DIPESALEME 107

₁Lebogang Morena,

gonne o molemo;

gonne bopelontle jwa gagwe

ke jo bo sa khutleng.

₂A ba ba golotsweng ke Morena

ba bue jalo,

ba o ba golotseng

mo seatleng sa mopatiki,

₃a ba phutha kwa mafatsheng,

kwa botlhabatsatsi

le kwa bophirimatsatsi,

kwa bokone le kwa lewatleng.

₄Ba ba neng ba kgarakgatshega

kwa sekakeng mo gare ga naga,

ba sa bone tsela

e e yang kwa motseng

o ba ka agang mo go ona;

₅ba tshwerwe ke tlala le lenyora,

mewa ya bona e felelwa

mo teng ga bona,

₆mme ba goela Moreneng,

ba le mo tlalelong,

mme a ba golola mo dipitlaganong

tsa bona,

₇a ba tsamaisa mo tseleng

e e leng yona

gore ba fitlhe mo motseng

o ba ka agang mo go ona:

₈Bona bao a ba lebogele Morena

bopelotlhomogi jwa gagwe

le dikgakgamatso tsa gagwe

tse a di diretseng bana ba batho,

₉ka a kgalolositse mowa

o o nyorilweng,

a jesa mowa o o tshwerweng

ke tlala tse di molemo.

₁₀Ba ba neng ba dutse mo lefifing

le mo moriting wa loso

ba golegilwe ka tlalelo le tshipi,

₁₁ka ba ne ba rukhutlhegetse

mafoko a Modimo,

ba nyatsa kgakololo

ya Mogodimodimo;

₁₂ba o neng a kokobetsa

dipelo tsa bona ka tapisego,

ba kgopiwa go se na mothusi;

₁₃ya baa gona ba goelang

Moreneng, ba le mo tlalelong,

mme a ba golola

mo dipitlaganong tsa bona;

₁₄a ba ntsha mo lefifing

le mo moriting wa loso,

a kgaola dikgole tsa bona:

₁₅A bao ba lebogele Morena

bopelotlhomogi jwa gagwe

le dikgakgamatso tsa gagwe

tse a di diretseng bana ba batho,

₁₆ka a thubile ditswalo tsa kgotlho,

a roba mephakarego ya tshipi.

₁₇Ba e neng e le masilo ka ntlha

ya tsamao ya bona mo ditlolong,

ba bogisiwa ka ntlha

ya melato ya bona,

₁₈mo ba neng ba tenwa

ke dijo tsotlhe,

ba le gaufi le go swa;

₁₉ya baa gona ba goelang Moreneng,

ba le mo tlalelong,

mme a ba golola

mo dipitlaganong tsa bona;

₂₀a romela lefoko la gagwe,

a ba fodisa,

a pholosa maphelo a bona

mo mabitleng:

₂₁A bao ba lebogele Morena

bopelotlhomogi jwa gagwe

le dikgakgamatso tsa gagwe

tse a di diretseng bana ba batho;

₂₂a ba tsise ditlhabelo tsa tebogo,

ba bolele ditiro tsa gagwe

ka tuduetso.

₂₃Ba ba neng ba tsamaya

mo lewatleng ka dikepe,

ba bapala mo metsing a magolo,

₂₄ke bona ba ba bonyeng

ditiro tsa Morena

le dikgakgamatso tsa gagwe

mo botennye.

₂₅A laela, a fokisa phefo ya ledimo,

la gogomosa dintelo tsa lewatle.

₂₆Ba akgolelwa kwa godimo

le kwa tlase,

ba nyema moko mo tlalelong;

₂₇ba ne ba theekela,

ba kgokgweetsega jaaka letagwa,

ba felelwa ke maano otlhe.

₂₈Ba goela Moreneng,

ba le mo tlalelong,

mme a ba golola mo dipitlaganong

tsa bona,

₂₉a kokobetsa ledimo,

la nna phefonyana fela,

makhubu a lewatle a kokobela;

₃₀mme ba itumelela

go kokobela ga ona,

mme a ba fitlhisa kwa

bogorogelong jwa dikepe

jo ba bo tlhologeletsweng:

₃₁A bao ba lebogele Morena

bopelotlhomogi jwa gagwe

le dikgakgamatso tsa gagwe

tse a di diretseng bana ba batho;

₃₂a ba mo godise

mo phuthegong ya morafe,

ba mmoke mo pitsong ya bagolo.

₃₃Dinoka o di fetotse sekaka,

le metswedi ya metsi a e dira

naga e e omileng.

₃₄Lefatshe le le bogale

o le fetotse magalaopa

ka ntlha ya boikepo

jwa baagi ba lone.

₃₅Sekaka o se fetotse letsha la metsi,

le naga e e omileng

a e dira metswedi ya metsi.

₃₆Ba ba bolawang ke tlala

a ba baya teng,

mme ba aga motse

o ba ka nnang mo go ona.

₃₇Ba jwala masimo,

ba tlhoma ditlhare tsa moweine,

ba fula maungo, ba kotula.

₃₈Mme a ba tshegofatsa,

ba be ba ntsifala thata;

diruiwa tsa bona

a se ka a di fokotsa.

₃₉Ba boela ba fokotsega,

ba kokobediwa ke bokete

jwa botlhoko le khutsafalo.

₄₀Yo o goromeletsang nyatsego

mo batlotleging,

a ba kgarakgatsha sekakeng

mo go se nang tsela;

₄₁ene o ne a ntsha mohumanegi

mo tlalelong, a mo godisa,

a dira ditshika tse di tshwanang

le difutshane ka bontsi.

₄₂Moo go bona ba ba nang le nnete,

ba itumela;

boikepo jotlhe bo ithibile molomo.

₄₃Yo o botlhale ke mang?

A a tlhokomele dilo tse,

a ele ditiro tsa bopelotlhomogi

jwa Morena tlhoko.