JOŠUA 21

₁Jaanong ditlhogo tsa ditshika tsa Balefi tsa atamela kwa go Eleasare moperesiti le kwa go Jošua morwa Nune le kwa ditlhogong tsa ditshika tsa ditso tsa Iseraele ₂tsa bua nabo mo Silo mo lefatsheng la Kanana tsa re: “Morena o laetse ka Moše gore re fiwe metse go nna mo go yona le mafulo a yona a diruiwa tsa rona.” ₃Ke fa Baiseraele ba naya Balefi metse eo le mafulo a yona mo nageng ya bone ka fa taelong ya Morena.

₄Jaanong tengwa ya tswela ditshika tsa ga Kahathe, mme bomorwa Arone moperesiti ba e leng Balefi ba abelwa metse e le 13 ka tengwa mo lotsong lwa ga Juta le lwa ga Simeone le lwa ga Benyamene. ₅Mme ba bangwe ba losika lwa ga Kahathe ba abelwa metse e le some ka tengwa ka fa ditshikeng tsa bone mo lotsong lwa ga Eferaime le lwa ga Dane le lwa bontlhanngwe jwa ga Manase.

₆Ba losika lwa ga Geresone ba abelwa metse e le 13 ka tengwa ka fa ditshikeng tsa bone mo lotsong lwa ga Isašare le lwa ga Asere le lwa ga Nafetale le lwa bontlhanngwe jwa ga Manase kwa Basane.

₇Ba losika lwa ga Merari ba abelwa metse e le 12 ka fa ditshikeng tsa bone mo lotsong lwa ga Rubene le lwa ga Gate le lwa ga Sebulone.

₈Baiseraele ba naya Balefi metse eo le mafulo a yona ka go tlhama tengwa jaaka Morena a laetse ka Moše.

₉Mo lotsong lwa Bajuta le lwa Basimeone ba ne ba ntsha metse e e tla bolelwang ka maina. ₁₀Yona ya nna ya bomorwa Arone ba e leng ba ditshika tsa ga Kahathe mongwe wa bomorwa Lefi; gonne tengwa ya ntlha e ne e le ya bone. ₁₁Bone ba abelwa motse wa ga Areba, rraagwe Enake, o e leng Heberone mo dithabeng tsa Juta le mafulo a ona mo tikologong ya ona. ₁₂Mme masimo a motse oo le metsana ya ona ba ne ba di neile Kalebe morwa Jefune go nna boswa jwa gagwe.

₁₃Bomorwa moperesiti Arone ba newa motse wa botshabelo jwa babolai wa Heberone le mafulo a ona le wa Lebena le mafulo a ona ₁₄le wa Jathire le mafulo a ona le wa Ešethemoa le mafulo a ona ₁₅le wa Holone le mafulo a ona le wa Debire le mafulo a ona ₁₆le wa Aine le mafulo a ona le wa Jota le mafulo a ona le wa Betšhemeše le mafulo a ona. Ke metse e e robongwe ya ditso tse pedi tseo. ₁₇Mo lotsong lwa Benyamene ba newa motse wa Gibeone le mafulo a ona le wa Geba le mafulo a ona ₁₈le wa Anathothe le mafulo a ona le wa Alemone le mafulo a ona. Ke metse e mene. ₁₉Metse yotlhe ya bomorwa Arone baperesiti ke metse e le 13 le mafulo a yona.

