Mafelelo a Basiami a bapisiwa le a Baleofi
1Mewa ya basiami e mo mabogong a Modimo, mme botlhoko ga bo kitla bo ba ama.
2Masilo a itheile a re ba sule mme a gopola gore khudugo ya bone ke go tlhoka lesego, 3le go tšwa ga bone fa gare ga rona ke go nyelelela ruri; fela bone ba mo kagisong.
4Mme le fa mo ponong ya batho ba ne ba utlwisiwa botlhoko, bone ba tletse tsholofelo ya go sa šweng.
5Morago ga ba sena go boga go le gonnye, ditshegofatso tsa bone di tlaa nna dikgolo, gonne Modimo o ba lekile, mme wa ba fitlhela ba o tšhwanetse.
6O ba lekile jaaka gouta e lekiwa mo sebesong, mme wa ba amogela jaaka setlhabelo se se fisiwang gotlhelele.
7Ka letsatsi ja ketelo ya one basiami ba tlaa phatsima, ba gasagasane jaaka ditlhase mo gare ga letlhaka.
8Ba tlaa atlhola ditšhaba, ba buse merafe mme Morena o tlaa ba laola ka bosakhutleng.
9Botlhe ba ba o ikanyang ba tlaa tlhaloganya boammaaruri, ba ba ikanyegang ba tlaa tshela le one ka lorato gonne botlhe ba o ba tlhophileng ba emetšwe ke tšhwaro le boutlwelo-botlhoko.
10Fela baleofi ba tlaa otlhaelwa kakanyo ya bone ka tshwanelo, ba otlhaelwa go tlhokomologa mosiami le go hularela Morena.
11Gonne botlhe ba ba nyatsang botlhale le ditaolo tsa thuto e e siameng ba tlhomola pelo: ba solofela lefela, ba direla lesidi, ditiro tsa bone ga di thuse sepe; 12basadi ba bone ke difafalele, bana ba bone ba senyegile, lotso lwa bone lo hutsegile.
Go botoka go nna Moopa go na le go nna le Bana ba ba se nang Moya wa Bosemodimo
13Go sego mosadi yo o sa tsholeng bana mme a ise a ke a tsene mo kopanong ya sebe, o tlaa nna le loungo fa Modimo o tla go tlhatlhoba mewa.
14Moopafadiwi yo diatla tsa gagwe di iseng di ke di dire molato le ene o sego, yo o iseng a ke a akanye dilo tse di bosula kgatlhanong le Modimo; o tlaa bontshiwa botsalano jo bo faphegileng ka ntlha ya boikanyego jwa gagwe le felo ga boitumelo jo bogolo mo tempeleng ya Morena.
15Gonne loungo lwa ditiro tse di siameng lo a tlotlega, mme modi wa tlhaloganyo ga o nke o bola.
16Fela bana ba diaka ga ba na go bona malatsi a a tlang a go gola, mme lotso lwa kopano ya sebe lo tlaa nyelela.
17Le fa ba ka bo ba tshela nako e telele e tlaa ne e kete ke dilo fela, mme bofelong botsofe jwa bone bo tlaa nyatsega fela.
18Fa ba ka šwa ba le babotlana ga ba kitla ba nna le tsholofelo epe le kgomotso epe ka letsatsi la katlholo.
19Gonne phelelo ya setšhaba sa badira-bosula e mašwe.
