DIPESALEME 18

“Ke go rata ka pelo yotlhe,

Morena, thata ya me.

₃Morena ke lefika la me

le phemelo ya me ya kwa thabeng

le mogolodi wa me;

ke Modimo wa me

le lefika la phemelo la me,

le ke tshabelang kwa go lone,

le thebe ya me

le lonaka lwa me lwa pholoso

le kago ya phemelo ya me.

₄E a re fa ke bitsa Morena

yo o bakwang,

ke gololwe mo babeng ba me.

₅Makhubu a loso

a ne a ntikanyeditse,

dinoka tsa tatlhego

di ne di mpoifisa.

₆Dikgole tsa felo ga baswi

di ne di ntsentse gare

le dithapo tsa loso tsa nkwela.

₇E rile ke pitlagantswe,

ka lelela Moreneng,

ka kuela Modimong wa me;

wa utlwa lentswe la me

o le mo Tempeleng ya ona,

selelo sa me sa tla fa pele ga ona,

sa tsena mo ditsebeng tsa ona.

₈Foo lefatshe la reketla, la roroma,

metheo ya dithaba ya roroma,

ya tshikinyega, ka o ne o galefile.

₉Ga kua musi,

o tswa mo nkong ya ona,

molelo wa tswa

mo molomong wa ona o senya,

magala a tswa mo go ona a tuka.

₁₀Wa sekamisa legodimo, wa fologa;

lefifi la nna

fa tlase ga dinao tsa ona.

₁₁O ne o palame Kerubime o fofa;

o kala o le mo diphukeng

tsa phefo.

₁₂Wa dira lefifi sesiro sa ona,

le lefifi la metsi le maru a a maima

wa di dira motlaagana

o o itikanyeditseng ka ona.

₁₃Mo kgalalelong e e fa pele ga ona

ga tswa maru a ona

le sefako le magala a molelo.

₁₄Morena a dumisa maru

kwa legodimong;

Mogodimodimo a utlwatsa

lentswe la gagwe,

ga nna sefako le magala a molelo;

₁₅a hula metsu ya gagwe,

a phatlalatsa baba;

a rathisa tladi, a ba tshosa.

₁₆Mateng a lewatle a bonala,

metheo ya lefatshe ya senoga

ka ntlha ya kgalemo ya gago,

Morena, ka ntlha ya go suma

ga mowa wa nko ya gago.

₁₇O ne a ntsha letsogo

a le kwa godimo, a ntshwara,

a nkinola mo metsing a magolo.

₁₈A nkgolola mo babeng ba me

ba ba thata

le mo go ba ba ntlhoileng;

gonne ba ne ba mpheta ka thata.

₁₉Ba nkwetse

mo letsatsing la tlalelo ya me,

mme Morena

a nna seitsetsepelo sa me.

₂₀A nkgogela kwa ntle

mo mafelong a a atlhameng,

a nkgolola,

ka gonne ke a mo kgatlha.

₂₁Morena o ne a ntuela

ka fa tshiamong ya me,

a mpusetsa ka fa boitshekong

jwa diatla tsa me.

₂₂Gonne ke tshwere

ditsela tsa Morena,

mme ga ke a ka ka ikepa

mo Modimong wa me.

₂₃Gonne tsotlhe tse di siameng

fa pele ga ona,

ke ntse ke di tlhokomela,

mme ga ke a ka ka tlosa

melao ya ona fa go nna.

₂₄Ke ne ke siame fa pele ga ona,

ka itisa gore ke se nne molato.

₂₅Ka moo Morena

a ntuela ka fa tshiamong ya me

le ka fa boitshekong

jwa diatla tsa me,

jo bo fa pele ga matlho a gagwe.

₂₆O itshupa o le bopelotlhomogi

mo go yo o tlhomogang pelo;

o itshupa o le tlhamalalo

mo monneng yo o tlhamaletseng.

₂₇O itshupa o le phepa

mo go yo o phepa,

mme mo molotsaneng

o itshupa o le kgopo.

₂₈Gonne batho ba ba bogisiwang

o ba direla kgololo;

mme matlho a a mabela

o a a kokobetsa.

₂₉Ee, o tukisa lobone lwa me;

Morena, Modimo wa me

o sedifatsa lefifi la me.

₃₀Gonne ke tlhasela lesomo la baba

ka wena;

ke tlola lobota ka Modimo wa me.

₃₁Tsela ya Modimo oo e itekanetse;

lefoko la Morena le itshekile.

Ke ene thebe ya botlhe

ba ba mo ikanyang.

₃₂Gonne ke mang yo e leng

Modimo fa e se Morena?

Gape ke mang yo e leng lefika

fa e se Modimo wa rona?

₃₃Ke ona Modimo

o o ntlamang ka thata,

o o dirang tsela ya me botlalo.

₃₄O dira dinao tsa me

jaaka tsa tshephe,

o nkemisa mo mafelong a me

a a godimo.

₃₅O ruta diatla tsa me go tlhabana,

gore mabogo a me

a ba a obe bora jwa kgotlho.

₃₆O nneile thebe ya pholoso ya gago;

letsogo le le jang la gago

le ntshegeditse;

go ikinamisa ga gago

go ntira mogolo.

₃₇O atlhamolositse kgato ya me

fa tlase ga me,

malengana a me

ga a a ka a temeka.

₃₈Ke lelekile baba ba me,

ka ba tshwara,

mme ga ke a ka ka boa

ke ise ke ba nyeletse.

₃₉Ke ba thubakile,

ba be ba retelelwa ke go tsoga;

ba wetse fa tlase ga dinao tsa me.

₄₀O ntlamile ka thata go tlhabana;

o dira gore bona ba ba ntsogetseng

ba ikobe fa tlase ga me.

₄₁Le gona o tshabisitse baba ba me

gore ba nkhularele;

ba ba ntlhoileng ka ba nyeletsa.

₄₂Ba goela thuso,

mme go se na mothusi ope;

ba tlhaeleletsa kwa Moreneng,

mme a se ka a ba araba.

₄₃Ke ne ka ba thuga jaaka lerole

fa pele ga phefo,

ka ba gelolela kwa ntle

jaaka seretse sa mmila.

₄₄O nkgolotse

mo dikganetsanyong tsa batho;

o ntirile tlhogo ya merafe.

Ke diretswe ke setšhaba

se ke neng ke sa se itse.

₄₅E rile fela fa ba nkutlwela,

ba tla go inkobela;

bomorwa ditšhaba

ba inneela ka go mpoifa.

₄₆Bomorwa baeng ba a koafala;

ba a tla, ba roroma,

ba tswa mo maiphitlhong a bona.

₄₇Morena o a phela.

A go bakwe ene lefika la me.

A go godisiwe Modimo

wa pholoso ya me;

₄₈ona Modimo o o mpusolosetsang

o tsenya batho mo taolong ya me;

₄₉o nkgolola mo babeng ba me

ba ba bogale.

Wena o nkgodisetsa

ba ba ntsogelang,

o nkgolola

mo monneng yo o setlhogo.

₅₀Ke ka ntlha ya moo, Morena,

ke ratang go go leboga

mo merafeng

le go opelela leina la gago pako.

₅₁Wena yo o nayang kgosi

e o e beileng kgololo e kgolo,

boitshwarelo o bo supetsa

motlodiwa wa gago,

e bong Dafita le losika lwa gagwe

go ya bosakhutleng.”