HESEKIELE 5

₁“Wena morwa-motho, tsaya tšhaka e e bogale, ò e tsee go nna legare la babeodi mo go wena; o ipeole tlhogo le ditedu. Morago ga moo o tsee selekanyetso, o kgaoganye moriri gararo. ₂Karolo ya ntlha ò e fise ka molelo mo motseng, fa malatsi a go ò dikanyetsa ka ntwa a sena go feta; karolo ya bobedi o e reme ka tšhaka mo tikologong ya ona; karolo ya boraro ò e gasetse mo phefong. Ke tla somola tšhaka gore e e latelele. ₃Le gona ò tsee moririnyana wa teng, ò o bofelele mo mojeng wa kobo ya gago. ₄O be o tsee o mongwenyana gape mo go oo, ò o latlhele mo molelong, ò o fise ka molelo. Molelo o tla tswa teng, o ya kwa Baiseraeleng botlhe.”

₅Morena Modimo o bua jaana a re: “Ke ene Jerusalema. Ke mmeile mo gare ga ditšhaba; mafatshe a mo tikologong ya gagwe. ₆Mme o ganeditse ditshiamo tsa me ka boikepo bogolo go ditšhaba, le melao ya me bogolo go mafatshe a a mo tikologong ya gagwe. Gonne ba Jerusalema ba nyaditse ditshiamo tsa me, ba se ka ba sepela ka fa melaong ya me. ₇Ka lebaka leo Morena Modimo o bua jaana a re: E re ka lo le baitaodi bogolo go ditšhaba tse di mo tikologong ya lona, mme lwa se ka lwa sepela ka fa melaong ya me, le e seng go dirafatsa ditshiamo tsa me, le e seng go dira ka fa ditshiamong tsa ditšhaba tse di mo tikologong ya lona.” ₈Ke ka moo Morena Modimo o buang jaana a re: “Bona, ke tla lwa nao, Jerusalema, ka bonna; ke tla dirafatsa katlholo le petso mo go wena fa pele ga matlho a ditšhaba. ₉Ka ntlha ya makgapha otlhe a gago ke tla go direla tse ke iseng nke ke di dire; le gona ga nka ke ka tlhola ke di dira gape. ₁₀Ka moo borra-bana ba tla ja bana ba bone mo go wena; bana ba tla ja borraabo. Ke tla dirafatsa tshekiso le kotlo mo go wena, ke falaletsa masalela otlhe a gago kwa dikhutlong tsotlhe tsa lefatshe.

₁₁“Ka moo, ka bophelo jwa me, go bua Morena Modimo: E re ka ò itshekolotse Felo-ga-Boitshepo ga me ka maila otlhe a gago le ka makgapha otlhe a gago, ruri le nna ke tla go leleka, leitlho la me le sa rekegele; le nna ke sa tlhomoge pelo. ₁₂Karolo ya ntlha ya gago e tla swa ka leroborobo, e nyelela ka tlala mo teng ga gago; karolo ya bobedi e tla wa ka tšhaka mo tikologong ya gago; karolo ya boraro ke tla e falaletsa kwa dikhutlong tsotlhe, ke ba somolela tšhaka gore e ba latelele.

₁₃“Bogale jwa me bo tla dirafadiwa jalo; kgalefo ya me ke tla e kgorisa mo go bone, ke ipusolosetsa. Mme e tla re ke sena go ba dirafaletsa bogale jwa me, ba lemoge gore ke nna Morena yo ke buileng ke le lefufa. ₁₄Ke tla go ntsha marope le nyatsego mo gare ga ditšhaba tse di mo tikologong ya gago fa pele ga matlho a botlhe ba ba fetang.

₁₅“O tla nna kgobo le tshotlego le tlhagiso le theregiso mo ditšhabeng tse di mo tikologong ya gago, motlhang ke dirafatsang katlholo le petso mo go wena ka bogale le ka kgakalo le ka dikgalemelo tse di tshabegang; ke nna Morena yo ke buileng jalo. ₁₆E tla re ke hula metsu e e bosula ya tlala mo go lona e e isang mo tshenyegong, e ke tla e romelang go lo senya, ke be ke lo okeletse tlala, ke lo senyetse seiphediso sa dijo. ₁₇Ruri, ke tla lo romela tlala le dibata tse di bosula; di tla go amoga bana. Leroborobo le tshololo ya madi di tla go ralala. Ke tla go tlisetsa tšhaka. Nna Morena ke buile jalo.”