1 TIMOTI 2

₁Tshihulwane ndi a ni ṱuṱuwedza ndi ri: dzulani ni tshi humbela Mudzimu, ni mu rabele, ni rabelele na vhaṅwe, ni mu livhuhe, ni tshi itela vhathu vhoṱhe, ₂na mahosi na vhahulwane vhoṱhe, uri ri tshile ho dzika, ḽo lala, hu tshi huliswa Mudzimu, ha tshilwa nga u ḓifara zwavhuḓi. ₃Hezwo ndi zwone zwavhuḓi, ndi zwone zwi takadzaho Mudzimu Mutshidzi washu, ₄ngauri Ene u funa vhathu vhoṱhe vha tshi tshidzwa vha ḓivha ngoho. ₅Hafhu ni ḓivhe uri Mudzimu ndi muthihi, na Mupfumedzanyi wa Mudzimu na vhathu ndi muthihi, ndi muthu Khristo Yesu. ₆Ene o ḓikumedza uri a vhe tshipfumelo tsha vhoṱhe. Hoho ho vha vhuṱanzi ho ḓaho nga tshifhinga tsho fanelaho, ha uri Mudzimu u funa vhathu vhoṱhe vha tshi tshidzwa. ₇Ndi zwe nṋe nda ruṅwa uri ndi vhe muḓivhadzi wazwo na muapostola, ndi funze vhannḓa a lutendo na ngoho – a thi zwifhi, ndi ni vhudza ngoho.

₈Ndi funa vhanna vha tshi rabela zwivhidzoni zwoṱhe vho kuna, vha tshi rabela vhá songo sinyuwa, vha sa ṱaṱisani. ₉Na vhasadzi ndi funa vha tshi ambara tshihulwane, lu si lwa u ṱonga, lu sa shonisi, hu si nga u ṱolou thakha mavhudzi, na u kungela madzanga a musuku na dzindalama na u ambara maṱeleṱele. ₁₀Kha vha ḓiṱame nga mishumo mivhuya; ndi zwone zwo teaho vhasadzi vhane vha funa u sumbedza uri vha ofha Mudzimu. ₁₁Musi no kuvhangana, musadzi kha a fhumule a ḓiṱukufhadze a tende u funziwa. ₁₂Nṋe a thi tendeli musadzi a tshi funza kana a vho vhusa munna. U fanela u fhumula. ₁₃Hufha ho thoma u sikwa Adamu ha konou tevhela Efa. ₁₄Nahone a si Adamu we a fhurwa, ho fhurwa musadzi a pfuka ndaela ya Mudzimu. ₁₅Musadzi ene u ḓo tshidzwa nga u beba vhana, arali a tshi konḓelela kha lutendo na lufuno na vhukhethwa a sa ṱongi.