JOŠUA 3

₁Ya re ka moso Jošua a phakela, ene le Baiseraele botlhe, ba tloga kwa Sitime ba fitlha fa Joretane, ba lala gona ba ise ba tshele. ₂Ya re malatsi a le mararo ale a se na go feta, balaodi ba ralala bothibelelo, ₃ba laola morafe ba re: “E re lo bona Letlole la Kgolagano ya Morena, Modimo wa lona, le sikerwe ke baperesiti ba Balefi, le lona lo bolole mafelong a lona, lo le sale morago. ₄Fela a go nne sebaka fa gare ga lona le lone, e ka nna selekanyo sa mabogo a le kete tse pedi. Lo se ka lwa le atamela gore lo tle lo itse tsela e lo tla tsamayang ka yona; gonne ga lo ise lo ke lo sepele mo tseleng e ka gope.”

₅Mme Jošua a raya morafe a re: “Iitshepiseng, gonne kamoso Morena o tla dira dikgakgamatso mo gare ga lona.” ₆Jošua a ba a raya baperesiti a re: “Sikarang Letlole la Kgolagano, lo etelele morafe pele.” Ba le sikara, ba etelela morafe pele.

₇Mme Morena a raya Jošua a re: “Ka letsatsi la kajeno ke tla simolola go go dira mogolo mo matlhong a Baiseraele botlhe, ba tle ba lemoge gore ke na nao jaaka ke ne ke na le Moše. ₈Mme jaanong o laele baperesiti ba ba sikereng Letlole la Kgolagano o re: ‘E re fa lo tsena mo metsing fa thoko ga Joretane, lo eme mo go ona.’ ”

₉Ke fa Jošua a raya Baiseraele a re: “Atamelang kwano lo utlwe mafoko a Morena, Modimo wa lona.” ₁₀Jošua a ba a re: “Se lo tla lemogang ka sona gore Modimo o o phelang o mo gare ga lona le gore ruri o tla leleka Bakanana le Bahethe le Bahewi le Baferesi le Bagiregasi le Baamori le Bajebusi fa pele ga lona, ₁₁ke se: Lo tla bona Letlole la Kgolagano ya Morena wa lefatshe lotlhe le tshela, le lo etelela pele mo Joretane. ₁₂Jaanong itlhaoleleng banna ba le some pedi mo ditsong tsa Iseraele, lotso longwe le longwe lo ntshe a le mongwe. ₁₃Mme e tla re dipato tsa dinao tsa baperesiti ba ba sikereng Letlole la Morena, la Morena wa lefatshe lotlhe, di gata mo metsing a Joretane, metsi a Joretane a kgaolwe. Metsi a Joretane a a tswang kwa godimo a tla ema jaaka lobota lo le longwe.”

₁₄Jaanong morafe wa tloga mo ditenteng tsa ona go tshela Joretane, baperesiti ba ba sikereng Letlole la Kgolagano ba ntse ba eteletse morafe pele. ₁₅Joretane o ne a tlaletse ruri go penologela mo dintshing ka malatsi aotlhe a thobo. Ya re baperesiti ba ba sikereng Letlole ba fitlha fa Joretane, mme dinao tsa bone di ikina mo metsing a a fa losing, ₁₆metsi a a fologang kwa godimo a ema, a gogomoga, a nna mokoa o le mongwe kgakala thata kwa motseng wa Atame o o bapileng le wa Sarethane; mme metsi a a fologelang kwa Lewatleng la Sekaka kwa Lewatleng la Letswai a fela, a kgaogela ruri. Jaanong morafe wa tshela o lebaganye le Jerigo. ₁₇Jaanong baperesiti ba ba sikereng Letlole la Kgolagano ya Morena ba bo ba eme fa go omileng fa gare ga Joretane, Baiseraele botlhe ba ntse ba tshela fa go omileng, ga tsamaya setšhaba sotlhe sa fetsa go tshela Joretane.