MISHUMO 6

₁Zwino misi yeneyo tshivhalo tsha vhafunziwa tshi tshi khou ḓi anda tshi tshi ya, Majuda vha ambaho Tshigiriki vha thoma u gungulela vha ambaho Tshiheberu, vha ambaho Tshigiriki vha tshi vho ri tshilikadzi dzavho a dzi vhuyi dza humbulwa-vho musi hu tshi kovhelwa vhashai zwa ḓuvha ḽiṅwe na ḽiṅwe. ₂Ndi hone vha 12 vha tshi kuvhanganya vhafunziwa vhoṱhe vha ri, “A zwo ngo fanela uri riṋe ri litshe u funza ipfi ḽa Mudzimu ri dzhene kha mafhungo a zwiḽiwa. ₃Zwino-ha vha hashu, ḓinangeleni vhanna vhaṱanu na vhavhili kha inwi vha ḓivheaho uri vho ḓala Muya Mukhethwa, vha re na vhuṱali, riṋe ri ḓo vha kumedza hoyo mushumo; ₄tshashu ha ḓo vha u fungelela kha zwa dzithabelo na u funza ri si na tshine tsha ri thithisa.”

₅Mafhungo ayo avho a takadza vhafunziwa vhoṱhe, vha nanga Stefane, munna wa lutendo lwo khwaṱhaho o ḓalaho Muya Mukhethwa, na Filipi, na Prokorosi, na Nikanoro, na Timoni, na Pharamenasi, na Nikolausi wa Antiokia we a ṱanganedza Tshijuda e wa nnḓa. ₆Vhenevho vha ḓiswa kha vhaapostola, vhaapostola vha vha rabelela vha vha vhea zwanḓa.

₇Zwa ḓi ralo ipfi ḽa Mudzimu ḽa anḓadzea ḽi tshi ya, tshivhalo tsha vhafunziwa Jerusalema tsha ḓi hula tshi tshi ya, na vhotshifhe vhanzhi-vhanzhi vha ṱanganedza Muṋe washu.

₈Stefane o vha o shudufhadzwa vhukuma nga Mudzimu, e na maanḓa mahulu, a tshi ita maḓembe na mishumo i kanukisaho vhathuni. ₉Hone vhaṅwe vhanna vha iṅwe sinagogo i no pfi “Ya vhanna vho vhofhololwaho” vha thoma u mu ṱaṱisa khani. Yeneyo sinagogo yo vha i na Majuda vha Kirene na vha Alekzandria. Vhenevho na vhaṅwe Majuda vha bvaho Kilikia na Asia vha thoma u ṱaṱisa Stefane khani. ₁₀Hone Muya a ṋea Stefane vhuṱali lwe a ri a tshi amba, vhoṱhe vha kundwa na u mu hanedza. ₁₁Ndi hone vha tshi vho ṱuṱuwedza vhaṅwe vhanna tshiphirini uri vha mu ambelele vha ri, “Ro pfa a tshi khou sema Mushe na Mudzimu!” ₁₂Vha tshi ralo vha tou vhilinganya vhathu na vhahulwane vha lushaka na vhaḓivhi vha Mulayo. Vhenevho vha ḓa vha fara Stefane vha mu isa khoroni ya Majuda. ₁₃Vha ḓisa ṱhanzi dza u zwifha, dza ri, “Hoyu munna u ṱolou sema hei thembele khethwa na Mulayo wa Mushe. ₁₄Ro tou mu pfa a tshi ri hoyo Yesu wawe wa Nazaretha u ḓo thutha thembele a shandukisa na maitele oṱhe e ra a wana kha Mushe.” ₁₅Vhoṱhe vho dzulaho khoroni vha tshi lavhelesa Stefane vha vhona tshifhaṱuwo tshawe tshi tshi nga tsha muruṅwa.