SIRAKA 45

₁Ka ene o ne a dira monna yo o pelotšhweu, yo batho botlhe ba neng ba mmona a le molemo, a ratwa ke Modimo le batho: Moše, yo o gakologelwang ka tlotlo.

₂O ne a mo naya tlotlo e e lekanang le ya baitshepi mme a mo thatafatsa mo e bileng a ne a tshabiwa ke baba ba gagwe.

₃Ka lefoko la ga Moše o ne a emisa ditshupo tse di gakgamatsang, a mo tlotla fa pele ga dikgosi. A mo neela melao go e isetsa batho ba gagwe, mme a mmontsha kgalalelo ya gagwe.

₄O ne a mo itshepisa ka ntlha ya boikanyego le bonolo jwa gagwe mme a tlhopa ene fela gare ga batho botlhe.

₅O ne a mo utlwisa lentšwe la gagwe, mme a mo tsenya mo lefifing. A mo naya melao ba lebaganye, molao wa botshelo le kitso go ruta Jakobe dikatlholo tsa gagwe le Iseraele ditshupo tsa gagwe.

₆A godisa Arone, mogoloa Moše, motho yo o boitshepo jaaka monnawe, wa morafe wa ga Lefi; ₇O ne a dira kgolagano e e sa khutleng nae, mme a mo naya boprista jwa batho. A mo kgabisa ka purapura ya bontle; ₈a mo apesa seaparo se se galalelang, a mo gatlha ka boitshepo mme a mo naya dikai tsa thata ya go busa; ebong diputlela, purapura e telele, sekhutlana.

₉A mo naya digaranate gore a gatlhe purapura ka tsone le ditshipi tsa gouta gore di nne di lele fa a ntse a tsamaya, gore modumo wa tsone o utlwale mo Tempeleng go gakolola bana ba batho ba gagwe; ₁₀le seaparo se se boitshepo sa mmala wa gouta le bohibidu jo bo mokgona le mmala o mmududu le o mohibidu, tiro ya mokgabisi yo o rokelelang makgabisa; letlatla la sehuba la katlholo, Urima le Thummina, la mmala o o bohibidu jo bo nang le bobududunyana, o logilwe e le tiro ya motho yo o e rutilweng; ₁₁le majana a mantlenyana a botlhokwa a betlilwe jaaka dikano, a tlhometšwe mo setsheng sa gouta, e le tiro ya mmetli wa majana a mantle: ka ditlhaka tse di neng di segetšwe mo teng e ne e le segopotso sa palo ya merafe ya Iseraele: ₁₂le tlhoro ya gouta mo tukwing, e kwaletšwe ka sekano mafoko a a reng: “Boitshepelo Morena”, le yone e le mokgabiso o montle thata, tiro e e matsetseleko, mokgabiso o o jesang matlho monate.

₁₃Pele ga gagwe go ne go ise go ke go nne le dilo tse dintle jaana le gone go ne go se na ope kwa ntle ga gagwe yo o neng a kile a di apara, fa e se bomorwawe fela, le lotso lwa gagwe ka metlha yotlhe.

₁₄Ditshupelo tsa gagwe di ne di tšhwanetse go fisiwa gotlhelele gabedi ka letsatsi ka metlha yotlhe.

₁₅Moše o ne a mo itshepisetsa Modimo, mme a mo tlotsa ka lookwane lo lo boitshepo. Se ya nna kgolagano e e sa khutleng mo go ene le lotso lwa gagwe fa magodimo a ntse a le teng, o ne a tšhwanetse go goga mo tirelong-Modimo, a dira jalo e le moprista, a bo a tshegofatse batho ba gaabo ka leina la Morena,

₁₆yo o neng a mo tlhopile mo batsheding botlhe go ntshetsa Morena tshupelo, insense le monkgo wa kagisanyo e le segopotso sa go direla batho tuelelo.

₁₇O ne a baya melao mo matsogong a gagwe; A mo neela ditaolo tsa Molao, go ruta Jakobe ditshupo tsa gagwe, le go tlhalosetsa Iseraele Molao.

₁₈Bangwe e ne e le dirukhutlhi mo go ene, ba mo fufegela mo nageng, ebong Dathane le Abiram le banna ba bone, e leng Kora le lekoko la gagwe ka kgalefo le kgakalo.

₁₉Morena a bona selo se, mme a se ka a itumela. Bogale jwa gagwe jo bo tukang jwa ba nyeletsa. Ka ditiro tse di gakgamatsang a ba gamaregisa, mme ka molelo o o tukang a ba feleletsa.

₂₀A oketsa kgalalelo ya ga Arone, mme a mo naya boswa. A mo abela mabutswa-pele a mantle, mme a mmaakanyetsa dinkgwe tsa tshupo tse dintsi pele ga ba bangwe botlhe.

₂₁Ke gone ka moo ba jang ditshupelo tse Morena a neng a di mo fa, ene le lotso lwa gagwe.

₂₂Fela ga a je boswa jwa sepe sa lefatshe la batho. Ke ene fela mo gare ga batho botlhe yo o se nang seabe. Morena ke ene seabe le boswa jwa gagwe.

₂₃Phinehase morwa Eleasare ke ene wa boraro mo tlotlong ka ntlha ya go tlhwaafalela go boifa Morena ga gagwe, ka gore o ne a itsetsepela fa batho ba ne ba tsosa mokubukubu. A ema ka bopelotshetlha le bopelokgale. Mme ka mokgwa o a direla Iseraele tuelelo.

₂₄Ke gone ka mo kgolagano e neng ya tlhomiwa le ene, ya mo dira molaodi wa felo ga boitshepo le batho, ya mmapalela botlotlegi jwa boprista jo bogolo ka bosafeleng, ene le lotso lwa gagwe.

₂₅Gape go ne go na le kgolagano le Dafita morwa Jesse wa morafe wa ga Juta; boswa jwa kgosi bo tšwa mo ngwaneng yo mongwe bo ya kwa go yo mongwe a le esi fela. Fela bošwa jwa ga Arone bo fetela kwa lotsong lwa gagwe lotlhe.

₂₆A Modimo o tlatse pelo ya gago botlhale, gore O tle O atlhole batho ba gagwe ka tshiamo, e le gore mekgwa e e siameng ya borraenomogolo e se ka ya bo ya nyelela. mme kgalalelo ya bone e fetele mo lotsong lotlhe lwa bone.