SIRAKA 22

₁Setshwakga se tšhwana le leje le le tletseng lešwe le malele, mongwe le mongwe o leletsa go tlhabisa ditlhong ga gagwe molodi.

₂Setshwakga se tšhwana le mokoa wa boloko jo motho o a reng a bo tabotse ka seatla a bo a bo iphimola.

₃Ke mašwabi go na le ngwana wa mosimane yo o se nang maitseo, mme go na le ngwana wa mosetsana ke go latlhegelwa.

₄Ngwana wa mosetsana yo o nang le tlhaloganyo ke letlotlo mo monneng, fela yo o se nang ditlhong ene o utlwisa rraagwe botlhoko.

₅Ngwana wa mosetsana yo o makgakga o tlhabisa rraagwe le mmaagwe ditlhong, mme boobabedi ba tla mo itatola ka lonyatso.

₆Go omanya ngwana ka nako e e sa siamang go tšhwana le go opela pina ya setapa kwa phitlhong. Fela go otlhaya le go tšhwaya phoso gone ke botlhale jwa malatsi otlhe.

₇Bana ba ba tshelang botshelo jo bo siameng, ba sa tlhaele gope, ba lebatsa motho gore batsadi ba bone ba tsetswe e le bo-eseng-mang.

₈Bana ba ba nyatsegang, ba ba makgakga ba ba ikgogomosang ba tlhabisa losika lwa bone lo lo tlotlegang ditlhong.

₉Fa O leka go ruta sematla O tšhwana le motho yo o momaganyang dikgapetla tsa pitsa e e phatlakanyeng kgotsa O tšhwana le motho yo o tsosang motho yo o thulametseng go feta selekanyo.

₁₀Sematla se tšhwana le motho yo o otselang fa O re O se tlhalosetsa sengwe, fa O re O feditse ke gone a reng; “Kana O ntse O bua ka eng?”

₁₁O lelele motho yo o suleng ka gore ga a tlhole a na le lesedi, sematla sone O se lelele gonne ga se na tlhaloganyo. Mošwi ene O mo lelele go le gonnye gonne o mo boikhutsong, fela botshelo jwa sematla bo botlhoko go feta loso.

₁₂Go lelela bašwi go tsaya malatsi a supa, fela go lelela dimatla go tsaya malatsi otlhe a botshelo jwa tsone.

₁₃O se ka wa buisa motho yo o se nang tlhaloganyo thata, mme seramatla sone O se ka wa se atamela. O se tlhokomele e se re kgotsa sa go tsisetsa matšhwenyego, mme ya re ka go amana nao sa go tlogela o tletse lešwe. Se tile mme o tlaa ikhutsa, O sa tenwe ke boramatla jwa sone.

₁₄Ke eng se se bokete go feta loto? Mme leina la sone ke eng fa e se “Seeleele”?

₁₅Go motlhofo go sikara motlhaba le letšwai le mokowa wa tshipi go na le go itshokela seramatla.

₁₆Tlhomeso fa e tanteletšwe mo tlung ga e nke e bofololwa ke tshikinyego ya lefatshe. Go ntse fela jalo: pelo, morago e sena go akanya go dira tshiamo, ga e kitla e gonyela ka nako ya mathata.

₁₇Pelo e e tlhomameng mo kakanyong e e dirilweng ka tlhaloganyo e e siameng, e tshwana le makgabisa a a dirilweng mo lebotaneng le le borethe.

₁₈Pelo ya lesilo e e akanyang maano a bosilo e tšhwana le ditlhaka tsa mošawa kwa majeng tse di sa kakeng tsa itsetsepela mo nakong ya phefo.

₁₉Motho yo o tlhabang leitlho o dira gore le rothise dikeledi, mme yo o tlhabang pelo o dira gore e senole maikutlo a yone.

₂₀Motho yo o kolopang dinonyane ka maje o dira gore di sie, mme yo o kgobotlang tsala o senya botsala.

₂₁Le fa O ka ne O kile wa oma tsala ya gago ka tšhaka, o se ka wa itlhoboga gonne go na le mokgwa wa go itsalanya le ene gape.

₂₂Le fa O ka bua kgatlhanong le tsala ya gago, O se ka wa bo wa tšhwenyega; gonne go itsalanya nae gape go ka nna ga diragala, fela matlhapa, boikgogomoso, go ntsha diphiri, go tlhaba O sa bonwe, dilo tse ke tsone tse tsala nngwe le nngwe e ka siang e di tshaba tse.

₂₃O dire gore mokaulengwe wa gago a go ikanye a sa ntse a humanegile gore e tle e re fa a tla go huma O je khumo ya gagwe monate nae. O mo thuse ka nako ya mathata, gore le wena O tle O nne le seabe sa gago fa a tla go ja bošwa.

₂₄Dithogano di etelela polao pele fela jaaka kgakgamosi le mosi mo sebesong e le dilo tse di etelelang go tuka ga molelo pele.

₂₅Ga nkake ka tlhabisiwa ditlhong ke go sireletsa tsala le gone ga nkake ka e iphitlhela;

₂₆mme le fa bosula bongwe bo ka ntlhagela ka ntlha ya yone, mongwe le mongwe yo o utlwang kaga jone o tlaa itisa mo go yone.

₂₇Kana ruri ke mang yo o tla disang molomo wa me mme a kana molomo wa me ka tlhokomelo, gore ke tle ke se ka ka wa le gore loleme lwa me lo tle lo se ka lwa nnyeletsa?