SIRAKA 43

₁Boikgantsho jwa magodimo ke loapi lo lo phatsimang; loapi lo tlhaga ka ponalo e e galalelang.

₂Fa letsatsi le tlhaba le buela godimo mme fa le ntse le tlhatloga, le re, “Selo se se gakgamatsang ke tiro ya Mogodimodimo.”

₃Fa le le kwa godimodimo le babola lefatshe; ke mang yo o ka itshokelang go tuka ga lone?

₄Motho o futswela sebesetso gore a tle a ntshe mogote mongwe; fela letsatsi le tshuba dithaba gararo go feta mogote o, le kgwa moya o o molelo, mme le kalola matlho ka marang a lone a a phatshimang.

₅Ruri o mogolo Morena yo o le dirileng, yo lentšwe la gagwe le le itlhaganisang mo tseleng ya lone.

₆A bo a dira kgwedi, e e tlholang e tla ka nako, go supa dikgwedi le go kgaoganya nako.

₇Ke kgwedi e e kayang meletlo, sebonesi se se ngotlegang se sena go tlala.

₈Kgwedi e teeletswe yone; e oketsega ka mokgwa o o gakgamatsang mo diponalong tsa yone. Ke sekgele sa bontsintsi jo bo kwa godimo jwa dinaledi, se phatsima mo loaping.

₉Kgalalelo ya dinaledi e ntlafatsa loapi: mokgabiso o montlentle wa magodimo a Morena.

₁₀Ka lentswe la Yo o Boitshepo di ema jaaka a laela, ga di nke di be di itsemeletsa mo tebelelong ya tsone.

₁₁Bona mola wa godimo mme O boke Modiri wa one; o montle thata mo go phatsimeng ga one.

₁₂O dikologa loapi ka sedikadike se se galalelang, diatla tsa Mogodimodimo e le tsone tse di o thadileng.

₁₃Taelo ya gagwe e romela kapoko; o laela gore dikgadima di lakasele ka bonako.

₁₄Ka mokgwa o o tšhwanang, matlo a gagwe a polokelo a a bulega mme maru a betsege jaaka dinonyane.

₁₅Ka nonofo ya gagwe e kgolo o kgobokanya maru, a bo a a kumaganya a a dira dikgolokwenyana tsa sefako.

₁₆Fa a tlhaga dithaba di a roroma. Phefo ya borwa e foka ka go rata ga gagwe.

₁₇Lentswe la go duma ga gagwe le khidia lefatshe; sefefo sa bokone le setsuatsuwe le sone se dira jalo. O gasa kapoko jaaka dinonyane di fologa, mme e we jaaka tsie e lala.

₁₈Leitlho le kgatlhwa ke bontle jwa bošweu ja yone, mme fa e wa e akabatsa mogopolo.

₁₉O tshela kgogotšhwane mo lefatshing jaaka letšwai, mme fa e gatsela e nna motsu jaaka mitlwa.

₂₀Phefo e e tsiditsana ya bokone e a foka, mme metsi a gatsele; mme e re a gatsetse jaana, a ikale mo godimo ga megobe yotlhe, mme metsi a a sa gatselang a apare metsi a a gatsetseng ao jaaka lotlatla lwa sehuba.

₂₁O metsa dithaba mme a babole sekaka, a tshube dimedi jaaka molelo.

₂₂Fela mouwane o fodise dilo tsotlhe ka bonako; morago ga mogote go monyo o o ntšhafatsang.

₂₃Ka botlhale jwa gagwe o katisitse botengteng, a tlhoma ditlhaketlhake mo go jone.

₂₄Ba-tsamaya ka dikepe mo lewatleng ba bolela diphatsa tsa jone, mme dipolelo tsa bone di re akabatse fa re di utlwa.

₂₅Gonne moo le gone go na le ditiro tse di sa tlwaelesegang le tse di gakgamatsang, diphologolo tsa mofuta mongwe le mongwe le dibopiwa tse dikgolo tsa lewatle.

₂₆Ka ntlha ya gagwe gotlhe go felela sentle, mme ka lentšwe la gagwe dilo tsotlhe di nna di tshwaraganye.

₂₇Re ka bolela dilo di le dintsi mme re fitlhela re ntse re tlhaela. Gotlhe mo re go rayang ke gore “O Gotlhe.”

₂₈Re tlaa bona kae thata e e lekanyeng go mo galaletsa? Ke Ene yo Mogolo, go feta ditiro tsa gagwe tsotlhe.

₂₉O a boitshega, Morena, mme o mogolo thata-thata, mme ka thata ya gagwe o a gakgamatsa.

₃₀Godisang Morena ka maboko, mme le fa lo ka bo lwa mo godisa jang, o tla nna a feta moo. Lo itekeng ka thata ya lona yotlhe fa lo mo godisa lo sa lape, mme ga lo kake lwa bo lwa mmoka ka mokgwa o o lekanyeng.

₃₁Ke mang yo o kileng a mmona mme a bo a ka mo rarabolola? Ke mang yo o ka mo galaletsang jaaka a tshwanetse go galalediwa?

₃₂Difeta-tlhaloganyo tse dingwe di sa ntse di le gone tse dikgolo tota le go feta tse; gonne re bonye ditiro dingwe di se kae fela tsa gagwe.

₃₃Mme Morena ke ene yo o dirileng dilo tse tsotlhe, a naya basiami botlhale.