BOTLHALE 13

₁Ee, batho botlhe ba ba neng ba se ka ba itse Modimo, mme ba palelwa ke go lemoga One-o-o-leng-gone mo dilong tse di molemo tse di bonwang, kgotsa ya re ba ntse ba ithuta ditiro tsa one, ba retelelwa ke go lemoga Modiri wa tsone, ke dieleele ka tlhago.

₂Fela molelo, kgotsa phefo, kgotsa moya o o bofefo, tikologo ya dinaledi, metsi a a sekgatlha, dipone tsa legodimo, ke dilo tse ba tsereng e le tsone medimo e e busang lefatshe.

₃Fa e le gore ba kgatlhilwe ke bontle jwa tsone dilo tse ba di tsayang e le medimo a ba itse ka mo Morena wa tsone a di fetang kgakala ka teng, gonne ke ene Modiri wa bontle yo o di bopileng.

₄Mme fa e le gore ba kgatlhilwe ke thata le nonofo ya go dira ga tsone, a ba tseye mo go tsone gore yo o di bopileng o nonofile go di feta jang.

₅Gonne ka bogolo le bontle jwa dibopiwa re ka nna ra bona, ka papiso, Mmopi wa tsone.

₆Fela batho ba ga ba a tšhwanela go bonwa molato go le kalokalo ka gore gongwe ba timela jaana, e le fa ba senka Modimo mme ka tlhwaafalo ba batla go o bona.

₇Ka ba tshela mo gare ga ditiro tsa one, ba leka go di tlhaloganya mme ba tsiediwe ke ponalo ya tsone, ba bona di le dintle go le kalokalo.

₈Fela lefa go ntse jalo ga ba a tšhwanela go itšhwarelwa,

₉Gonne fa ba ka kgona go nna le kitso e e lekanyeng go keleka lefatshe ba ntse bonya jang go bona Morena wa dilo tse?

₁₀Fela batho ba ba bitsang dilo tse di dirilweng ke diatla tsa batho “medimo” ba tlhomola pelo, ka ba beile tsholofelo ya bone mo dilong tse di se nang botshelo: ebong gauta, selefara, di betlilwe sentle, ditšhwantsho tsa diphologolo, kgotsa lentšwe lengwe le betlilwe ke seatla sengwe bogologolo.

₁₁A ko O tseye mmetli mongwe wa logong. O rema setlhare sengwe se se motlhofo go tšhwarega, o se obola makwati gotlhe, mme ka botšwerere o dira ka sone sengwe se se nang le thuso mo botshelong jwa malatsi otlhe.

₁₂Dibetlela tse di salang fa a ntse a betla, o di dirisa mo go apeyeng, a bo a ja a kgora.

₁₃Go sala logonyana longwe lo lo se nang mosola ka lo le matshophetshophe, lo lo magotlho: o a lo sela, a lo seta ka kelotlhoko, a lo iketletse, a lo betla ka botšwerere, a kgobile kgetsi, a lo dira setšhwantsho sa motho.

₁₄Kgotsa o lo dira setšhwantsho sa phologolo nngwe e e se nang thuso, a lo tshasa letsoku, a lo dira lohibidu lotlhe, a bipa diphanyana tsa lone tsotlhe.

₁₅Fa a tswa foo, o lo direla ntlo e e tšhwanetseng, o lo aega ka lobotana, a lo tlhabetsa ka tshipi.

₁₆A tlhokometse ka mokgwa oo gore lo se ka lwa bo lwa wa, ka a itse sentle gore ga lo kake lwa bo lwa ithusa: ka e le setšhwantsho fela, mme se tlhoka go thusiwa.

₁₇Mme le fa go ntse jalo, fa a batla go rapelela dilo tsa gagwe, dinyalo, bana ba gagwe, ga a tlhabiwe ke ditlhong go bua le selo se se sa tsheleng se: ₁₈A kopa boitekanelo mo selong se se bokoa, a kopa botshelo mo selong se se suleng, a kopa thuso mo selong se se se nang kitso epe, a kopa tsela e tšhweu fa a eta mo selong se se ka se kang sa bo sa dira le fa e le kgato e le nngwefela.

₁₉A kopa matsadiso a papadi, maano le tswelelopele mo tirong ya gagwe mo selong se diatla tsa sone di se nang botšwerere bope fela.