DIPESALEME 20

₂A Morena a go utlwe

ka letsatsi la tlalelo;

a leina la Modimo wa ga Jakobe

le go femele.

₃A a go romele thuso e e tswang

mo Felong-ga-Boitshepo,

a go kokotletse a le mo Sione.

₄A a gopole ditshupelo tsotlhe

tsa gago tsa dijo;

a be a itumelele setlhabelo sa gago

sa phiso. Sela.

₅A a go neye se pelo ya gago

e se eletsang,

a dirafatse maikaelelo otlhe a gago.

₆Re tla dudueletsa phenyo ya gago,

re tlhoma difoka

ka leina la Modimo wa rona.

A Morena a dirafatse

dikopo tsotlhe tsa gago.

₇Jaanong ke itse gore Morena

o thusa motlodiwa wa gagwe,

a mo utlwa a le kwa legodimong

le le boitshepo la gagwe

ka thata e e pholosang

ya letsogo le le jang la gagwe.

₈Bangwe ba boka

dikoloi tsa tlhabano,

ba bangwe ba boka dipitse;

mme rona re baka

leina la Morena,

Modimo wa rona.

₉Bao, ba obegile ba wa;

mme rona

re tsogile re eme ka tlhomamo.

₁₀Morena, thusa kgosi,

o re utlwe mogang re go bitsang.