1 VHAKORINTA 9

₁Nṋa nṋe a thi na zwo mpfanelaho-vho? Kani-ha a thi muapostola? A tho ngo vhona-vho Yesu Muṋe washu naa? Inwi a ni mitshelo ya mushumo we nda shuma nga maanḓa a Muṋe washu naa? ₂Naho vhaṅwe vha sa nnyiti muapostola, inwi ni ḓivha ndi muapostola. Inwi vhaṋe ni vhuṱanzi ha vhuapostola hanga nge na vha vhalanda vha Muṋe washu.

₃Musi vhathu vha tshi edzisa u ḓiita vhahaṱuli vhanga ndi vha fhindula nda ri: ₄Kani-ha a zwo ngo mpfanela ndi tshi ṋewa zwiḽiwa na zwa u nwa uri ndi kone u shuma? ₅Kani-ha a zwo ngo mpfanela ndi tshi edzisa vhaṅwe vhaapostola na vharathu vha Muṋe washu na Kefasi nda dzea-vho musadzi wa mutendi ra tshimbila roṱhe? ₆Kana nṋe na Barnabasi ndi riṋe ri roṱhe ro fanelaho u tou ḓipalela uri ri tshile naa? ₇Ndi ḽiswole ḽa ngafhi ḽeneḽo ḽe ḽa vhuya ḽa ri ḽo bva pfumo ḽa ḽa zwaḽo? Ndi mulimi wa ngafhi onoyo we a ri o ḓiṱavhela minḓirivhe a si tsha fula nḓirivhe dzayo? Ndi mulisa wa ngafhi onoyo ane a tshi lisa a si nwe shogodzho?

₈Nahone a thi ḓitiki nga hezwi zwine ra vhona vhutshiloni ha vhathu fhedzi lini; na Mulayo u ralo. ₉Fhaḽa Mulayoni wa Mushe hu pfi, “Phulu i khou fhuliswaho i songo thivhiwa mulomo.” Zwino-ha kani Mudzimu u vhavhalela phulu? ₁₀O vha a sa ambi riṋe a tshi ralo naa? Zwi tou vha khagala uri hu ambiwa riṋe. Hu mulimi, hu mukaṋi, vhoṱhe vha shuma vho lavhelela u ḓo wana mukovhe wa khaṋo. ₁₁Ro zwala mbeu ya u tshidza muya kha inwi; zwino ni vhona hu tshi ḓo vha u ni lemedza na, arali ri tshi vho kaṋa zwi fushaho muvhili henefho? ₁₂Arali vhaṅwe vhe na pfanelo ya u zwi wana kha inwi, riṋe a zwo ngo ri fanela u fhira avho naa?

Hone, naho zwo ri fanela a ri athu humbela tshithu, ro sokou konḓelela zwoṱhe, nga u ofha u thithisa vhathu u ṱanganedza mafhungo maḓifha a Khristo. ₁₃Kani-ha a ni zwi ḓivhi uri vha shumaho thembeleni vha ḽa zwa thembele? Zwa ḓi nga vhane vha kumedza Mudzimu nduvho aḽiṱarini vha tshi wana mukovhe wadzo. ₁₄Sa zwenezwo Muṋe washu o vhea mulayo wa uri vhane vha ḓivhadza mafhungo maḓifha vha fanela u tshila nga mushumo wonoyo.

₁₅Naho na nṋe zwo mpfanela uri ndi zwi wane, a thi athu na u humbela tshithu. U ralo a thi khou vhila uri ni mphe zwo mpfanelaho lini, aiwa, arali nda zwi ṱanganedza a thi tsha ḓo kona u zuwa; zwa ralo ndi nga tou ḓifela zwanga. ₁₆Huno a thi zuwi nge nda vha muḓivhadzi wa mafhungo maḓifha; nṋe ndi pfa zwi tshi tou nkombetshedza uri ndi zwi ite; arali nda litsha zwi nga nngwedza khomboni. ₁₇Arali ndo vha ndi tshi tou shuma nga u ḓinangela ndo vha ndi tshi nga kona u vhila malamba; zwino ngauri a tho ngo tou ḓinangela, ndi khou tou shuma mushumo we Mudzimu a nkhwesa. ₁₈Zwino ndi kha ḓi wana malamba a u itani? Malamba anga ndi u ḓivhadza mafhungo maḓifha ndi sa holi tshithu, ndi sa vhili zwo mpfanelaho kha mushumo hoyu.

₁₉Nṋe naho ndi si phuli ya muthu ndo ḓiita phuli ya vhoṱhe, ndi tshi itela uri ndi kungele vhanzhi ha Khristo. ₂₀Musi ndi na Majuda ndi ḓiita Mujuda uri ndi kunge Majuda; naho ndi sa tsha vhuswa nga Mulayo wa Mushe ndi ḓiita unga ndi vhuswa ngawo musi ndi na vha vhuswaho ngawo, uri ndi vha kunge; ₂₁musi ndi na vha sa ḓivhiho Mulayo ndi ḓiita muṅwe wavho uri ndi vha kunge. Ndi tshi ralo a si uri a thi tsha vhuswa nga Mulayo wa Mudzimu; ndi hone-ha ndi tshi khou vhuswa nga Mulayo wa Khristo. ₂₂Hu ḓi nga vha si na lutendo lwo khwaṱhaho ndi ḓiita muṅwe ngavho uri ndi vha kunge; vhoṱhe-vhoṱhe ndi ḓiita muṅwe ngavho ndi tshi edzisa nga nḓila dzoṱhe uri vhaṅwe vhavho vha tshidzwe. ₂₃U ḓinetisa hanga hoṱhe ndi u itela mafhungo maḓifha, uri ndi kaṋe mashudu ao na vhenevho.

₂₄Kani-ha a ni zwi ḓivhi uri kha vhoṱhe vhane vha ita mbambe ndi muthihi fhedzi ane a wana muṅene? Zwino-ha gidimani lune na ḓo u wana. ₂₅Mugidimi muṅwe na muṅwe u ḓiilisa zwinzhi a tshi ri a wane tshiala zwatsho tshi ṱahalaho, riṋe ngeno ri tshi ḓiilisa uri ri wane tshiala tshi sa ṱahali. ₂₆Ndi zwine nṋe nda gidima ndo tou oma ndi sa lavhelesi matungo ndo livha thamboni; nda nga mudziamavili a sa buphi. ₂₇Ndi ṱungufhadza muvhili wanga nda u langa nga tshiṱuhu, uri ndi sa ḓo wanala zwi songo tsha mpfanela ngeno e nṋe ndo vhidzaho vhaṅwe.