Go boifa Modimo ka Nako ya Mathata
1Morwaaka, fa O ikaeletse go direla Morena O ipaakanyetse mathata, 2O nne pelontle, O nne pelokgale, mme O se ka wa tshogaka fa bomadimabe bongwe bo go tlhagela.
3O mo kgomarele mme O se ka wa bo wa mo tlogela, gore O tle O tlotliwe mo bofelong jwa botshelo jwa gago.
4O amogele sengwe le sengwe se se go tlhagelang, mme mo ditiragalong tse di sa tlhomamisegeng tsa maemo a gago a a kwa tlase, O itshoke, 5gonne gouta e lekiwa mo molelong, mme batho ba ba tlhophilweng bone mo sebesong sa go kokobediwa.
6O mo ikanye mme o tlaa go thusa, O tsamaye O tlhamaletse, mme O solofele sengwe mo go ene.
7Lona ba lo boifang Morena, emelang boutlwelo-botlhoko jwa gagwe, lo se ka lwa fapoga e se re kgotsa lwa wa.
8Lona ba lo boifang Morena, mo ikanyeng, mme ga lo kitla lo tlhaelwa ke tuelo.
9Lona ba lo boifang Morena, solofelang dilo tse di molemo, solofelang boitumelo le boutlwelo-botlhoko jo bo sa feleng.
10Akanyang dikokomana tsa bogologolo mme lo bone; ke mang yo o kileng a ikanya Morena mme a šwabisiwa? Kgotsa ke mang yo o kileng a itshokela go mmoifa mme a latlhega? Kgotsa ke mang yo o kileng a ka mmitsa mme a tlhokomologwa fela?
11Gonne Morena o pelotlhomogi e bile o boutlwelo-botlhoko. O itšhwarela dibe mme mo malatsing a khutsafalo o a boloka.
12Go madimabe ba ba pelo di tshogakileng, le ba ba diatla di phapharatlhanyang, le moleofi yo o tsamayang ditsela tse di mafaratlhatlha!
13Go madimabe ba ba pelo di roromakang di se na tumelo, gonne ba ba ntseng jalo ga ba na go sirelediwa!
14Go madimabe lona ba lo latlhileng moya wa boitshoko! Lo tlaa dirang fa Morena a tla go lo otlhaya?
15Botlhe ba ba boifang Morena ga ba nyatse mafoko a gagwe. Mme botlhe ba ba mo ratang ba tsamaya mo ditseleng tsa gagwe.
16Botlhe ba ba boifang Morena ba leka ka natla go mo itumedisa, mme botlhe ba ba mo ratang ba itumedisiwa ke molao wa gagwe.
17Botlhe ba ba boifang Morena ba ipaakanya dipelo mme ba ikokobetse fa pele ga gagwe.
18A re itigeleng mo diatleng tsa Morena, e seng mo diatleng tsa batho, gonne boutlwelo-botlhoko jwa gagwe bo tshwana le borena jwa gagwe.
