ikatega, ò sa apara sepe.

₈“Ka ba ka feta fa go wena, ka go bona, ka fitlhela sebaka sa gago e le sebaka sa lorato; ka phutholola kobo ya me, ka go apesa, ka bipa bosaikatega jwa gago, ka go ikanela, ka dira kgolagano nao, mme wa nna wa me.” Go bua Morena Modimo.

₉“Ka go tlhapisa ka metsi, ka go tlhapisa madi a a neng a le mo go wena, ka go tlotsa lookwane. ₁₀Ka go apesa diaparo tsa mebalabala, ka go rwesa ditlhako tsa letlalo la ntšwa ya lewatle, ka go tlama ka masela a mantle, ka go kgabisa ka lesire la sei. ₁₁Ka go kgabisa ka mekgabo, ka go rwesa maseka mabogong le dibaga molaleng. ₁₂Ka go rwesa lenyena la nko le manyena a ditsebe, le serwalo se sentle mo tlhogong. ₁₃Wa kgaba jalo ka gouta le ka selefera. Diaparo tsa gago e ne e le tsa masela a mantle le tsa sei le tsa marabata. Wa ja dikuku le dinotshe le lookwane. Wa ba wa nna montle thata, wa tswelela pele, wa bona bogosi. ₁₄Wa tuma mo ditšhabeng ka bontle jwa gago, ka gonne bo ne bo tletse mokgabo wa me o ke neng ke go kgabisitse ka ona.” Go bua Morena Modimo.

₁₅“Mme ò ne wa ikgantsha ka bontle jwa gago, wa akafala ka ntlha ya tumo ya gago, wa itatlhela mo go mongwe le mongwe yo o fetang go dira boaka nae le go nna wa gagwe. ₁₆Wa tsaya diaparo tse dingwe tsa gago, wa itirela dithota tsa tlhabelo tse di mebalabala, wa akafala mo go tsona ka mokgwa o o iseng o ke o nne teng, o o sa tshwanelang. ₁₇Le gona wa tsaya dilwana tse dintle tsa gago tsa gouta ya me le tsa selefera ya me, tse ke neng ke di go neile, wa itirela ditshwantsho tsa banna, wa dira boaka natso. ₁₈Wa tsaya diaparo tsele tsa marabata tsa gago, wa di di apesa; wa baya lookwane lwa me le maswalo a me fa pele ga tsona. ₁₉Dijo tsa me tse ke neng ke di go neile, dikuku le lookwane le dinotshe tse ke neng ke di go jesitse, wa di baya fa pele ga tsona gore di di nkgele monate. Ruri, go ntse jalo.” Go bua Morena Modimo.

₂₀“Le gona wa tsaya bomorwao le bomorwadio ba ò neng ò ba mpelegetse, wa ba tlhaba gore ba nne dijo tsa tsona. A boaka jwa gago bo ne bo ise bo lekane, ₂₁mo ò bileng wa tlhaba bomorwaake, wa ba naya ditshwantsho tsa medimo ka go ba fisetsa tsona? ₂₂Le gona fa ò ntse ò dira maila a mefutafuta a gago le boaka jwa gago, ga ò gakologelwe malatsi a bonyana jwa gago jaaka ò ne ò sa ikatega, ò sa apara sepe, fa ò ntse o bidikama mo mading a gago.

₂₃“Mme ya re ò sena go dira bosula jotlhe joo – Ijoo! A tatlhego ya gago wee!” go bua Morena Modimo. ₂₄“Wa ikagela mmotwana, wa itirela thotana ya tlhabelo mo patlelong nngwe le nngwe. ₂₅Wa aga thotana ya gago ya tlhabelo mo makgatlhanong otlhe a ditsela, wa fetola bontle jwa gago maila, wa paralaletsa mongwe le mongwe yo o fetang maoto, wa totisa boaka jwa gago. ₂₆Le gona ò dirile boaka le Baegepeto ba ò bapileng nabo, ba ba nama e kgolo, wa godisa boaka jwa gago gore ò nkgakatse.

