BOTLHALE 7

₁Jaaka batho botlhe le nna ke motho yo o šwang le lotso lwa sebopiwa sa ntlha se se neng sa bopiwa ka mmu. Ke ne ka bopiwa ka nama mo popelong ya ga mme, ₂ke bopega mo mading a gagwe dikgwedi di le some ka peo ya monna le boipelo jwa lenyalo.

₃E rile ke sena go tsalwa ka hema yone phefo e, ka wela mo go one mmu o re o gatileng rotlhe o. Mme modumo wa me wa ntlha ya nna selelo, fela jaaka wa botlhe.

₄Ke ne ka tlamelwa ka kelotlhoko mo matseleng a a phuthelang ngwana.

₅Gonne ga go na le fa e le kgosi e e neng ya nna le tshimologo ya go nna teng e e fapaanyeng le e; ₆batho botlhe fela ba na le phatlha e le nngwe fela ya go tsena mo botshelong, le kgoro ya lotso e le nngwe fela.

₇Jalo he, ke ne ka rapela, mme ka fiwa tlhaloganyo. Ke ne ka bitsa Modimo, mme Moya wa Botlhale wa tla mo go nna; ₈ke ne ka bo rata go feta dithobane tsa segosi le ditiro tsa bogosi mme ka bona khumo e se sepe fa ke e bapisa najo.

₉Ga go na leje lepe la botlhokwa la tlhwatlhwa e e kwa godimo le le ka tšhwantshiwang le jone, gonne gouta yotlhe fa e bapisiwa le jone e tšhwana le motlhabanyana fela. Mme selefera, fa e bapile le jone e itšhwanela le seretse fela.

₁₀Ke ne ka bo rata go feta boitekanelo le bontle, ka bona go le botoka go nna najo go na le go nna le lesedi, gonne phatsimo ya jone ga e nke e fifala.

₁₁Dilo tsotlhe tse di molemo tsa tla mo go nna le jone, mme khumo e e fitileng selekanyo ya tla ka diatla tsa jone.

₁₂Ka di itumelela tsotlhe gonne Botlhale bo tla natso. Fela ke ne ke ntse ke sa itse gore ke jone mmaatsone.

₁₃Se ke se ithutileng kwa ntle ga maano a bolotsana ke se aba kwa ntle ga timano. Ga ke a ikaelela go fitlha khumo ya jone.

₁₄Gonne mo bathong ke khumo e e sa feleng e kgolo go feta selekanyo. Ba ba bo bapalang ba tšwa ditsala tsa Modimo e le gore ba buelelwa fa pele ga one ke dithuso tsa thuto ya jone.

₁₅A Modimo o mphe go bua jaaka o ne o ka batla, ke ntshe dikakanyo tse di tšhwanelang dineo tsa one, gonne ke one mosupatsela wa Botlhale, ka ke one o kaelang batlhalefi.

₁₆Kana tota re mo seatleng sa one, rona ka borona le mafoko a rona, ka tlhaloganyo ya rona yotlhe le bomaitseanape.

₁₇Ke one o o neng wa mpha kitso ya dilo tsotlhe tse di leng gone. Ke one o o nthutileng kagego ya lefatshe le thata ya metheo ya dipopego, ₁₈tshimologo, bokhutlo le bogare jwa dinako, ka fa tsela ya letsatsi e fetogang ka teng, ka fa dipaka di tlhomaganang ka teng; ₁₉ka fa dingwaga di dikologang ka teng le maemo a dinaledi, ₂₀tlholego ya diphologolo le ditshekamelo tsa dibatana tsa naga, dithata tsa mewa le ka fa megopolo ya batho e tsamayang ka teng, mehutahuta ya dimela le thata ya kalafi ya medi.

₂₁Ka ithuta tsotlhe tse di fitlhegileng le tsotlhe tse di mo mpaananeng ke rutwa ke Botlhale jo e leng jone modiri wa tsone tsotlhe.

₂₂Gonne mo go jone go na le moya o o tlhaloganyang, o o boitshepo, o o faphegileng, o o methalethale, o o sa tlhalosegeng ka motlhofo, o o dirang, o o tlhalefileng thata, o o sa lešwefadiwang, o o tlhaloganyegang, o o sa tlhaselegeng, o o pelotšhweu, o o tlhwaafetseng, ₂₃o o fenyang dilo tsotlhe, o o pelo, o o rategang, o o tlhomameng, o o ikanyegang, o o ritibetseng, o o thatayotlhe, o o bonang tsotlhe, o o phunyeletsang mewa yotlhe e e tlhaloganyang, e e phepa, e e thata go tlhaloganngwa.

₂₄Botlhale bo bonako go tsamaya go feta motsamao mongwe le mongwe, bo phepa thata, bo sutlhelela bo bo bo tsenelele mo dilong tsotlhe, ₂₅ke jone e leng moya wa thata ya Modimo, ke kelelo e e phepa ya kgalalelo ya Mogodimodimo; ke gone ka moo go seng sepe se se itshekologileng se se ka tsenang mo go jone.

₂₆Ke jone e leng ponalo ya lesedi le le sa khutleng, seipone se se sa tladiwang lešwe, sa thata ya Modimo e e dirang, setšhwantsho sa bomolemo jwa one.

₂₇Le mororo bo le bosi, bo ka dira dilo tsotlhe; le mororo jone bo sa fetoge, bo ntšhafatsa dilo tsotlhe. Mo dikokomaneng tsotlhe bo tsena mo meweng e e boitshepo, bo e dira ditsala tsa Modimo le baprofeta, ₂₈ka gonne Modimo o rata motho yo o tshelang le Botlhale fela.

₂₉Bo bontle tota go feta letsatsi. Bo phatsima go feta segopa sa dinaledi; fa bo tšhwantshiwa le lesedi, bo a le gaisa, ₃₀gonne lesedi le sutela bosigo, mme bosula ga bo nke bo fenya Botlhale.