JOBE 15

₂“A motlhalefi o ka araba ka kitso

e e leng phefo fela,

a tlatsa mpa ya gagwe phefo

ya botlhabatsatsi,

₃e le go ikarabela ka mafoko

a a se nang mosola

le ka dipuo tse di sa thuseng

sepe?

₄Ee, wena o senya poifo-Modimo,

o ngotla tshisimogo

fa pele ga Modimo.

₅Gonne molomo wa gago

o buisiwa ke molato wa gago;

o itlhophela puo ya maferefere.

₆Ga se nna ke go sekisang,

o sekisiwa ke molomo wa gago;

mafoko a gago a supa ka ga gago.

₇A ke wena motho wa ntlha

yo o tsetsweng?

A o tlholegile pele ga dithabana?

₈A o ne o reeditse

mo lekgotleng la Modimo?

A o iphamoletse botlhale?

₉O itse eng se rona re sa se

itseng?

A o lemogile sengwe

se rona re iseng re se lemoge?

₁₀Ba ba tlhogo-di-pududu le

batsofe

le rona re na nabo;

ke ba malatsi a mantsi

bogolo go rraago.

₁₁Dikgomotso tsa Modimo

a o a di galala,

e bong lefoko le le builweng

le wena ka bonolo?

₁₂O betelwang ke pelo?

Ke eng, fa o gwetola matlho?

₁₃Kana o losa mowa wa gago

le Modimo,

fa o ntsha mafoko a a ntseng jalo

mo molomong wa gago!

₁₄Motho ke eng?

A e ka nna yo o itshekileng?

A ngwana wa mosadi

e ka nna yo o siameng?

₁₅Bonang, baitshepi ba ona

ga o ba ikanye;

le legodimo ga le a itsheka

mo matlhong a ona,

₁₆bogolo jang motho yo o maila

yo o senyegileng,

yo o nwang bokgopo jaaka metsi!

₁₇Ke tla go ruta, ntheetse;

ke tla bolela tse ke di bonyeng,

₁₈tse batlhalefi ba di bolelang,

tse borraabo

ba sa di ba lobelang.

₁₉Ke ba ba neng ba neilwe lefatshe

ba le nosi,

moeng a sa ba ralale:

₂₀Ba re: Moikepi o mo poifong

ka malatsi otlhe fela,

jaaka morena yo o pelompe ka

dinyaga tsotlhe tse o di

beetsweng.

₂₁Medumo ya matshogo

e duma mo tsebeng tsa gagwe;

e a re a le kagisong,

a welwe ke mogateledi.

₂₂Ga a solofele go ka boa mo

lefifing;

o atlholetswe go bolawa ka

tšhaka.

₂₃O kgarakgatshega go batla dijo.

Di kwa kae?

O a itse, fa letsatsi la tatlhego

le etleeditswe le le gaufi nae.

₂₄Tlalelo le pitlaganyo

di mo tshosa

di mo wela jaaka go tshosa kgosi

e e bolotseng go tlhasela.

₂₅Ke ka gonne o otlololetse

Modimo letsogo go lwa nao,

a ikgantshetsa

Mong-wa-thata-yotlhe.

₂₆A o tlhasela ka thamo

e e gagametseng

le ka bontsi jwa dithebe

tsa gagwe.

₂₇Gonne o sirilwe matlho

ke go nona,

a akola mafura diropeng,

₂₈a nna mo metseng e e sentsweng

le mo matlong,

a ba a ileditsweng

a a atlholetsweng go nna

matlotla.

₂₉Ga a kitla a huma;

tse o nang natso

ga se tse di tlhomameng;

di tshwana le diako

tse di sa obegeleng fa fatshe.

₃₀Ga a kitla a falola mo fifing;

bolelo bo tla swabisa

matlhogela a gagwe;

o tla nyelela ka pudulo

ya molomo wa ona.

₃₁A a se ka a ikanya boithamako,

o a itsietsa;

gonne tuelo ya gagwe

e tla nna boithamako.

₃₂Go tla dirafala jalo

letsatsi la gagwe le ise le tle;

kala ya mokolane wa gagwe

ga e tlhoge.

₃₃O tla diga maungo

a a iseng a butswe

jaaka moweine;

a tlhotlhora dithunya tsa gagwe

jaaka setlhare sa olefa.

₃₄Gonne lekoko la balotsana

ke la baopa;

molelo o tla fisa malapa

a ba ba amogelang neo

e e faposang tshiamo.

₃₅Ba ithwala tapisego,

ba tsala tatlhego;

teng ya bone e etleetsa tsietso.”