₂₀Ba bangwe ba losika lwa ga Kahathe, e bong Balefi ba ditshika tsa bomorwa Kahathe ba abelwa metse ya bone ka tengwa mo lotsong lwa Eferaime, ₂₁ba newa motse wa botshabelo jwa babolai wa Šegeme le mafulo a ona mo dithabeng tsa Eferaime le wa Gesere le mafulo a ona ₂₂le wa Kibesaime le mafulo a ona le wa Bethorone le mafulo a ona. Ke metse e mene. ₂₃Mo lotsong lwa Dane ba newa wa Eletheke le mafulo a ona le wa Gibethone le mafulo a ona ₂₄le wa Ayalone le mafulo a ona le wa Gathe-Rimone le mafulo a ona. Ke metse e mene. ₂₅Mo bontlhanngweng jwa lotso lwa Manase ba newa wa Thaenage le mafulo a ona le wa Ibeleame le mafulo a ona. ₂₆Metse yotlhe ya ditshika tsa Bakahathe ba bangwe ke e some le mafulo a yona.

₂₇Bageresone ba e leng ba ditshika tsa Balefi mo bontlhanngweng jwa lotso lwa Manase ba fiwa motse wa botshabelo jwa babolai wa Golane kwa Basane le mafulo a ona le wa Beešethera le mafulo a ona. Ke metse e mebedi. ₂₈Mo lotsong lwa Isašare ba fiwa wa Kišione le mafulo a ona le wa Daberathe le mafulo a ona ₂₉le wa Jaremuthe le mafulo a ona le wa Enganime le mafulo a ona. Ke metse e mene. ₃₀Mo lotsong lwa Asere ba fiwa wa Mišeale le mafulo a ona le wa Abetone le mafulo a ona ₃₁le wa Helekathe le mafulo a ona le wa Rehobe le mafulo a ona. Ke metse e mene. ₃₂Mo lotsong lwa Nafetale ba fiwa motse wa botshabelo jwa babolai wa Keteše mo Galelea le mafulo a ona le wa Hamothe-Dore le mafulo a ona le wa Karethane le mafulo a ona. Ke metse e meraro. ₃₃Metse yotlhe ya Bageresone ka fa ditshikeng tsa bone ke metse e le 13 le mafulo a yona.

₃₄Mme Balefi ba bangwe gape ba ditshika tsa Bamerari mo lotsong lwa Sebulone ba fiwa wa Jokeneame le mafulo a ona le wa Karetha le mafulo a ona ₃₅le wa Dimena le mafulo a ona le wa Nahalale le mafulo a ona. Ke metse e mene. ₃₆Kwa moseja ga Joretane go lebagana le Jerigo mo lotsong lwa Rubene ba fiwa motse wa botshabelo jwa babolai wa Besere le mafulo a ona le wa Jahase le mafulo a ona ₃₇le wa Ketemothe le mafulo a ona le wa Mefaathe le mafulo a ona. Ke metse e mene. ₃₈Mo lotsong lwa Gate ba fiwa motse wa botshabelo jwa babolai wa Ramothe kwa Gileate le mafulo a ona le wa Mahanaime le mafulo a ona ₃₉le wa Hešebone le mafulo a ona le wa Jasere le mafulo a ona. Ke metse e mene mmogo. ₄₀Metse yotlhe ya Bamerari ka fa ditshikeng tsa bone ba e leng ba ditshika tsa Balefi ba bangwe ke metse e e 12 e ba e bonyeng ka tengwa.

₄₁Metse yotlhe ya Balefi mo dinageng tsa Baiseraele e ne e le metse e le 48 le mafulo a yona. ₄₂Motse mongwe le mongwe wa metse eo wa bo o na le mafulo a ona mo tikologong ya ona. Go ne go ntse jalo mo metseng eo yotlhe.

₄₃Morena o ne a naya Baiseraele lefatshe lotlhe jalo le a neng a le ikanetse borraabo go le ba naya. Ba le rua, ba nna mo go lone. ₄₄Morena a ba naya boikhutso mo ntlheng tsotlhe fela jaaka a ikanetse borraabo, go se na ope mo babeng botlhe ba bone yo o ka emelanang nabo. Morena a neela baba botlhe ba bone mo diatleng tsa bone. ₄₅Ga go a ka ga tlhaela sepe sa tse di molemo tse Morena o neng a di solofeditse Baiseraele. Tsa dirafala tsotlhe.