SIRAKA 10

₁Molaodi yo o botlhale o tlaa gagamaletsa batho ba gagwe letsogo, mme mmuso wa motho yo o tlhoko o tsamaya sentle.

₂Magosana a molaodi a tlaa tšhwana nae, baagi ba motse wa mmusi mongwe ba tšhwana nae.

₃Kgosi e e godisitšweng mašwe e senyaka batho ba yone, tšwelelo-pele ya motse e tšwa mo tlhaloganyong ya baeteledi-pele ba one.

₄Mmuso wa lefatshe o mo diatleng tsa Morena, ke ene yo o le tlhomelang motho yo o tlhomameng ka nako e e siameng gore a le laole.

₅Tšwelelo-pele ya motho e mo diatleng tsa Morena, ke ene yo o nayang ramelao tlotlo.

₆O se ka wa galefela mokaulengwe wa gago ka ntlha ya kgopiso nngwe le nngwe, mme O se ka wa laolwa ke maikutlo a gago a a sa siamang.

₇Boikgogomoso bo tlhoilwe ke Modimo le motho, mme tshiamololo e ilwa ke bone boobabedi.

₈Bogosi bo tšwa mo setšhabeng sengwe bo tsene mo go se sengwe ka ntlha ya tshiamololo, boikgogomoso le madi.

₉Motho yo tota e leng lerole le melora fela o ka ikgogomosa ka eng? Le fa a sa ntse a tshela mateng a gagwe a ferosa sebete.

₁₀Bolwetsi jo boleele bo tsietsa ngaka; kgosi e teng gompieno, ka moso ke setopo.

₁₁Fa motho a šwa bošwa jwa gagwe ke digagabi, dibatana tsa naga, diboko.

₁₂Tshimologo ya boikgogomoso jwa motho ke go hularela Morena, le go tlosa pelo mo Mmoping wa gagwe.

₁₃Gonne tshimologo ya boikgogomoso ke sebe, botlhe ba ba se kgomarelang ba elela bosula. Ke gone ka moo Morena a ba otlhaileng thata. A ba nyeletsa.

₁₄Morena o ne a diga babusi mo ditilong tsa bone tsa bogosi, mme a baya baikokobetsi mo go tsone.

₁₅Morena o ne a kumola baikgogomosi ka medi, mme a tlhoma baikokobetsi mo maemong a bone.

₁₆Morena o ne a fedisa mafatshe a baheitane, mme a a figitlhetsa mo metheong ya lefatshe.

₁₇O ne a tsaya bangwe ba bone mme a ba bolaya. A dira gore ba se ka ba tlhola ba gakologelwa mo lefatsheng.

₁₈Boikgogomoso ga bo a bopelwa batho, bogale jo bo tukang le jone ga bo a bopelwa ba ba tsetšweng ke mosadi.

₁₉Setšhaba se se tšhwanetseng go tlotliwa ke sefe? Ke setšhaba sa batho. Setšhaba se se tšhwanetseng go tlotliwa ke sefe? Ke ba ba boifang Morena. Setšhaba se se tšhwanetseng go nyadiwa ke sefe? Ke ba ba tlolang ditaolo.

₂₀Mo gare ga bakaulengwe yo o tšhwanetseng go tlotliwa ke moeteledipele wa bone; mme fa pele ga Morena ba ba tšhwanetseng go tlotliwa ke ba ba mmoifang.

₂₁Go boifa Morena ke tshimologo ya go amogelesega, fela botlhogo-e-thata le boikgogomoso ke tshimologo ya go ganwa.

₂₂A bahumi, magosana, le bahumanegi ba ipelafatse ka go boifa Morena.

₂₃Ga go a siama go nyatsa mohumanegi yo o botlhale; le gone ga go a siama go tlotla motho yo e leng moleofi.

₂₄Mmusi, molaodi, motho yo o tšhwaretšweng kwa godimo, batho ba botlhe ba tšhwanetse go tlotliwa. Fela ga go na ope wa bone yo mogolo go feta motho yo o boifang Morena.

₂₅Batho ba e seng makgoba ba tlaa direla lekgoba le le botlhale, mme motho yo o nang le tlhaloganyo ga a kitla a se ngongoregela.

₂₆O se ka wa leka go supa botlhale jwa gago fa O dira tiro ya gago, le gone O se ka wa thetha O le mo mathateng.

₂₇Go botoka motho yo o itirelang a bo a na le dilo tse dintsi, go na le motho yo o tsamayang a ipoka mme a se na dijo.

₂₈Morwaaka, O ikaye ka boikokobetso, mme O ineye tlotlo e e tšhwanetseng se O leng sone.

₂₉Ke mang yo o ka reng motho yo o itlontlololang o dira sentle? le gone ke mang yo o ka tlotlang motho yo ene a inyatsang?

₃₀Mohumanegi o tlotlelwa botlhale jwa gagwe, Mme mohumi ene o tlotlelwa khumo ya gagwe.

₃₁Fa motho a tlotliwa a humanegile, kana ruri fa a humile gone! Fa motho a sa tlotliwe a humile, kana ruri fa a humanegile gone!