JUDITHE 7

₁Letsatsi le le latelang Holofernese o ne a laela mophato wa masole otlhe wa gagwe le bathusi botlhe ba ba neng ba itšhwaragantse nae gore ba bothologe ba ye kgatlhanong le Bethulia, go ya go phamola dikgoro tsa thaba, mme ka mokgwa o o ntseng jalo, ba simolole go tlhasela Baiseraele. ₂Digopa tsa batlhabani ke fa di bothologa ka lone letsatsi leo. Palo ya setlhopha se se neng se le teng sa batlhabani e ne e le 120 000 tsa batlhabani-batsamai le batlhabani-bapalami ba le 12 000, re sa bue ka namane e tona ya palo ya banna ba ba neng ba tsamaya ka dinao ba tlhokometse thoto. ₃Ba thibelela mo kgophung e e gaufi le Bethulia, go bapa le motšwedi, mme ba iphatlalatsa ka bophara jwa go tšwa mo Dothane go ya Balebaime, le ka boleele jwa go tšwa mo Bethulia go ya kwa Siamone, yo o lebaganyeng le Esederaelone.

₄E rile Baiseraele ba bona segopa se sentsi se sa bone ba tshoga thata mme ba raana ba re, “Ba tsile go šwaila lefatshe lotlhe fela jaanong. Le fa e le dithaba tse di goletseng kwa godimodimo tota kgotsa dikgophu kgotsa dithabana di ka se ka tsa bo tsa sikara bokete jwa bone.” ₅Monna mongwe le mongwe a phamola ditlhabano tsa gagwe; ba gotsa molelo mo ditlhoeng tsa bone mme ba lala ba lebeletse bosigo jotlhe. ₆Ka letsatsi la bobedi Holofernese a sarabolola setlhopha sa batlhabani-bapa-lami ba gagwe, Baiseraele ba ba neng ba le mo Bethulia ba lebile sentle. ₇A keleka diphatana tse di yang kwa motseng, a etela metšwedi e e ba nayang metsi, a e gapa mme a baya masole gore a e lebelele, a bo a boela kwa mophatong wa gagwe.

₈Ke fa magosana a batho ba ga Esau, baeteledipele ba Mamoabite le balaodi ba lefatshe le le ikamileng lewatle ba tla mo go ene mme ba re, ₉“Fa morena wa rona a ne a ka re reetsa fela, mophato wa gagwe o ne o tla se ka o bo o ntshiwa le fa e le ntho e le nngwefela tota. ₁₀Batho ba, ba Baiseraele ga ba a ikanya digai tsa bone go le kalokalo jaaka fa ba ikantse bogodimo jwa dithaba tse ba nnang mo go tsone tse. Mme le wena O a iponela gore ga go motlhofo go pagamela kwa godimodimo ga tsone kwa. ₁₁Ke gone he, morena wa me, se ye go lwa nabo ka ntwa e e larileng, mme ga go na go bo go šwa ope wa banna ba mophato wa gago. ₁₂Nna fela mo bothibelelong, le banna ba mephato ya gago le bone ba nne fela foo, fa batlhanka ba gago bone ba tla bo ba gapa motšwedi wa metsi o o elelang mo mhapheng wa thaba – ₁₃gonne ke gone mo batho botlhe ba Bethulia ba gang metsi a bone gone. Lenyora le tlaa ba bolaya mme le ba pateletse go lesa motse wa bone. Jaanong, rona le batho ba rona re tlaa pagamela kwa godimodimo ga dithaba tse di gaufi, re thibelela teng go lebelela teng gore go se ka ga bo ga nna le ope yo o tšwang mo motseng. ₁₄Tlala e tlaa ba bolaya, bone le basadi ba bone le bana, mme e tlaa re lerumo le ise le be le fitlhe mo go bone ba bo ba setse ba leleanye mo mebileng ka kwa ntle ga matlo a bone, ₁₅mme O tlaa ba duedisetsa boganka jwa bone ka mokgwa o o botlhoko, le go gana ga bone go tla go go kgatlhantsha ka kagiso.”

