SIRAKA 47

₁E rile morago ga gagwe ga tsoga Nathane, go bolela-pele ka nako ya ga Dafita.

₂Dafita o ne a tlhopiwa mo baneng botlhe ba Iseraele fela jaaka mafura a tlosiwa mo tshupelong ya kagiso.

₃O ne a tshameka le ditau jaaka e kete o tshameka le dipotsane; a tshameka le dinonnori jaaka e kete o tshameka le dikonyana tsa letsomane.

₄A e rile e sa ntse e le mosimane a se ka a bolaya mokaloba, mme a ntsha batho mo go tlhabiweng ke ditlhong, ka go kolopa leje ka seragantšhwana, a diga Goliate yo o neng a tletse boikgogomoso?

₅Gonne o ne a bitsa Morena Mogodimodimo, yo o neng a thatafatsa letsogo la gagwe gore a tle a bolaye senatla sa motlhabani mme a tiise batho ba gagwe.

₆Ke gone ka moo, ba neng ba mmokele dikete di le some, mme ya re ba ntse ba baka Morena le ene ba mmoka, ka go mo rwesa serwalo sa kgalalelo; ₇gonne o ne a bolaile baba gongwe le gongwe. A ripitla Bafilisitia, baba ba gagwe, mme a ba koafaletsa ruri go fitlhelela gompijeno.

₈Mo ditirong tsotlhe tsa gagwe o ne a leboga Yo o Boitshepo, Mogodimodimo, ka mafoko a kgalaletso. A rata dipina tsa gagwe thata ka ntlha ya go rata Modiri wa gagwe.

₉A baya dikatara fa pele ga aletara go oketsa monate wa go opela ka molelo wa tsone.

₁₀A ntlafatsa meletlo, mediro a e dira maatlametlo thata. A dira gore leina le le boitshepo la Morena le bokwe, mme felo ga boitshepo go dume difela go tšwa phakela.

₁₁Morena a mo itšhwarela dibe, mme a mo tiisetsa ruri, A mo naya kgolagano ya segosi, le setilo sa bogosi se se galalelang mo Iseraele.

₁₂O ne a tlhomaganelwa ke morwawe yo o botlhale, yo o neng a tshela a phuthologile ka ntlha ya gagwe.

₁₃Solomone o ne a busa ka nako ya kagiso. Modimo wa mo naya kagiso gongwe le gongwe gore a tle a age ntlo go tlotla leina la gagwe, a bo a baakanya felo ga boitshepo mo go sa khutleng.

₁₄Kana O ne O tlhalefile jang O sa le monnye, tlhaloganyo e tletse mo go wena jaaka noka e a tle e tlale e bo e penologe.

₁₅Mogopolo wa gago wa anama le lefatshe lotlhe, wa tlala dipolelo tse di fetang tlhaloganyo ya motho.

₁₆Leina la gago la itsege mo tlhaketlhakeng tse di kgakala, mme wa ratelwa kagiso ya gago.

₁₇Dipina tsa gago, diane tsa gago, dipolelo tsa gago, le dikarabo tsa gago di ne tsa dira gore O gakgamatse batho mo lefatshing.

₁₈Ka leina la Morena Modimo, la One o o bidiwang Modimo wa Iseraele, O ne wa kgobokanya gouta jaaka e kete O kgobokanya disenke, mme wa dira selefera motlomoro jaaka lotwe.

₁₉Wa ineela basadi, mme wa nna molala wa dikeletso tsa gago tse di bosula.

₂₀Wa kgotlela tlotlo ya gago, wa itshepolola lotso lwa gago. Ka go dira jalo O ne wa dira gore bana ba gago ba galefelwe, mme ditlogolwana tsa gago di hutsafadiwe.

₂₁Bogosi jwa putlaganngwa ka legare; kwa Efraime ga tsoga bogosi jwa borukutlhi.

₂₂Fela Morena a se ka a bo a tlogela boutlwelo-botlhoko jwa gagwe, kgotsa a tlhanogela mafoko ape a gagwe. O ne a se ka a bo a nyeletsa bana ba motlhopiwa wa gagwe, kgotsa a bolaya lotso lwa motho yo o neng a mo rata. Ke gone ka moo a neng a naya Jakobe masalela, a naya Dafita modi o o neng wa tlhoga mo go ene.

₂₃Solomone a ithobalela le bagologolo ba gagwe, a tlogela mongwe wa lotso lwa gagwe e le yo o mo tlhomaganelang, ebong Rehoboame yo e neng e le tokololo ya setšhaba e e neng e tlhoka tlhaloganyo go feta ditokololo tse dingwe, e bile a se na tlhogo, yo mokgwa wa gagwe wa go busa o neng wa dira gore batho ba nne le borukhutlhi.

₂₄Ga go a feta nako e telele, ga bo go tla Jeroboame, morwa Nebate, yo o neng a leofisa Iseraele, mme a tsenya Efraime mo tseleng ya bosula. Go tšwa moo dibe tsa bone di ne tsa nna tsa oketsegela pele mo e leng gore di ne tsa bo tsa ba ntsha mo lefatshing la bone, ₂₅gonne ba ne ba lekelela mofuta mongwe le mongwe wa bosula, go fitlhelela pusoloso e bo e ba wela godimo.