Lebitla
1E rile ba feditse go ja le go nwa mme e kete ke nako ya go ya go robala lekawana la ntshiwa mo tlung ya bojelo, la isiwa kwa go ya borobalo. 2Tobiase a gakologelwa kgakololo ya ga Rafaele; a ya kwa kgetsing ya gagwe, a ntsha pelo ya tlhapi le sebete mo go yone mme a baya bontlhabongwe mo godimo ga ensense e e tukang. 3Monkgo wa tlhapi wa tlaletsa modemone, yo o neng a tshaba a sutlha phefo a ya Egepeto. Rafaele a mo latelela teng, a mmofa mme a mo tantela kwa ntle ga go senya nako.
4Fa tse di ntse di diragala batsadi ba ne ba tšwetse kwa ntle mme ba itšwaletse lebati. Tobiase a tsoga mo bolaong, a raya Sara a re, “A ko O tsoge kgaitsadiaka! Nna le wena re tšhwanetse go rapela, ra kopa Morena gore re bone tšhwaro ya gagwe le tshireletso ya gagwe. 5A ema, ba simolola go rapelela tshireletso, mme o ne a simolola go rapela jaana:
“O a bakega oh Modimo wa borraetsho;
leina la gago le lone le bakega ka metlha le metlha.
A magodimo a go bake le tsotlhe tse O di dirileng ka bosafeleng.
6Ke wena yo o bopileng Atame.
Ke wena yo o bopileng Efa mosadi wa gagwe,
gore e nne mothusi wa gagwe le seikokotlelo sa gagwe;
mme batho ba ne ba tsalwa ke batho ba babedi ba.
Ke wena yo O rileng, ‘Ga go a siama gore monna a nne a le esi;
a re mo direleng mothusi yo o tšhwanang nae.’
7Jalo he, ga ke tseye kgaitsadiake ka maikaelelo ape a go itumedisa mmele;
ke mo tsaya ka pelo e e siameng.
A O ko O mo utlwele botlhoko, le nna O nkutlwele botlhoko
mme roobabedi O re neye botsofe.”
8Mme mmogo ba re, “A go nne jalo, A go nne jalo,” 9ba bo ba robala.
Fela Raguele o ne a ema a bitsa batlhanka ba gagwe, ba ba neng ba tla go mo thusa go epa lebitla.
10O ne a akanya a re, “A legodimo le ke le thuse a se ka a šwa tlhe! Re ka tla ra tshegiwa tota ra bo ra tlhabiwa ke ditlhong tse di mašwe.” 11Ya re lebitla le fedile, Raguele a boela kwa tlung, a bitsa mosadi wa gagwe 12mme a re, “A O ko O rome motlhanka mongwe kwa ntlwaneng go ya go bona gore a Tobiase o sa ntse a tshela. Gonne fa e le gore o tlhokafetse re ka nna ra mo fitlha go sa itse ope.” 13Motlhanka a bidiwa, lobone lwa tshubiwa, lebati la bulwa; motlhanka a tsena. A fitlhela boobabedi ba thulametse; 14a tšwela kwa ntle gape mme a seba a re, “Ga aa tlhokafala, gotlhe go siame fela.” 15Ke fa Raguele a baka Modimo wa legodimo ka mafoko a, a re,
“O a bakega, Modimo wa me,
ka pako nngwe le nngwe e e phepa;
a O nne O bakwe ka bosafeleng!
16O bakelwa go intumedisa.
Se ke neng ke se boifa ga se a diragala;
O mpile wa re tsaya ka boutlwelo-botlhoko jo bo ka se kang jwa lekanngwa.
17O bakelwa go tlhomogela pelo ngwana yo wa mosimane yo e leng ene fela
le ngwana yo wa mosetsana yo e leng ene fela.
Morena, a O ko O ba neye tshwaro ya gago le tshireletso ya gago;
a ba tshele botshelo jo bo leeleleele mo boitumelong le mo tshwarong.”
18A bo a dira gore batlhanka ba gagwe ba katele lebitla masa a ise a se.
19A raya mosadi wa gagwe a re a apeye borotho jo bontsi; ene a ya kwa motlhapeng wa gagwe, a tsisa dipholo di le pedi le dinku di le nne mme a laela gore di apewe, go bo go simololwa go baakanngwa. 20A bitsa Tobiase mme a re, “Go fete dibeke di le pedi ke ise ke be ke utlwe go twe O a tsamaya. O tshwanetse go nna mo O teng mo, O ja O nwa le nna. O tlaa itumedisa morwadiake a sena go tshwenyega go le kanakana. 21Morago ga moo, O tseye mhama o mongwe wa tsotlhe tse ke nang natso, O boele kwa go rrago O sa kgorelediwe ke sepe. Morago ga loso lwa me le lwa mosadi wa me O tla tsaya mhama o mongwe. O nametsege, ngwanaka! Ke rrago, mme Edena ke mmago. Mo nakong e e tlang re tlaa nna batsadi ba gago fela jaaka re le batsadi ba ga kgaitsadio. O nametsege, ngwanaka!”
