Diane
1Dilo di tharo tse moya wa me o di itumelelang, mme di itumedisa Modimo le batho; ke tse:
Kutlwano mo gare ga bana ba motho,
botsala mo gare ga bakaulengwe,
go tshela mmogo ka boitumelo ga monna le mosadi.
2Go feta mo go na le mefuta e le meraro ya batho e ke sa e beyeng sebete, batho ba go tshela ga bone go nkgopisang ke ba:
mohumanegi yo o ikgogomosang,
mohumi yo o maaka,
monnamogolo wa seaka yo o se nang tlhaloganyo.
Bannabagolo
3Fa e le gore e rile mo bonyaneng jwa gago wa se ka wa bapala sepe O ka bapala sengwe jang mo botsofeng jwa gago?
4Kana katlholo e e utlwalang mo bathong ba ba thuntseng ke selo se sentle jang, le batho ba ba thuntseng ditedu fa ba itse go gakolola sentle!
5Kana ruri botlhale mo bathong ba batsofe ke selo se sentle jang! le kgakololo e e akantšweng sentle e tšwa mo bathong ba ba tlotlegang.
6Serwalo sa bannabagolo ke bomaitseanape, mme boipelafatso jwa bone ke go boifa Morena.
Diane tsa Dipalo
7Go na le dilo di roba monwana o le mongwefela tse nka di gopolang, tse ke akanyang di le sego: mme sa lesome se jaanong se leng mo lolemeng lwa me ke se: ebong motho yo o itumedisiwang ke bana ba gagwe, motho yo mo botshelong jwa gagwe o bonang baba ba gagwe ba wa.
8Go sego monna yo o agileng mmogo le mosadi yo o nang le tlhaloganyo, ba sa tšhwane le pholo le tonki, fa di golegwa mmogo. Yo o iseng a ke a leofa ka loleme lwa gagwe; yo o sa direleng motho yo o kwa tlase ga gagwe ka maemo.
9Go sego motho yo o setseng a na le tlhaloganyo e e siameng, mme e re a bua go sekegelwe se a se buang tsebe.
10Kana motho yo o setseng a na le botlhale o mogolo jang; fela ga go na ope yo mogolo go feta motho yo o boifang Morena.
11Go boifa Morena go gaisa sengwe le sengwe; ke mang yo o ka tshwantsiwang le motho yo o ikakatletseng ka gone?
12Go boifa Morena ke go simolola go mo rata, fela motho o simolola go mo kgomarela ka tumelo.
13Motho o ka nna le ntho nngwe le nngwe, fela e seng ntho ya pelo. Motho o ka nna a direlwa bosula bongwe le bongwe, fela a se ka a direlwa bosula ke mosadi!
14Motho o ka nna a tlhaselwa, fela a se ka a tlhaselwa ke mmaba! A batho ba nne ba ipusolosetse mo go ene, fela go se ka ga ipusolosetsa batlhabantshi ba gagwe mo go ene.
15Ga go na botlhole bope jo bo kotsi go feta botlhole jwa noga, ga go na kgalefo epe e e bosula go feta kgalefo ya mosadi.
16Ke ka mpa ka nna le tau le kgogela go na le go nna le mosadi yo o bosula.
17Bosula jwa mosadi bo fetola sebopego sa gagwe, mme bo ntshofatsa sefatlhogo sa gagwe gore se tšhwane le sa senonnori.
18Fa monna wa gagwe a tšwa a ya go ja le bakaulengwe ba gagwe ga a nke a tlhoka go fegelwa botlhoko.
19Ga go na bosula bope jo bo ka tšhwantshiwang le bosula jwa mosadi; a a welwe ke bomadimabe jo bo tleng bo wele moleofi!
20Monna yo o nnang a itidimaletse o utlwalelwa ke mosadi yo o balabalang. fela jaaka go tlhatloga thabana e e motlhaba go utlwalela dinao tsa motsofe.
21O seka wa bo wa gapiwa pelo ke bontle jwa mosadi; O se ka wa bo wa tlhakanngwa ke mosadi tlhogo.
22Gongwe le gongwe mo mosadi e leng ene a otlang monna go a bo go ntse go na le dikomano, makgakga le matlhabisa-ditlhong.
23Go kgobega marapo, sefatlhogo se se tlhontseng, pelo e utlwileng botlhoko, dilo tse tsotlhe ke tse di dirwang ke mosadi yo o bosula. Diatla tse di lepeletseng le mangole a a kgwetlhang tseo ke dilo tse di bontshang gore mosadi o tlhorontshitse monna wa gagwe.
24Mosadi ke ene he, yo sebe se simologileng ka ene, mme ke ene yo ka ntlha ya gagwe rotlhe re šwang.
25O se ka wa dumelela metsi gore a dutle; Mosadi le ene O se ka wa bo wa mo dumelela gore a nne a ipuapuele fela.
26Fa a gana go dira jaaka O mmolela, O gane go kopana nae.
