DIPESALEME 124

Fa e ka bo e ne e se Morena

yo o neng a re emela –

a Iseraele a re jalo –

₂fa e ka bo e ne e se Morena

yo o neng a re emela,

jale fa batho ba re tsogela,

₃foo ba ka bo ba re meditse

re sa phela,

jale fa ba re tukela bogale.

₄Foo noka e ka bo e re gogotse,

metsi a ka bo a re betile.

₅Foo metsi a a gogomogileng

a ka bo a re khurumeditse.

₆A go bakwe Morena

yo o sa re tlogelelang

go garolwa ke meno a bona.

₇Mewa ya rona

e falotse jaaka nonyane

mo mutlwaneng wa mothaisi;

mogala o kgaogile,

mme rona re falotse.

₈Thuso ya rona

e mo leineng la Morena,

Modiri wa legodimo le lefatshe.