DIPESALEME 28

Ke tlhaeleletsa kwa go wena,

Morena;

se ntidimalele, lefika la me,

e se re gongwe fa o ntidimalela,

ka nna jaaka bona ba ba fologelang

kwa felong ga baswi.

₂Utlwa lentswe

la mekokotlelo ya me,

fa ke goela thuso kwa go wena,

fa ke tsholeletsa mabogo

kwa tengteng ga

Felo-fa-go-Boitshepo ga gago.

₃Se nkgogoreletse le badiradibe

le basiamolodi ba ba buang kagiso

le bangwe-ka-bona,

etswe bosula

bo le mo dipelong tsa bona.

₄Ba nee ka fa ditirong tsa bona

le ka fa bosuleng

jwa ditiro tsa bona;

ba nee ka fa ditirong

tsa diatla tsa bona,

ba busetse se ba se dirileng.

₅E re ka ba sa tlhokomele

ditiro tsa Morena

le e seng tiro ya diatla tsa gagwe,

o tla ba rutla,

mme ga a kitla a ba aga gape.

₆A Morena a a bakwe;

gonne o utlwile lentswe

la mekokotlelo ya me.

₇Morena ke thata ya me

le thebe ya me;

pelo ya me e ne e mo ikanya,

mme ka thusega;

ka moo pelo ya me e a duduetsa,

mme ke mo leboga ka sefela sa me.

₈Morena

ke thata ya morafe wa gagwe

le botshabelo jo bo pholosang

jwa motlodiwa wa gagwe.

₉Thusa batho ba gago,

o tshegofatse boswa jwa gago,

o ba fudise, o bo o ba belege

go ya bosakhutleng.