₂₇“Ke fa ke go otlololela letsogo, ke lwa nao, ke fokotsa kabelo ya gago, ke go neela mo thateng ya bopelotshetlha jwa ba ba go tlhoileng, ya bomorwadia Bafelesita ba ba neng ba tlhajwa ke ditlhong ka ntlha ya mokgwa wa gago wa boaka.

₂₈“Gape wa akafala le Baasiria, ka gonne ò ne ò ise ò kgore; wa dira boaka nabo, le gona wa se ka wa kgora. ₂₉Wa ba wa akafala le lefatshe la barekisi, e bong la Kalatea; le gona ga go a ka ga go kgorisa.”

₃₀Morena Modimo o a bua o a re: “Pelo ya gago e senyegile jang ne! fa o dirile tsotlhe tseo, e bong tiro ya mosadi wa seaka se se fetang diaka tsotlhe; ₃₁fa o ne o ikagela mmotwana wa gago mo makgatlhanong mangwe le mangwe a ditsela, wa dira thotana ya tlhabelo ya gago mo patlelong nngwe le nngwe. Le gona o ne o sa tshwane le seaka sepe, ka o nyaditse tuelo ya boaka. ₃₂A mosadi yo o senyang nyalo, yo o amogelang banna ba bangwe boemong jwa monna wa gagwe! ₃₃Diaka tsotlhe di rekwa ka dimpho, mme wena o reka barati botlhe ba gago ka dineo tsa gago. O a ba reka gore ba tle kwa go wena, ba tswe mo ntlheng tsotlhe go dira boaka nao. ₃₄O ne o sa tshwane le basadi ba bangwe ka boaka jwa gago; o ne o sa salwe morago ke banna gore ba dire boaka nao, le e seng go fiwa tuelo ya boaka, mme wena o ntshitse tuelo ya boaka. Ke yona pharologanyo.”

₃₅Ka moo he, wena seaka, utlwa Lefoko la Morena!

₃₆Morena Modimo o bua jaana a re: “E re ka o sentse tšhelete ya gago, mme ditlhong tsa gago di bipolotswe ka go akafala le barati botlhe ba gago le medimo yotlhe e e maila ya gago ya makgapha, wa ba wa tshololela medimo eo madi a bomorwao: ₃₇Ruri, ke ka moo ke tla kgobokanyang barati botlhe ba gago ba o ba kgatlhileng le botlhe ba o ba ratileng mmogo le botlhe ba o ba tlhoileng. Ke tla ba kgobokanya mo ntlheng tsotlhe gore ba lwe nao, ke ba senolela bosaikatega jwa gago gore ba bone ditlhong tsotlhe tsa gago. ₃₈Ke tla go atlhola jaaka go tshwanetse basadi ba ba sentseng nyalo, ba ba tsholotseng madi. Ke tla goromeletsa bogale le lefufa mo go wena gore madi a gago a tshololwe. ₃₉Ke tla go neela mo diatleng tsa bone. Ba tla phoma mmotwana wa gago, ba phatlakanya dithota tsa tlhabelo tsa gago. Ba tla go apola diaparo, ba go amoga dilo tsa mokgabo, ba go tlogela o sa ikatega, o sa apara sepe.

₄₀“Ba tla go tsosetsa morafe, ba go kgobotletsa ka majwe, ba go remaganya ka ditšhaka tsa bone. ₄₁Ba tla fisa matlo a gago ka molelo, ba dirafatsa kotlo mo go wena fa pele ga matlho a basadi ba bantsi. Ke tla khutlisa boaka jwa gago jalo. Le gona ga o nke o tlhola o ntsha tuelo ya boaka. ₄₂Ke tla itšhwesa pelo ka wena! – Mme morago ga moo lefufa la me le tla go tlogela; ke tla iketla, ke sa tlhole ke galefa. – ₄₃E re ka o se ka wa gakologelwa malatsi a bošwa jwa gago, mme wa ntlhotlheletsa bogaleng ka dilo tsotlhe tseo, ke tla go bolaisa se o se jeleng.” Go bua Morena Modimo. “A ga o a dira boaka joo mmogo le maila otlhe a o a dirileng?

