SIRAKA 30

₁Motho yo o ratang morwawe o tlhola a mmeditse, gore e tle e re dingwageng tse di tlang morwawe e nne mogomotsi wa gagwe.

₂Motho yo o gagamaletsang morwawe letsogo o tlaa boelwa thata, a bo a nne a ikgantshe ka ene mo go ba a itsanyeng nabo.

₃Motho yo o rutang morwawe o tšwelwa pelo ka mmaba wa gagwe, le gone o tla ipoka ka ene mo gare ga ditsala tsa gagwe.

₄Lefa rraagwe a šwa go itšhwanela fela le fa a ntse a sa šwa gonne o tlogela setšhwano sa gagwe.

₅Fa a ntse a tshela o ne a itumedisiwa ke go nna nae; fa a šwa, ga a na ditlhobaelo dipe.

₆O tlogela mongwe yo o tla salang a mo otlhaela baba, le yo o tla salang a duelela ditsala dithuso tsa bone.

₇Motho yo o tlhokomelang morwawe go feta selekanyo o tlaa iphapela dintho, o tlaa garolwa pelo ke mogoonyana mongwe le mongwe.

₈Pitse e e sa katisiwang sentle e nna mongala, ngwana wa mosimane yo o sa laolwang sentle o nna tlhogo e thata.

₉O nne O tlakise ngwana wa gago mme o tlaa go tshosa. O nne O tshameke nae, o tlaa go utlwisa botlhoko.

₁₀O se ka wa nna wa tshegatshega nae, fa O sa batle go utlwa botlhoko nae, mme wa felela O tsikitlanya meno.

₁₁O se ka wa bo wa mo dumelela go itaola a sa ntse a le monnye, le gone fa a dira phoso, O se ka wa ipudulatsa.

₁₂O mo obe molala a sa ntse a le monnye, O mo kitle dikgopo tse e sa ntse e le ngwana, e seng jalo o tlaa nna tlhogo-e-thata, a bo a tlhoka ditsebe, a feletsa ka go go utlwisa botlhoko thata.

₁₃O tšhware morwao ka thata, mme O nne O tšwele pele go mo tshwara jalo. gore O tle O se ka wa hutsafadiwa ke makgakga a gagwe.

₁₄Mohumanegi yo o itekanetseng a kwenne sentle mo mmeleng o botoka go na le mohumi yo o tlholang mo ditlhabing tsa mmele.

₁₅Go itekanela le go kwena go botoka go na le gouta nngwe le ngwe; mmele o o tiileng sentle o botoka go na le khumo e e se nang tekanyo.

₁₆Ga go na khumo epe e e fetang boitekanelo, ga go na boipelo bope jo bo monate go feta pelo e e itumetseng.

₁₇Go botoka go šwa go na le go tshela botshelo jo bo tlhomolang pelo, boikhutso jo bo sa khutleng le jone bo botoka go na le bolwetsi jo bo sa alafesegeng.

₁₈Dilo tse di molemo tse di goromeleditšweng molomo o o momilweng di tšhwana le dijo tse di beiwang fa godimo ga lebitla.

₁₉Neelo e thusang fa e abelwa modimo wa disetwa, o o ka se kang wa ja kgotsa wa dupa? Kana ruri O ka tlhalosa jang motho yo o lateletsweng ke Morena yo o sa itumelang?

₂₀O gototse matlho fela a fegelwa jaaka motho yo o dirilweng moopa e a re a tlamparetse kgarebane a fegelwe.

₂₁O se ka wa ineela kutlobotlhoko, O se ka wa ikhutsafatsa ka go akanyetsa ruri.

₂₂Boitumelo jwa pelo ke botshelo mo mothong, boipelo ke jone bo dirang gore a tshele malatsi a mantsi.

₂₃Itumedise moya wa gago, O gomotse pelo ya gago. O kobele kutlobotlhoko kgakala; gonne kutlobotlhoko e bolaile batho ba bantsi, le gone ga e thuse ope ka sepe.

₂₄Lefufa le bogale di go khutšhwafaletsa malatsi, mme go tlhobaela go tsofatsa ka bonako.

₂₅Pelo e e nnang e thamile e dira motho seji, motho yo o solang dijo tsa gagwe molemo.