BOTLHALE 11

₁Botlhale bo ne jwa tšweledisapele ditiro tsa bone; ₂ba ralala sekaka se go neng go se na ope mo go sone. Ba thibelela mo mafelong a go sa fitlhwe-fitlhweng fela mo go one.

₃Ba emelana le baba ba bone, ba tlhabana le dira tsa bone.

₄Ya re ba nyorilwe ba go bitsa, mme ba newa metsi a tswa mo lefikeng la legakwe, ba timolwa lenyora mo lentšweng le le omeletseng. Metsi a ne a nyeletsa Baegepeto, mme jaanong a boloka Baiseraele.

₅Ka mokgwa oo selo se se neng sa dirisiwa go otlhaya baba ba bone e ne ya nna thuso mo go bone mo pitlaganong ya bone.

₆Baba wa ba naya motšwedi wa noka e e tlholang e elela e e kgoberegileng e bile e lešwefaditswe ka madi ₇e le komanyo ya taelo ya bone ya go bolaya masea; Baiseraele, bone, wa ba naya metsi a mantsi ba ne ba sa lebelela, ₈O supa ka lenyora la gone ka nako eo gore O ne wa otlhaya baba ba bone jang.

₉Gonne e rile ba lekiwa, le mororo ba ne ba laiwa ka boutlwelo-botlhoko, ba ne ba ithuta ka mo baikepi ba neng ba otlhaiwa ka teng fa ba ne ba atlholwa ka bogale.

₁₀O ne wa ba leka ruri, O ba tlhagisa jaaka ramotho a tle a tlhagise, fela O ne wa tlhatlhoba baikepi jaaka kgosi e e setlhogo e tle e bone molato.

₁₁A ba ne ba le gaufi kgotsa ba le kgakala, O ne wa ba utlwisa botlhoko fela ka mokgwa o o lekanang, ₁₂gonne kutlo-botlhoko e e maphata e ne ya ba tshwara, le ngongorego ya bone e ne e le maphata fa ba gakologelwa se se neng se diragetse.

₁₃Gonne e rile ba utlwa gore basiami ba ne ba itumedisitšwe ka se se neng se ba otlhaile bone, ba bone gore ke tiro ya Morena.

₁₄Ka e rile tsotlhe di sena go diragala ba gakgamalela ene yo ba neng ba sa bolo go mo latlhela kwa ntle le go mo sotla yo e neng ya re morago ba mmifela, gonne lenyora la bone le ne la fapaana le la basiami.

₁₅O ne wa ba romelela dibopiwa tse di se nang tlhaloganyo di le dintsintsi go ba otlhaya, O ba duelela megopolo ya bone e e neng e tletse boeleele le bosula, mme e e neng ya ba timeletsa mo go obameleng dinoga tse di se nang tlhaloganyo le diphologolo tse di sa thuseng sepe, ₁₆gore ba tle ba ithute gore motho o otlhaiwa ka tsone dilo tse a leofang ka tsone.

₁₇Gonne seatla sa gago se se thatayotlhe se se neng sa bopa lefatshe ka bogorogoro, se ne sa se ka sa tlhoka mokgwa wa go ba romelela dinonnori tse dintsintsi, le ditau tse di setlhogo, ₁₈Kgotsa dibatana tse di sa itsegeng tse di neng tsa bopiwa seša, di tletse bogale, kgotsa tse di hemang moya o o molelo, kgotsa tse di tlhatsang mosi o o betaganyeng o montsho o o nkgang mašwe, kgotsa di tsapola ditlhase tse di boitshegang mo matlhong a tsone, ₁₉dibatana tse di neng di ka ba pitla, e seng ka go ba thula fela mme tse di neng di ka ba nyeletsa ka go bonala ga tsone go go boitshegang.

₂₀Le kwa ntle ga dilo tse, batho ba ne ba ka nna ba digwa ke moya o le mongwe fela, fa ba lateletšwe ke tshiamo ya gago, mme ba phatlaladiwa ke moya wa nonofo ya gago. Fela O rulagantse dilo tsotlhe ka tekanyo, ka palo le ka bokete.

₂₁Gonne O na le gone go ka nna wa bontsha nonofo ya gago; ke mang yo o ka emelanang le thata ya letsogo la gago?

₂₂Mo matlhong a gago lefatshe lotlhe le itšhwanela fela le tlhakanyana ya lerole e e tshikinyang sekale go le gonyennyane fela, le tšhwana le lerothodi la monyo wa mo mosong le le rothegelang fa fatshe.

₂₃Le fa go ntse jalo, O ba utlwela botlhoko botlhe gonne O ka dira dilo tsotlhe. E bile O ka itlhokomolosa dibe tsa batho gore ba tle ba ikwatlhaye.

₂₄Ee, O rata dilo tsotlhe tse di leng gone, mme ga O sinalele sepe sa tse O di dirileng, gonne fa O ka bo O ne wa tlhoa sengwe O ka bo O ne wa seka wa se bopa.

₂₅Mme selo se ne se ka tšwelelapele jang go nna gone fa O ka bo O ne O sa se batle? Mme se ne se ka bolokesega jang, O ne O sa se biletsa mo go nneng gone?

₂₆O rekegela dilo tsotlhe gonne dilo tsotlhe ke tsa gago, Morena, wena morati wa botshelo.