₄₄“Bona, mongwe le mongwe yo o tlhabang diane o tla lebisa seane mo go wena se se reng. ‘Morwadi o tshwana le mmaagwe.’ ₄₅O tshwana le mmaago yo o kobileng monna wa gagwe le bana ba gagwe. O tshwana le bomorwadia-mmaago ba ba lelekileng banna ba bone le bana ba bone. Mmaalona e ne e le Mohethe. Rraalona e ne e le Moamori.

₄₆“Mogoloo ke Samaria yo o agileng mo ntlheng ya la molema la gago, ene le bomorwadie; monnao yo o agileng mo ntlheng ya le le jang la gago ke Sotoma le bomorwadie. ₄₇Ga o a sepela mo ditseleng tsa bone, ga o a dira maila a bone. Di ne di sa go lekane. O sentse bogolo go bone mo ditseleng tsotlhe tsa gago.”

₄₈Morena Modimo o re: “Ka bophelo jwa me! Sotoma monnao, ene le bomorwadie, ruri ga ba a ka ba dira jaaka go dirile wena le bomorwadio. ₄₉Bona, molato wa ga Sotoma monnao e ne e le go ikgodisa; a na le letlotlo la dijo, a iketlile, a sa tshwenyege ka sepe, ene le bomorwadie, mme a se ka a thusa mmogisegi le mohumanegi. ₅₀Jaanong ya re ke bona ba ikgantsha, ba dira maila fa pele ga me, ka ba tlosa.

₅₁“Le Samaria o ne a sa dire bontlhanngwe jwa maleo a gago; mme maila a gago a feta a gagwe thata. O dirile bomorwadia-mmaago basiami ka maila otlhe a gago a o a dirileng. ₅₂Ka moo he, rwala kgobo ya gago wena yo o emetseng bomorwadia-mmaago ka maleo a gago. E re ka o leofile bogolo go bone, ba siame bogolo go wena. Le gona, tlhajwa ke ditlhong, o rwale nyatsego ya gago, gonne o siamisitse bomorwadia-mmaago.

₅₃“Mme ke tla fetola tatlhego ya bone, tatlhego ya Sotoma le bomorwadie le tatlhego ya Samaria le bomorwadie; le gona ke tla fetola tatlhego ya gago mmogo le ya bone, ₅₄gore o tle o rwale nyatsego ya gago, o tlhajwe ke ditlhong ka ntlha ya tsotlhe tse o di dirileng, go ba gomotsa. ₅₅Bomorwadia-mmaago, Sotoma le bomorwadie ba tla boela mo mannong a bone a pele; le Samaria le bomorwadie ba tla boela mo mannong a bone a pele; le wena le bomorwadio lo tla boela mo mannong a lona a pele. ₅₆A ga ke re, ga o a ka wa umaka Sotoma monnao ka molomo wa gago mo malatsing a boikgodiso jwa gago, ₅₇pele go ise go bipololwe bosula jwa gago jaaka bo bipolotswe gompieno, o ise o nne kgobo ya bomorwadia Siria le ya botlhe ba ba mo tikologong ya gago le ya bomorwadia Bafelesita ba ba go nyatsang mo ntlheng tsotlhe. ₅₈Boaka jwa gago le makgapha a gago o na le go rwala petso ya tsona.” Go bua Morena.

₅₉Gonne Morena Modimo o bua jaana o a re: “Ke tla go direla jaaka o dirile, wena yo o nyaditseng maikano ka go roba kgolagano. ₆₀Mme morago ga moo ke tla gopola kgolagano e ke e dirileng nao mo malatsing a bošwa jwa gago. Ke tla dira kgolagano e e sa khutleng nao. ₆₁Foo o tla gopola ditsela tsa gago, o tlhajwa ke ditlhong, fa o amogela bomorwadia-mmaago, bomogoloo le bomonnao; kana ke tla ba go naya go nna bomorwadio, mme e se ka o tshegeditse kgolagano ya gago. ₆₂Mme nna ke tla dira kgolagano ya me nao gore o itse fa ke le Morena, ₆₃gore o akanye, o tlhajwe ke ditlhong, o palelwe ke go bula molomo gape ka ntlha ya ditlhong tsa gago, fa ke go itshwarela tsotlhe tse o di dirileng.” Go bua Morena Modimo.