DIPESALEME 75

₂Re a go leboga, Modimo,

re a leboga.

Re bitsa leina la gago,

re bolela dikgakgamatso tsa gago.

₃“Fa nako ya me e tsile,

ke atlhola ka tshiamo.

₄Le fa lefatshe le ka tshikinyega

le botlhe ba ba agileng mo go lone,

nna ke tlhomamisitse

maotwana a lone. Sela.

₅Ke reile masilo ka re:

‘Se nneng bosilo,’

le baikepi ka re:

‘Se tsholetseng lonaka.

₆Se tsholeletseng lonaka lwa lona

kwa godimo;

se bueng tsa matepe,

lo gagamaditse melala.’ ”

₇Gonne katlholo

ga e tswe kwa botlhabatsatsi

le e seng kwa bophirimatsatsi

le e seng kwa sekakeng sa dithaba,

₈mme moatlhodi ke Modimo,

o kokobetsa yo, o godisa yole.

₉Gonne mo seatleng sa Morena

go senwelo sa weine e e fufulang,

e tletse ditswaiso,

mme o nosa ka sona;

ee, baikepi botlhe ba lefatshe

ba tla gôpa magorugoru a sona,

ba a nwa.

₁₀Mme nna ke tla bolela

ka bosakhutleng,

ke opelela Modimo wa ga Jakobe

o o rileng:

₁₁“Ke tla kgaola dinaka tsotlhe

tsa baikepi;

dinaka tsa basiami tsona

di tla tsholediwa.”