1 VHATHESALONIKA 5

₁Zwino ri tshi ḓa kha a uri Muṋe washu u ḓo vhuya lini a wana ho tou ita hani, a ri tsha ṱwa ri tshi ni ṅwalela. ₂Hufha inwi vhaṋe ni tshi zwi ḓivha zwavhuḓivhuḓi uri Muṋe washu musi a tshi vhuya u ḓo ḓa sa fobvu ḽi tshi ḓa vhusiku ḽi songo lindelwa. ₃Vhathu vha tshi kha ḓi ri, “Ḽo lala, a hu na khombo,” zwenezwo kathihi fhedzi vha ḓo tshenuwa vho no lovha tshoṱhe; a zwi na vhutinyelo, zwi nga musadzi a re muthu wa thovhela a tshi tshenuwa o welwa nga vhuṱungu ha musi a tshi vhofholowa.

₄Hone inwi vha hashu, ngauri a ni dzuli swiswini, ni nga si tshenuwe no ḓelwa nga heḽo ḓuvha sa musi ni tshi ḓelwa nga fobvu. ₅Hufha inwi noṱhe ni vhathu vha tshedza; ni vhathu vha masiari, a ri vha vhusiku kana vha swiswi. ₆Ndi zwone-ha ri songo tsha nga vhaḽa vhaṅwe vho eḓelaho, kha ri karuwe ri fhaṱuwe. ₇U eḓela hu eḓelwa vhusiku; na u kambwa ndi zwithu zwa vhusiku hezwo; ₈riṋe a ri vha vhusiku ri vha masiari, ndi zwone kha ri fhaṱuwe-ha, khanani ri pile nga tsimbi ine ya vha lutendo na lufuno, nguwane yashu i vhe u lavhelela u tshidzwa, ₉ngauri tshe Mudzimu a ri nangela tshone a si u haṱulelwa ṱhamu, ndi u tshidzwa nga Muṋe washu Yesu Khristo, ₁₀Ene we a ri fela uri naho ro karuwa ri vha tshilaho a tshi vhuya, nangwe ro eḓela na vho faho, ri kone u ḓo tshila roṱhe nae.

₁₁Ndi zwone-ha, khuthadzanani ni fhaṱane, sa zwine na khou ḓi zwi ita.

₁₂Zwino vha hashu, ri a ni humbela ri ri: Hulisani vhane vha ḓinetisa nga u ni shumela vhó vhewa nga Muṋe washu uri vha ni linde vha ni laye. ₁₃Vhenevho vha funeni ni vha hulise nga maanḓa ni tshi itela mushumo wavho. Dzulani ni tshi anḓana.

₁₄Ndi zwone vha hashu, ri a ni kwengweledza ri ri: ni laye vhabva, vho kuleaho miraḓo ni vha khwaṱhise, vha si na nungo ni vha tikedze; ni songo fhelela muthu na muthihi mbilu. ₁₅Ni songo lifhedza vhuvhi nga vhuvhi na kathihi; misi yoṱhe ni luse u itelana zwivhuya, ni itele na vhathu vhoṱhe.

₁₆Takalani misi yoṱhe; ₁₇ni dzule ni tshi rabela, ₁₈na tshini tshine na ṱangana natsho ni livhuhe. Ndi zwone zwine Mudzimu a funa inwi ni re vha Khristo Yesu ni tshi zwi ita. ₁₉Ni songo dzima u duga ha Muya nga u thivhela mishumo yawe. ₂₀Ni songo nyadza zwine Mudzimu a ni ḓivhadza nga vhuporofita, ₂₁hone ni tshi sedzesesa zwoṱhe, ni nange zwi re zwivhuya. ₂₂Zwo vhifhaho ni laṱe kule.

₂₃Ngavhe Mudzimu, Ene Ṋemulalo, a tshi ni ita vhakhethwa tshoṱhe, a vhulunga muya na mbilu na muvhili, uri Muṋe washu Yesu Khristo a tshi vhuya a wane hu si na tshi no solisea. ₂₄Ane a ni vhidza u a fulufhedzea, ha nga kundwi u zwi ita.

₂₅Vha hashu, ni ri rabelele-vho.

₂₆Ni nndumelisele vhatendi nga inwi vhoṱhe. Ni reshane nga u kuvhatedzana sa vhatendi.

₂₇Afha ndi khou khwaṱhisa nga dzina ḽa Muṋe washu ndi ri: luṅwalo holu lu vhalelwe vhatendi vhoṱhe.

₂₈Ngavhe Muṋe washu Yesu Khristo a tshi ri itela vhuthu.