DIPESALEME 69

₂Modimo, nthuse!

Gonne metsi a gaufi le go mpeta.

₃Ke rorometse mo lerageng

le le botengteng,

kwa go se nang boemo teng;

ke wetse mo madibeng a metsi,

morwalela o nkhurumeditse.

₄Ke lapisitswe ke go lela ga me,

ke sule lentswe;

matlho a me a a fela ke ntse

ke lebeletse Modimo wa me.

₅Ba ba ntlhoileng, go se na molato,

ba bantsi go feta dithiri

tsa tlhogo ya me.

Ba ba ratang go ntshenya,

ba e leng baba ba me

kwa ntle ga lebaka ba thata,

ba re, ke tshwanetse go busa

se ke sa se gapang.

₆Modimo, wena o itse

bosilo jwa me,

le melato ya me ga o a e subelwa.

₇A bona ba ba go lebeletseng

ba se tlhajwe ke ditlhong ka nna,

Morena,

Modimo wa masomosomo.

A bona ba ba go batlang

ba se swabe ka nna,

Modimo wa Iseraele.

₈Gonne ke ka ntlha ya gago

ke rweleng nyatsego,

ditlhong di bipile

sefatlhego sa me.

₉Bomorwa-rre

ke ba fetogetse moeng,

ke yo o sa itsiweng

mo baneng ba ga mme.

₁₀Gonne go tlhoafalela Ntlo ya gago

go njele,

le dikgobo tsa bona

ba ba go kgobang di nkwetse.

₁₁Ke ne ka ikutlwisa botlhoko

ka go itima dijo,

mme ga mphetogela ditlhong.

₁₂Ka ikapesa kgetse ya bohutsana,

mme ka tswa seane sa tshotlo

mo go bona.

₁₃Ba ba ntseng mo kgotleng

ba bua ka ga me,

le ba ba nwang bojalwa

ba nkopela difela.

₁₄Mme nna, thapelo ya me

ke e lebisitse wena, Morena,

ka nako e e go kgatlhang.

Modimo, nkutlwe ka fa bogolong

jwa bopelotlhomogi jwa gago

le ka ntlha ya pholoso ya gago

e e ikanyegang.

₁₅Ntshwatole mo lerageng

gore ke se ka ka rôrômelela ruri;

a ke gololwe

mo go ba ba ntlhoileng

le mo madibeng a metsi.

₁₆A morwalela o se nkhurumetse,

le bodiba a bo se nkometse;

a lemena le se itswale molomo

godimo ga me.

₁₇Nkutlwe, Morena,

gonne bopelotlhomogi jwa gago

bo molemo;

retologela go nna ka fa bogolong

jwa boutlwelo-botlhoko jwa gago.

₁₈Mme o se ka wa fitlhela

motlhanka wa gago

sefatlhego sa gago,

gonne ke mo pitlaganong.

Akofa o nkutlwe.

₁₉Atamela mowa wa me, o o golole;

nkgolole ka ntlha ya baba ba me.

₂₀Wena o itse nyatsego ya me

le ditlhong tsa me

le go kgojwa ga me;

baganetsi ba me o ba itse botlhe.

₂₁Nyatsego e mphatlotse pelo,

ka felelwa ke thata;

ke tlhologeletswe

boutlwelo-botlhoko,

mme ga bo yo, le bagomotsi,

mme ga ke ba bone.

₂₂Ba nneile santlhokwe

go nna sejo sa me,

mme e rile ke nyorilwe,

ba nnosa motatsa.

₂₃A bojelo jwa bona

bo nne segole fa pele ga bona,

le mutlwane

mo go ba ba sa kgathaleng sepe.

₂₄A matlho a bona a fifale

gore ba se ka ba bona,

o theeketse dinôka tsa bona

ka gale.

₂₅Goromeletsa kgakalo ya gago

mo go bona,

a molelo wa bogale jwa gago

o ba tshware.

₂₆A boago jwa bona bo nne letlotla;

a go se age ope

mo ditenteng tsa bona.

₂₇Gonne ba bogisa ena

yo wena o mo iteileng;

ba godisa botlhoko

jwa yo ò mo khutlileng.

₂₈Oketsa molato wa bona ka molato;

a ba se bone tshiamiso ya gago.

₂₉A ba phimolwe

mo bukeng ya bophelo;

a ba se kwalwe le basiami.

₃₀Mme nna ke bogisegile,

ke tletse botlhoko.

A pholoso ya gago, Modimo,

e nkgodise.

₃₁Ke tla tumisa leina la Modimo

ka sefela,

ke le godisa ka pina e e lebogang.

₃₂Moo go tla kgatlha Morena

bogolo go kgomo,

e bong poo e e nang le dinaka

le ditlhako tse di maphata.

₃₃Ba ba pelonolo ba a go bona,

ba itumele.

Lona ba lo batlang Modimo,

a dipelo tsa lona di phele.

₃₄Gonne Morena

o utlwa bahumanegi;

ga a nyatse batshwarwi ba gagwe.

₃₅A legodimo le lefatshe

di mo tumise,

le mawatle le tsotlhe

tse di nyeulang mo go ona.

₃₆Gonne Modimo

o tla pholosa Sione,

o aga metse ya Juta;

ba tla aga teng, ba e rua.

₃₇Boora batlhanka ba ona

ba tla rua boswa teng;

ba ba ratang leina la ona

ba tla aga gona.