JESAYA 33

₁A tatlhego ya gago wee, wena mosenyi yo o sa senyediwang! A tatlhego ya gago wee, wena molotsana yo o sa direlwang ka bolotsana. E tla re o sena go senya, o senngwe ka wesi; e re fa o khutlile go dira ka bolotsana, ba go direle ka bolotsana.

₂Morena, re tlhomogele pelo! Re go letile. O nne letsogo la rona mo mesong yotlhe. Ee, o nne thuso ya rona mo sebakeng sa tlalelo. ₃Merafe e tshaba modumo wa loratla; fa o tsoga, ditšhaba di a phatlalala. ₄Mme thopo e tla phuthwa jaaka molome o phutha. Ba sianela teng jaaka tsie e siana.

₅Morena o godisitswe, gonne o agile kwa godimo. O tladitse Sione molao le tshiamo. ₆Go tla nna tlhomamo ya metlha ya gago, e leng khumo ya pholoso e e tletseng le botlhale le kitso. Go boifa Morena ke lehumo la teng.

₇Bonang, diganka di goa kwa ntle. Barongwi ba kagiso ba lela ka bogalaka. ₈Ditsela di senya. Ga go na yo o fetang. O sentse kgolagano, a nyatsa basupi, a sa re sepe ka batho. ₉Lefatshe le hutsafetse, le a swaba. Lebanone o tlhajwa ke ditlhong, o a omelela. Leboa la Sarone ke naga fela. Basane le Karemele di tlhotlhoregile matlhare.

₁₀“Jaanong ke tla ema,” go bua Morena. “Jaanong ke tla itlotla. Jaanong ke tla itshupa ke le mogolo. ₁₁Lo tla ithwala moko, lo belega dirite. Go budula ga lona ke molelo o o tla lo nyeletsang ka losi. ₁₂Merafe e tla nna matlapa a kalaka a a fisiwang; e tla nna ditlhare tsa mitlwa tse di remilweng tse di šwang mo molelong. ₁₃Ba lo kwa kgakala, utlwang se ke se dirileng! Ba lo gaufi, itseng thata ya me!”

₁₄Baleofi ba Sione ba tshogile. Teteselo e tshwere balotsana ba re: “Ke mang mo go rona yo o ka nnang fa molelong o o nyeletsang? Ke mang mo go rona yo o ka nnang fa dikgabong tse di sa khutleng?” ₁₅Yo o dirang ka tshiamo a bua nnete; yo o nyatsang khumo ya kgatelelo a tlhotlhora diatla gore di se ka tsa amogela thelesetso; yo o ithibang ditsebe gore a se ka a utlwa melato ya go tsholola madi; yo o budulatsang matlho gore a se ka a bona bosula, a kgatlhega. ₁₆Ke ene yo o tla agang mo mafelong a a godimo. Dikago tsa phemelo tsa mafika ke botshabelo jwa gagwe. Ke ene yo o fiwang dijo tsa gagwe. Metsi a gagwe ga a kgale.

₁₇Matlho a gago a tla leba kgosi e le mo bontleng jwa yona; a bona lefatshe le le atlhameng. ₁₈Pelo ya gago e tla gakologelwa sebaka sa therego e re: “O kae yo o neng a bala madi? O kae yo o neng a lekanya ka sekale? O kae yo o neng a bala dikago tsa phemelo?” ₁₉Ga o kitla o tlhola o bona morafe o o matepe, morafe wa puo e e boteng e e sa utlwaleng, wa loleme lo lo koakoetsang lo lo sa tlhaloganngweng. ₂₀Leba Sione, motse wa meletlo ya rona! Matlho a gago a tla bona Jerusalema e le boago jo bo femetsweng, e le tente e e sa hudugeng, e dimapo tsa yona di sa tlhomolelweng ka go sa feleng, e dithapo tsotlhe tsa yona di sa kgaogeng. ₂₁Mme gona foo Morena o tla nna le rona e le yo o galalelang mo felong ga dinoka tse dikgolo; mme mekoro ga e ka ke ya tsamaya mo go tsona. Sekepe se segolo ga se nke se feta mo go tsona. ₂₂Gonne Morena ke moatlhodi wa rona; Morena ke molaodi wa rona; Morena ke kgosi ya rona. Ke ene yo o tla re pholosang. ₂₃Dithapo tsa gago di repile; ga di tshware kota ya diseile; ga di gagamatse masela. Foo ba tla abela khumo ya thopo e kgolo. Ditlhotsi di tla itseela se se thukhuthilweng. ₂₄Go tla bo go se na monni ope yo o reng: “Ke a lwala.” Gonne morafe o o agileng teng o itshwaretswe melato.