Modimo o watlhaya Baegepeto
1Lefoko la Morena le tsile gape kwa go nna la re. 2“Morwa-motho, tlhaba mokgosi ò re: ‘Morena Modimo o bua jaana a re:
“ ‘Goang lo re: Ijoo!
Letsatsi leo! Ijoo!
3Gonne letsatsi le gaufi,
ruri, letsatsi la Morena le gaufi,
letsatsi la maru! E tla nna sebaka
sa go atlhola ditšhaba.
4Tšhaka e tla wela Egepeto;
tlalelo e tla nna kwa Ethiopia,
fa ba ba bolailweng
ba namaletse mo Egepeto;
fa go thopiwa khumo ya teng;
fa metheo ya teng e epololwa.
5“ ‘Baethiopia le Baphute le Balute le ba merafe ya mefutafuta le Bakube le ba lefatshe la kgolagano ba tla wa nabo ka tšhaka.’
6“Morena o bua jaana a re: ‘Ba ba tshegeditseng Egepeto ba tla wa; boikgantsho jwa thata ya teng bo tla kokobediwa. Ba tla wa ka tšhaka gona go simolola kwa Migetole go ya go fitlha kwa Siene, go bua Morena Modimo. 7Egepeto e tla nna sekaka mo gare ga mafatshe a a dirilweng dikaka; metse ya teng e tla nna marope mo gare ga metse e e fetogileng marope. 8Foo ba tla itse gore ke nna Morena, mogang ke tshubang molelo mo Egepeto, mme bathusi botlhe ba teng ba thubaganngwa.
9“ ‘Ka letsatsi leo barongwi ba tla bolola ba tabogile ka mekoro ba romilwe ke nna gore ba tshose Baethiopia ba ba iketlileng; tlalelo e tla ba wela ka letsatsi la Egepeto, gonne bonang, le e tla!’
10“Morena Modimo o bua jaana o a re: ‘Ke tla khutlisa modumo wa bontsi jwa Baegepeto ka letsogo la ga Nebukatenesare, kgosi ya Babele. 11Ene le ba morafe wa gagwe ba ba setlhogo go feta ditšhaba ba tla tlisiwa go senya lefatshe, ba somolela Egepeto ditšhaka tsa bone, ba tlatsa lefatshe leo babolawi. 12Ke tla kgadisa dinoka, ke neela lefatshe leo mo diatleng tsa batho ba ba bosula; ke tla fetola lefatshe sekaka le tsotlhe tse di mo go lone ka diatla tsa baeng; ke nna Morena ke buileng jalo.’
13“Morena Modimo o bua jaana o a re: ‘Ke tla nyeletsa medimo e e maila, ke fedisa medimo ya diseto kwa Nofe; ga go kitla go tlhola go nna kgosi teng mo lefatsheng la Egepeto. Ke tla tsenya therego mo lefatsheng la Egepeto. 14Ke tla dira Phatherose sekaka, ke tshuba molelo kwa Soane, ke dirafatsa petso kwa Noo. 15Ke tla goromeletsa bogale jwa me mo Sine yo e leng phemelo ya Egepeto, ke fedisa modumo wa bontsi jwa Noo. 16Ke tla tshuba molelo mo Egepeto; Sine o tla tlalelwa, a tetesela; Noo o tla thopiwa. Nofe o tla bona baba motshegare. 17Batlhabani ba One le ba Phibesethe ba tla wa ka tšhaka; basadi ba tla ya mo botshwarong. 18Mo Thagephanese go tla nna lefifi motshegare, mogang ke robang ditsamma tsa bogosi jwa Egepeto teng, mme go ikgantsha ka thata ya gagwe go khutlisiwa gona. Leru le tla mo khurumetsa. Batho ba metse ya gagwe ba tla ya mo botshwarong. 19Ke tla dirafatsa petso jalo kwa Egepeto gore ba tle ba itse fa ke le Morena.’ ”
Bogosi jwa Egepeto bo senyegile
20E rile ka ngwaga wa 11, ka kgwedi ya ntlha, ka letsatsi la bosupa Lefoko la Morena la tla kwa go nna la re: 21“Morwa-motho, ke robile letsogo la mephato la ga Farao, kgosi ya Egepeto; bona, ga le a fapiwa gore le fole; ga le a alafiwa ka setlhare le e seng go fapiwa ka masela, gore le tie gape go ka tshwara tšhaka. 22Ke ka moo Morena Modimo o buang jaana o re: Bonang, ke tla lwa le Farao, kgosi ya Egepeto, ke roba mabogo a gagwe le le tiileng jaaka le le robegileng, gore seatla sa gagwe se latlhe tšhaka. 23Ke tla falaletsa Baegepeto kwa ditšhabeng, ke ba gasanya mo mafatsheng. 24Mme ke tla tiisa mabogo a kgosi ya Babele, ke tsenya tšhaka ya me mo seatleng sa yona; fa e le mabogo a ga Farao, ke tla a roba gore ene a fegelwe fa pele ga yona jaaka go fegelwa yo o khutlegileng la go swa. 25Ke tla tiisa mabogo a kgosi ya Babele, mme mabogo a ga Farao a tla repa gore ba itse fa ke le Morena, mogang ke tsenyang tšhaka ya me mo seatleng sa kgosi ya Babele gore e e somolele lefatshe la Egepeto. 26Ke tla falaletsa Baegepeto kwa ditšhabeng, ke ba gasanya mo mafatsheng, ba tle ba itse gore ke nna Morena.”
