1 VHATHESALONIKA 3

_1-2Zwino ro vha ri na Timoti hoyu wa hashu ane a shumisana na Mudzimu a tshi ḓivhadza mafhungo maḓifha a Khristo. Huno ri tshi pfa tshiṱuvho tshi sa tsha konḓelelea, ra sala Athene, ra ruma ene uri a khwaṱhise lutendo lwaṋu na u ni ṱuṱuwedza, ₃hu si vhe na a dzinginyeaho nga u vhona u tovholwa honoho. Hufha ni tshi zwi ḓivha inwi vhaṋe uri ndi zwone zwe zwa dzudzanyelwa upfi ri ṱangane nazwo. ₄Zwiḽa ri tshee ngeo ro ḓi ni vhudza ra ri ri ḓo tovholwa; zwino asizwo-ha zwo itea.

₅Ndi zwe nda ri ndi tshi pfa tshiṱuvho tshi sa tsha konḓelelea nda ruma Timoti uri ndi pfe arali ni tshee no ima kha lutendo, nge nda ofha uri khamusi mulingi a nga vha o no ni fhura, zwoṱhe zwe ra shuma henengeo zwa vho wanala zwi si tshithu.

₆Zwino ndi hone Timoti o vhuya a tshi bva henengeo, a ri ḓela na mafhungo haya a takadzaho a lutendo lwaṋu na lufuno lwaṋu, a dovha a ri vhudza uri ni dzula ni tshi ri humbula nga mbilu tshena na u ri ṱuvha unga na riṋe ro ni ṱuvha. ₇Ndi hone-ha zwino vha hashu mbilu dzashu dzo rula. Na u shengedzwa háshu na u tambudzwa háshu ri pfa mbilu dzashu dzo rula ri tshi pfa uri lutendo lwaṋu lwo khwaṱha hani. ₈Zwino ro tshila, nge inwi na ima no khwaṱha ni vha Muṋe washu. ₉Ri tshi pfa dakalo heḽi ḽingafhangafha nga u vhona zwe Mudzimu washu a ni itela a ri ḓivhi na uri ri nga mu livhuha hani. ₁₀Vhusiku na masiari ri tou oma thabeloni ri tshi mu humbela nga mbilu yoṱhe uri ri dovhe ri tou vhonana nga maṱo nandi uri ri kone u vuledza he lutendo lwaṋu ḽa sala gake.

₁₁Ngavhe Ene muṋe Mudzimu Khotsi ashu na Muṋe washu Yesu vha tshi ri vulela nḓila ra konou swika ngeo. ₁₂Ngavhe Muṋe washu a tshi ni ṋea lufuno lwa tou titima, na funana na vhuya na funa na vhathu vhoṱhe, sa zwine riṋe ra ni funa. ₁₃Ndi hone a tshi ḓo khwaṱhisa mbilu dzaṋu, na vha vho ḓikumedzaho Ene tshoṱhe, lune nga ḓuvha ḽine Muṋe washu Yesu a vhuya ngaḽo na vhakhethwa vhawe vhoṱhe, na Ene muṋe Mudzimu Khotsi ashu a ḓo ni vhona ni sa solisei.