Paulo e Efesa
1Musi Apolosi e Korinta, Paulo a buḓekanya shango nga matavhani, a swika Efesa. Henefho a wana vhaṅwe vhafunziwa. 2A vha vhudzisa a ri, “Nṋa no vhuya na ṱanganedza Muya Mukhethwa musi ni tshi vha vhatendi naa?” Vhone vha fhindula vha ri, “Zwa Muya Mukhethwa a ri athu vhuya ra zwi pfa.”
3Paulo a vhudzisa a ri, “Matsina no lovhedzwa nga ndovhedzo ya nnyi?” Vhone vha fhindula vha ri, “Nga ya Johanisi.” 4Paulo a ri, “Johanisi o lovhedza vho rembuluwaho a tshi vhudza Vhaisraele uri vha fulufhele a no ḓo mu tevhela, a tshi amba Yesu.” 5Vha tshi pfa Paulo a tshi ralo, vha lovhedzwa uri vha vhe vha Yesu Muṋe washu. 6Paulo a vha vhea zwanḓa, Muya Mukhethwa a mbo ḓi tsela khavho, vha thoma u amba nga ndimi vha ita na u porofita. 7Vhoṱhe vhó ṱangana vho vha vha tshi nga vha vhanna vha 12.
8Paulo a fhedza miṅwedzi miraru a tshi ya sinagogoni a tshi linga u ṱalutshedza vhathu uri vha pfesese zwa muvhuso wa Mudzimu nga u ḓi sumbedzana navho, a sa ofhi tshithu. 9Vhaṅwe vhavho vha konyolela matanda nḓevheni, vha sasaladza na Nḓila ya Muṋe washu henefho vhukati ha vhathu. Paulo a tshi vhona vha tshi ralo a ṱuwa na vhafunziwa, vhaḽa a vha sia henefho, ḓuvha ḽiṅwe na ḽiṅwe a ya a tshi amba na vhathu tshikoloni tsha Thiranosi. 10Zwa ita miṅwaha mivhili, ipfi ḽa Muṋe washu ḽa vhuya ḽa ṱanganya vhathu vhoṱhe vha vundu ḽa Asia, Majuda na vhannḓa.
Vhana vha Sikefa vha tshi linga u pandela thuṅwa ya Saṱhane
11Mudzimu o vha a tshi shuma nga Paulo a ita maḓembe ane a sa sokou anzela u vhonwa, 12lwe vhathu vha vha vha tshi kona u dzhia dugu kana fasikoṱi dze vha kwama muvhili wawe ngadzo, vha dzi isa kha vhalwadze, vha fhola, vha na thuṅwa dza Saṱhane dza bva khavho. 13Zwino vhaṅwe Majuda vhe na vhone vha vha vha tshi enda vha tshi pandela thuṅwa vha vho linga u shuma nga dzina ḽa Yesu Muṋe washu vha tshi ri, “Nga dzina ḽa Yesu ane a ḓivhadzwa nga Paulo ndi ri ibvani zwino.” 14Vhe vha vha vha tshi ita zwenezwo ndi vhana vhaṱanu na vhavhili vha Sikefa, muṅwe wa vhotshifhe vhahulu vha Majuda. 15Thuṅwa yone ya amba navho ya ri, “Yesu nṋe ndi a mu ḓivha, na Paulo ndi tou mu fhedza zwavhuḓi, zwino iwe ni vhonnyi-ha?” 16Munna we a vha e na thuṅwa a vha vutshela a vha kunda, a vha huvhadza lwe vha bva nḓuni yeneyo vha tshi tou fhufhura dzinḓevhe vhe fhedzi. 17Majuda na vhannḓa vhoṱhe vha Efesa vha tshi pfa zwenezwo vha dzhenwa nga nyofho, dzina ḽa Yesu Muṋe washu ḽa tou ṋaṋa u huliswa. 18Vhanzhi vhe vha vha vhatendi vha ḓa vha bula manditi avho vhukati ha vhathu. 19Vhathu vhanzhi vhe vha vha vha tshi ita zwa manditi vha posa bugu dzavho fhethu huthihi dza tou vha thulwi, vha dzi fhisa muṅwe na muṅwe a tshi zwi vhona. Vha tshi ṱanganya mutengo wa bugu idzo vha wana u tshi swika maseṱha a 50 000. 20Ipfi ḽa Muṋe washu ḽa ḓi anḓadzea nga u ralo ḽi tshi khwaṱha ḽi tshi ya.
Phusuphusu dza Efesa
21Musi ho no itea zwenezwo, Paulo a elekanya u buḓekanya ḽa Makedonia na ḽa Akhaya a fhirele Jerusalema. A ri, “Ndó no vha henengei ndi fanela u ya nda vhona na zwa Roma.” 22Ndi hone a tshi dzhia vhaṅwe vhavhili kha vhatikedzi vhawe, Timoti na Erastosi, a vha ruma Makedonia, ene muṋe a sala vunduni ḽa Asia tshifhinganyana.
