JOBE 26

₂“Yo o tlhokang thata,

o mo thusitse jang ne!

Letsogo le le sa tiang,

o le namoletse pila jang!

₃Yo o se nang botlhale,

ruri o mo gakolotse!

Kana o ntshitse

tse di tlhalefisang di le dintsi!

₄Mafoko a gago

o a boleletse mang?

Ke mowa wa ga mang

o ò neng ò bua ka ona?

₅Baswi ba roroma

kwa tlase ga metsi

le tse di agileng mo go ona.

₆Felo ga baswi

ga go a bipega fa pele ga ona;

molete wa tatlhego

ga o na sekhurumelo.

₇Ona o tsharolola bokone

godimo ga lolea;

o lepeletsa lefatshe

mo go se nang sepe.

₈O phuthela metsi

mo marung a ona,

mme ga go leru lepe

le le phanngwang ke metsi.

₉Ponalo ya sedulo sa ona

sa bogosi o a e sira,

o ala leru la ona mo go yona.

₁₀O rala molelwane

mo godimo ga metsi

go fitlha kwa mafelelong a lesedi

fa le amanang le lefifi teng.

₁₁Maotwana a legodimo

a a reketla,

a ba rerege ka kgalemelo ya ona.

₁₂O hudua lewatle ka thata ya ona;

o remaganya kgogela

ka tlhaloganyo ya ona.

₁₃Go sedifetse kwa legodimong

ka phefo ya ona;

seatla sa ona se phololetsa noga

e e lobelo.

₁₄Bonang, tseo ke makhutlo

a ditsela tsa ona fela.

Tse re di utlwang ka ga ona

ke tsa go sebasebelwa fela,

mme modumo wa thata ya ona

ke mang

yo o ka o tlhaloganyang?”