₁₆Mafoko a a ne a itumedisa Holofernese le ba lekgotla la gagwe mme a bona go siame gore a dire jaaka ba ne ba buile. ₁₇Ke gone ka moo, lesongwana la Mamoabite le neng la ya pele le na le Maasiria a le 5 000. Ba thibelela mo kgophung mme ba gapa fa go neng go giwa metsi teng ke Baiseraele le metšwedi ya bone. ₁₈Fa tse di ntse di diragala, Maedomite le Maammonite ba ne ba ya go thibelela kwa dithotaneng tse di lebaganyeng le Dothane, ba romela bangwe ba banna ba bone ntlheng ya borwa-botlhaba go bapa le Ekerebele, gaufi le Kouse mabapana le molatšwana wa Mokemure. Ba bangwe ba mophato wa Maasiria ba ne ba thibelela mo leboeng, ba gomile lefatshenyana leo lotlhe; ditante le dithoto tsa bone di dirile bothibelelo jo bogolo, ka mokgwa o ba neng ba le bantsi thata ka teng.

₁₉Baiseraele ba ne ba goa Morena Modimo wa bone, gonne ba ne ba kgobegile marapo, ka baba ba bone ba ne ba ba dikaganyeditse, mme go se na mokgwa o ba ka ba falolang ka one. ₂₀Malatsi a le 34 mophato wa Maasiria wa ba dikaganyetsa ka masole a a tsamayang ka dinao, ka dikara, ka batlhabani-bapalami. Nkgwana nngwe le nngwe ya metsi e baagi ba Bethulia ba neng ba na nayo e se na sepe, ₂₁didiba tsa bone di kgala, go se na letsatsi lepe le motho a neng a ka itimola lenyora mo go lone, ka metsi a bone ba ne ba a lekanyediwa. ₂₂Bananyana ba bone ba ngaralala, basadi le makawana ba koafadiwa ke lenyora, ba idibalela mo mebileng ya motse le mo diferwaneng, go se na thata epe mo go bone.

₂₃Ke fa makawana, basadi, bana, batho botlhe ba phuthaganela Usia le magosana a motse, ba goa fa pele ga bagolwane ba ba phuthegileng ba re, ₂₄“A Modimo o ke o nne moatlhodi mo gare ga lona le rona! Gonne ga lo a re direla sentle, ka go sa kope kagiso mo Maasirieng. ₂₅Jaanong ke fa ga go na ope yo o ka re thusang. Modimo o re ba neetse gore re kgophaladiwe ke lenyora fa pele ga bone, re se na thuso epe fela. ₂₆Itlhaganeleng lo ba bitse ba tsene; tlogelang motse otlhe gore o ripitliwe ke banna ba ga Holofernese le mophato wa gagwe otlhe. ₂₇Ka go tlaa bo go le botoka mo go rona go gapiwa ke bone go na le gore re nne jaaka re ntse jaana; ee! re tlaa bo re le magolegwa, fela go tshela gone re tlaa bo re tshela le gone ga re na go tlhola re bonye bananyana ba rona ba šwa re ba lebile fela jaana kgotsa basadi ba rona le bana ba itšhwela fela jaana. ₂₈Re lo rapela ka legodimo le lefatshe le ka Modimo wa rona, Morena wa borraetsho o o re otlhaelang dibe tsa rona le dibe tsa bagolwagolwane ba rona, gore lo dire jalo jaanong jaana, gompieno.”

₂₉Dilelo tse di botlhoko tsa tšwa mo bathong botlhe ba ba neng ba phuthegile, ba goa Morena Modimo botlhe ka lentšwe le le utlwalang. ₃₀Ke fa Usia a bua nabo a re, “Nametsegang, bagaetsho! A re ke re kakatleleng malatsi a le 5 gape. Mo nakong eo, Morena Modimo wa rona o tla re tlhomogela pelo, gonne ga o na go re tlogela gotlhelele fela. ₃₁Fa e ka re nako e e fela, go bo go ise go bonale thuso epe, ke tla dira fela jaaka lo buile.” ₃₂Ka mafoko a, a phatlalatsa batho, ba ya kwa mafelong a bone a a farologanyeng. Banna ba ya go disa dipota le ditlhoa tsa motse, basadi le bana ba ya gae. Motse o nyemile moko thatathata fela.