23Nga tshifhinga tshenetsho ha vuwa phusuphusu khulu Efesa, tshilwelwa i Nḓila ya Muṋe washu. 24Muṅwe mufuli wa siliva a no pfi Dimitriosi o vha a tshi fula zwiḓu zwi no fana na thembele ya mudzimu wa tshisadzi u no pfi Arthemisi. Vhutsila hawe honoho vhafuli vho vha vha tshi vhuelwa zwihulu ngaho. 25Ndi hone a tshi kuvhanganya vhatsila khathihi na vhaṅwe vha shumaho navho, a amba navho a ri, “Vhanna vha hashu, ni tou zwi ḓivha zwavhuḓi uri hoyu mushumo ndi wone u ri ḓiselaho lupfumo. 26Zwino na inwi vhaṋe ni khou zwi vhona na u zwi pfa zwine hoyu munna Paulo a khou ita. U ri hei midzimu yo itwaho nga vhathu a si midzimu na kathihi, zwino vhanzhi vha fhano Efesa, hone kha ndi tou ri vha vundu ḽoṱhe ḽa Asia, o no ḓi vha fhura nahone vha vho mu fulufhela. 27Zwino tshi dinaho ndi uri hoyu mushumo washu vhathu a vha tsha ḓo u takalela. Zwi si izwo fhedzi, iṅwe khombo ndi ya uri thembele ya mudzimutshisadzi muhulu Arthemisi i ḓo ṱuwa i si tsha vha tshithu, ha ḓo vha u fa ha dzina ḽawo, wone u re mudzimu u no rerelelwa nga vundu ḽoṱhe ḽa Asia na shango ḽoṱhe!”
28Vha tshi pfa a tshi ralo vha tou halifha, vha thoma u zhamba vha ri, “Muhuluhulu ndi Arthemisi wa Vhaefesa!” 29Vilili ḽa ṱanganya muḓi woṱhe. Gogo ḽa dzhia Gayosi na Aristhakhosi, vhanna vhavhili vha Makedonia vhe vha vha vha tshi tshimbila na Paulo, vha gidimela navho sitediamu. 30Paulo a tshi ṱoḓa u dzhena kha gogo vhafunziwa vha mu dzivhisa. 31Maṅwe magota a vundu ḽeneḽo vhe vha vha vha tshi pfana nae na vhone vha swikisa fhungo ḽa u mu vhudza uri a songo vhuya a kanda sitediamu. 32Vilili ḽone ho vha hu hone ḽo ṱanganedzana, ho vuwa dzheme-dzheme, muṅwe a tshi amba zwawe, muṅwe a amba zwawe, ngauri vhunzhi havho na uri muṱangano wo vha u wa mini vho vha vha sa ḓivhi. 33Majuda vha rangisa Alekzannda phanḓa, vhaṅwe vhathu vha konou mu huwelela zwine a fanela u amba. A fhumudza vhathu nga tshanḓa a tshi ri a vha ṱalutshedze. 34Vhathu vhone vha tshi vhona uri ndi Mujuda vha zhamba mazha vha vhuya vha swikisa awara mbili vha tshi ri, “Muhuluhulu ndi Arthemisi wa Vhaefesa!”
35Vho ḓo fhumudzwa nga muṅwaleli wa muḓi. O amba navho a ri, “Inwi vhanna vha Efesa, a hu na a sa zwi ḓivhi uri muḓi uno wa Efesa ndi wone u lindaho thembele ya Arthemisi mudzimu muhulu na tshiḽa tshifanyiso tshe tsha wa tshi tshi bva ṱaḓulu. 36Zwino vhunga hu si na ane a nga hanedza haya mafhungo, rudzani mbilu uri ni sa ḓo dzhena mafhungo nga vhutsiluni. 37Zwino vhonani no sokou ḓisa havha vhanna ngeno, hu uri a vha na tshe vha tswa thembeleni, nahone a hu na na samba ḽe vha sema mudzimu washu ngaḽo. 38Ri na maḓuvha a khoro, na magota a hone; arali Dimitriosi na vhatsila ngae vhe na muthu o vha khakhelaho, nga vha ye vha hwelelane henengei. 39Zwino arali hu kha ḓi vha na tshiṅwe tshine na lila ngatsho tshi ḓo tou ambiwa tshivhidzoni tsha vhadzulapo tshine tsha ḓo tou rambwa lwa mulayo. 40Hafhu ni ḓivhe uri zwo iteaho ṋamusi zwi nga kha ḓi ri dzhenisa khakhathini, ra vho pfi ro sokou vusa vilili hu si na tsho khakheaho. Ri tshi sengiswa ra sa tsha ḓo kona u ṱalutshedza, ri si tsha ḓivha uri ri nga ri ḽo vuswa ngani.” 41A tshi fhedza u amba a ri vhathu vha balangane.
