SIRAKA 16

₁O se ka wa bo wa eletsa go nna le bana ba bantsi ba ba se nang thuso, mme O se ka wa itumelela bomorwao ba ba ikepileng.

₂Le fa O ka nna le ba le bantsi jang, O se ka wa bo wa ba itumelela, fa e se fela poifo ya Morena e le mo go bone.

₃O se ka wa ikanya go tshela nako e telele ga bone, kgotsa wa ikaega ka nako e e tlang ya bone; gonne go botoka go nna le ngwana a le mongwe fela go na le go nna le ba le sekete. Go botoka go šwa O se na bana go na le go šwa O na le bana ba ba ikepileng.

₄Motho a le mongwe fela yo o nang le tlhaloganyo o ka tlatsa motse ka batho. Fela morafe wa batho ba ba se nang molao o tla nyelediwa.

₅Matlho a me a bonye dilo di le dintsi tse di ntseng jalo, mme ditsebe tsa me di utlwile dilo tse di lemosegang go feta tse.

₆Molelo o tlaa tshubiwa mo setlhopheng sa baleofi, kgalefo e ne ya tshubiwa mo setšhabeng se se neng se sa utlwe.

₇Modimo ga o a ka wa itšhwarela bomokaloba ba bogologolo, ba e rileng ba ikantse thata ya bone, ba o rukutlhela.

₈Ga o a ka wa rekegela batho ba Lote o neng a tshela nabo, ba o neng o ba ila ka ntlha ya boikgantsho jwa bone.

₉O ne wa se ka wa tlhomogela batho ba ba neng ba atlholetšwe tshenyego pelo, ba ba neng ba nyelediwa mo dibeng tsa bone.

₁₀Kgotsa batho ba ba 600 000 ba ba neng ba tsamaya ka dinao, ba e rileng mo botlhogo-e-thateng jwa bone, ba koloaganela borukutlhi.

₁₁Le fa go ka bo go ne go na le motho a le mongwe fela yo o tlhogo-e-thata go ka bo go ne go gakgamatsa fa a ne a ka bo a falotse kotlhao, ka Morena a na le boutlwelo-botlhoko le kgalefo ka go tšhwana, yo o nang le thata ya go itšhwarela le go galefela.

₁₂Boutlwelo-botlhoko jwa gagwe bo bogolo, fela bosetlhogo jwa gagwe le jone bo bogolo jalo. O atlhola mongwe le mongwe kafa ditiro tsa gagwe di tšhwanelwang ka teng:

₁₃Moleofi ga a na go falola dithopo tsa gagwe, boitshoko jwa mosiami le jone ga bo na go tlhoka tuelo.

₁₄O taolosa boutlwelo-botlhoko jwa gagwe; le fa go ntse jalo mongwe le mongwe o tlaa tšhwarwa fela jaaka ditiro tsa gagwe di tšhwanelwa.

₁₅Modimo o ne wa dira Faro tlhogo-e-thata yo o neng a se ka a o itse; gore ditiro tsa one di tle di itsiwe ka fa tlase ga legodimo.

₁₆Boutlwelo-botlhoko jwa one bo itshenolela dibopiwa tsotlhe, wa kgaoganya batho lesedi la one le lefifi la one.

₁₇O se ka wa bo wa re, “Ke tlaa iphitlhela Morena. Ke mang yo o tlaa nkgakologelwang kwa godimo kwa? Ga nkake ka bo ka lemogwa mo gare ga batho ba bantsi jaana, le gone ke a be ke le eng mo dibopiweng tse dintsintsi jaana?”

₁₈A ko O bone tlhe, loapi le magodimo a a ka kwa godimo ga lowapi, botengteng le lefatshe, tsotlhe tse di a roroma fa a tla.

₁₉Dithaba le mothao wa lefatshe di a reketla, di rorome fa a di leba fela.

₂₀Fela ke mang yo o ikopisang tlhogo ka dilo tse di ntseng jaana? Ke mang yo o lekang go tlhaloganya ka mo a tsamayang ka teng?

₂₁Phefo ya matsubutsubu ka boyone ga e bonale, ditiro tse dintsi tsa gagwe ga di lemogwe ke ope.

₂₂“Ke mang yo o bolelang gore tshiamo e dirilwe mo ditirong tsa gagwe? Kgotsa, ke mang yo o e solofetseng? Kgolagano e sa le kgakala.”

₂₃Dilo tse di ntseng jaana ke tse di akanngwang ke motho yo o tlhaloganyo e e bokoa, Motho yo o atlho-atlholang fela, yo o timeditšweng ke go rata dikakanyonyana tsa gagwe tse di sa reng ee.

₂₄Ntheetse, morwaaka, mme O nne le kitso, mme O reetse mafoko a me ka moya wa gago otlhe.

₂₅Ke tlaa ruta ka tekanyo e e siameng, mme ke neye kitso ka maatlametlo.

₂₆E rile Modimo o bopa ditiro tsa one mo tshimologong wa di aba ka maemo a tsone ka bonako di sena go dirwa.

₂₇Wa rulaganya ditiro tsa one ka thulaganyo e e sa khutleng, go tšwa mo tshimologong ya tsone go ya kwa malatsing a a neng a sa ntse a tlaa nna a tla. Ga di nke di bolawa ke tlala kgotsa di lapa, mme ga di nke di tlogela ditiro tse di tšhwanetseng go di dira.

₂₈Ga di nke di nna di kgorometsana, ga di kitla di tlhoka go utlwa lentšwe la one.

₂₉Mme e rile morago Modimo wa leba lefatshe, mme wa le tlatsa dilo tse di molemo.

₃₀A le khurumetsa ka mofuta mongwe le mongwe wa ditshedi, mme di tlaa bo di boele mo go lone.