NEHEMIA 8

₁Jaanong ya re kgwedi ya bosupa e tla, Baiseraele ba ntse ba le mo metseng ya bone, morafe otlhe wa phuthega ka seopo sengwe kwa patlelong e e fa pele ga Kgoro ya Metsi. Ba feta ba raya Esera moitsedikwalo gore a tlise lokwalo lwa molao wa ga Moše o Morena o o laetseng Baiseraele. ₂Mme Esera moperesiti a tlisa molao fa pele ga phuthego, fa pele ga banna le basadi le botlhe ba ba ka tlhaloganyang go utlwa, e le ka letsatsi la ntlha la kgwedi ya bosupa. ₃A ba a buisa mo go ona gona kwa patlelong e e fa pele ga Kgoro ya Metsi go simolola ka masa go ya motshegareng, fa pele ga banna le basadi le ba ba tlhaloganyang. Mme ditsebe tsa morafe otlhe di ne di sekegetswe lokwalo lwa molao.

₄Esera moitsedikwalo o ne a eme mo sefateng se ba neng ba se diretse puiso eo; fa go ene ntlheng ya le le jang go ne go eme Mathitya le Sema le Anaya le Uria le Hilekia le Maaseya; ntlheng ya la molema go eme Phetaya le Mišaele le Malekhia le Hasume le Hasebatana le Sagaria le Mesulame.

₅Esera a phutholola lokwalo fa pele ga morafe otlhe, gonne o ne a okame morafe otlhe. Mme ya re a lo phutholola, batho botlhe ba ema. ₆Esera a tumisa Morena, Modimo o mogolo, mme morafe otlhe wa araba wa re: “Amen! Amen!” ba tsholeditse mabogo; ba be ba inamela fa fatshe ka difatlhego, ba obamela Morena.

₇Mme Jesua le Bani le Serebja le Jamine le Akhube le Sabethai le Hodiya le Maaseya le Keleta le Asaria le Josabate le Hanane le Phelaya, Balefi, ba tlhalosetsa morafe molao, morafe o ntse o eme mo felong ga ona. ₈Ba buisa lokwalo lwa molao wa Modimo ka thanolo, ba o tlhalosa gore batho ba tlhaloganye se se buisiwang.

₉Mme Nehemia mookamedi le Esera moperesiti moitsedikwalo le Balefi ba ba neng ba ruta morafe ba raya morafe otlhe ba re: “Letsatsi le, le itshepetse Morena, Modimo wa lona, se hutsafaleng, se leleng!” Ba re jalo, gonne batho botlhe ba ne ba lela, fa ba utlwa mafoko a molao. ₁₀A ba a ba raya a re: “Yaang lo je tse di mafura, lo nwe tse di botshe, lo romele ba ba sa tsholang sepe dikabelo; gonne letsatsi le le itshepetse Morena wa rona. Lo se ka lwa hutsafala. Gonne go itumela mo Moreneng ke thata ya lona.”

₁₁Balefi ba didimatsa morafe otlhe ba re: “Didimalang! Gonne letsatsi le, le boitshepo. Se hutsafaleng!” ₁₂Ke fa batho botlhe ba ya go ja le go nwa le go romela ba bangwe dikabelo le go dira moletlo o mogolo; gonne ba ne ba tlhalogantse mafoko a ba a boleletsweng.

₁₃Mme ka letsatsi la bobedi ga phuthega ditlhogo tsa dikgoro tsa morafe otlhe le baperesiti le Balefi, ba tla kwa go Esera moitsedikwalo go ithuta mafoko a molao. ₁₄Ba fitlhela mo molaong o Morena a o beileng ka Moše go kwadilwe go twe: “A ka moletlo kgweding ya bosupa Baiseraele ba nne mo metlaaganeng. ₁₅Gape a ba utlwatse, ba tlhabe mokgosi mo metseng yotlhe ya bone le mo Jerusalema ba re: ‘Tswelang kwa dithabeng lo tlise dikala tsa matlhware le tsa olefa le tsa metlhakolane le tsa mekolane le tsa ditlhare tse di raraanyeng go dira metlaagana ka dikala jaaka go kwadilwe.’ ” ₁₆Ke fa batho ba tswa ba di tlisa, ba itirela metlaagana, ba bangwe mo godimo ga matlo a bone, ba bangwe mo malapeng a bone gongwe mo malapeng a Ntlo ya Modimo gongwe mo patlelong ya Kgoro ya Metsi gongwe mo patlelong ya Kgoro ya Eferaime. ₁₇Mme phuthego yotlhe ya ba ba boileng kwa botshwarong ba dira metlaagana, ba nna mo go yona; gonne Baiseraele ba ne ba ise ba ke ba dire jalo go tloga malatsing a ga Jošua, morwa Nune, go fitlha letsatsing leno. Ya nna boitumelo jo bogolo thata. ₁₈Esera a buisa lokwalo lwa molao wa Modimo ka letsatsi lengwe le lengwe go tloga ka letsatsi la ntlha go fitlha letsatsing la bofelo. Ba dira moletlo malatsi a supa, mme ka letsatsi la robedi ga nna kgobokano ya go khutlisa moletlo ka fa molaong.