SIRAKA 33

₁Ga go na bosula jo bo ka welang motho yo o boifang Morena; o tlaa nna a mo namola gangwe le gape mo mathateng a gagwe.

₂Motho yo o tlhoileng Molao ga a botlhale, fa a o tshegetsa ka boitimokanyo o tšhwana le sekepe fa go le sefefo.

₃Motho yo o nang le tlhaloganyo o ikanya Molao; mme o tlaa fitlhela gore Molao o ikanyega fela jaaka tshenolo.

₄O baakanye se O tšhwanetseng go se bua mme O tlaa utlwiwa sentle. O rulaganye dikitsiso tsa gago sentle pele ga O araba.

₅Maikutlo a seeleele a tšhwana le leotwana la kara; kakanyo ya gagwe e dikologa jaaka sedikolosa-leoto.

₆Tsala e e sotlang e tshwana le pitse e e palesitseng, e lela fela, a e pagangwe ke mang kgotsa mang.

₇Ke eng letsatsi lengwe le le botoka go na le le lengwe ka lesedi la malatsi otlhe a ngwaga le tšwa mo letsatsing?

₈A farologantšwe mo tlhaloganyong ya Morena, ke ene yo o dirileng gore dipaka le meletlo di se ka tsa tšhwana.

₉Malatsi mangwe O a dirile gore e nne malatsi a magolo le a a itshepisitšweng go feta a mangwe, a mangwe a a dira malatsi fela.

₁₀Batho botlhe ba tšwa mo mmung, Atame ka boene o bopilwe ka mmu.

₁₁Morena ka botlhale jwa gagwe jo bo tletseng o dirile gore ba fapaane a bo a fapaanya le mekgwa ya bone.

₁₂Bangwe o ba tshegofaditse a bo a ba dira batho ba botlhokwa, mme ba bangwe a ba tshegofatsa, a ba ikatametsa. Ba bangwe a ba hutsa, a ba kokobetsa ka go ba folosa mo maemong a bone.

₁₃Batho mo diatleng tsa Modiri wa bone ba tšhwana le mmopa mo diatleng tsa mmopi wa dijana yo o bopang ka fa a utlwang a rata ka teng. O ba duela ka mo a bonang go tšhwanela ka teng.

₁₄Tshiamo e fapaanye le bosula. Botshelo bo fapaanye le loso. Ka mokgwa o o ntseng jalo mosiami o fapaanye le moikepi.

₁₅Ditiro tsa Mogodimodimo di tšhwanetse go lebiwa fela jaana; di tsamaya sebedi-sebedi, nngwe e fapaanye le e nngwe.

₁₆Le nna ke ne ka nna wa bofelo go lebelela; ke ne ka tšhwana le yo o tlang go sela, bafudi ba moretlwa ba sena go fula.

₁₇Ka tshegofatso ya Morena ke tsile pele, mme jaaka mofudi, ka tlatsa botlhotlhelo jwa mofine.

₁₈Lo lemogeng gore ga go a itirela nna ke le nosi fela, ke diretse botlhe ba ba batlang thuto.

₁₉Lo ko lo ntheetseng, lona magosana a batho, lona baeteledipele ba phuthego, lo ntshekegeleng tsebe.

₂₀E se ka ya bo ya re O sa ntse o tshela wa dumelela gore morwao kgotsa mosadi wa gago, kgotsa bomorwarrago kgotsa tsala ya gago a go laole. Le gone O se ka wa fa ope dilo tsa gago, e se re gongwe, wa tloga wa go ikwatlhaela, wa bo wa kopa gore O di busediwe.

₂₁Fa fela O sa ntse O tshela mme moya wa gago o sa ntse o le mo mmeleng wa gago, O se ka wa bo wa neela ope thata ya go laola boemong jwa gago, ₂₂gonne go botoka gore bana ba gago ba kope mo go wena go na le gore wena o lebelele gore bomorwao ba nne ba go fe.

₂₃O nne O laole mo go tsotlhe tse O di dirang, O se ka wa senya tlotlo e e leng ya gago ka tšhwanelo.

₂₄Letsatsi le botshelo jwa gago bo gogelang mafelelong ka lone, fa loso lo go atamela, ke yone nako e O ka nnang wa aba bošwa jwa gago ka yone.

₂₅Bojang jo bo segilweng, thobane le mokgweleo: tse ke tsa tonki; dijo, thuto le tiro ke tsa motlhanka.

₂₆O dirise motlhanka wa gago thata, mme O tlaa nna le kagiso mo moyeng. Fa O mo tlogela a lepeletse mabogo fela, o tlaa simolola go akanya kaga kgololesego ya gagwe.

₂₇Jokwe le tomo di oba molala, sefala le tshokeletso di oba lekgoba le le molato.

₂₈O mo neye tiro, e seng jalo o tlaa tshwakgafala; botshwakga bo ruta mefuta yotlhe ya bolotsana.

₂₉O mo tšhwarelele mo ditirong tse a tšhwanetseng go di dira mo a tšhwanetseng go nna teng, fa a gana go go utlwa O mo tladimole mo ditshiping.

₃₀Fela O se ka wa bo wa imela ope mme O se ka wa dira sepe kgatlhanong le tshiamo.

₃₁A O na le lekgoba le le lengwefela? O le tšhware sentle, fela jaaka O itšhwara, gonne o mmonye ka madi.

₃₂A O na le lekgoba le le lengwefela? O le tšhware sentle, ka O le tlhoka fela jaaka O itlhoka.

₃₃Fa O le tšhwara mašwe le be le sia, O tla ya ntlha efe go ya go le batla?