Mabono mararu: Khaṱhulo a i tsha tinyea. Bono ḽa magerere
1Muṋe wa zwoṱhe Muṋe washu o ntsumbedza hezwi: O vha a tshi khou sika lutsinga lwa magerere musi hatsi ha khosi ho no haḓiwa, hezwi mutomba u tshi tou thoma u runga. 2Musi magerere o no ḽa zwoṱhe zwidala zwi re shangoni, nṋe nda ṱavha mukosi nda ri, “Muṋe wa zwoṱhe Muṋe washu, vha hangwele! Vhana vha Jakopo vha nga tshila hani, hufha vha si na nungo?”
3Muṋe washu a ri khathutshela mbilu a ri, “Zwe wa zwi vhona kha bono a zwi tsha ḓo vha hone.”
Bono ḽa gomelelo
4Zwiṅwe zwe nda sumbedzwa nga Muṋe washu khezwi: Muṋe wa zwoṱhe Muṋe washu o vha o ḓiimisela u lifhedza vhathu vhawe nga u vha fhisa nga ḓuvha; ḓuvha ḽa xisa maḓi a re fhasi ha mavu, ḽa vho thoma u fhisa na masimu. 5Ndi hone ndi tshi ṱavha mukosi nda ri, “Muṋe wa zwoṱhe Muṋe washu, u songo ita hezwo nandi! Vhana vha Jakopo vha nga tshila hani, hufha vha si na nungo?”
6Muṋe washu a ri khathutshela mbilu a ri, “Na zwenezwo zwe wa zwi vhona kha bono zwi nga si tsha vha hone,” ho amba Muṋe washu Muṋe wa zwoṱhe.
Bono ḽa muelo
7Zwiṅwe zwe nda sumbedzwa nga Muṋe washu khezwi: Muṋe washu o vha o ima tsini na luvhondo lwo fhaṱwaho nga muelo, ó fara muelo. 8Muṋe washu a mmbudzisa a ri, “Amusi, u khou vhona mini?”
Nṋe nda fhindula nda ri, “Ndi khou vhona muelo.”
Muṋe washu a ri, “Ndi khou ela vhathu vhanga Vhaisraele nga muelo; vha nga luvhondo lwo sendamaho, a thi tsha ḓo litsha u vha rwela vhutshinyi havho. 9Ndi ḓo phusukanya zwikwara hune vhathu vha Isaka vha rerelela hone, hukhethwa hoṱhe ha vhathu vha Israele hu ḓo sala hu matumba. Ndi ḓo fhelisa muṱa wa Jerobiamu nga pfumo.”
Amusi na Amatsia
10Amatsia tshifhe muhulu wa Bethele a ruma muḓinḓa ha Jerobiamu khosi ya Israele a swika a ri, “Amusi u khou vha lukela vhunwa tshivhindini tsha ḽa Israele. Shango ḽi nga si konḓelele maipfi awe oṱhe. 11Amusi u khou ri, ‘Jerobiamu u ḓo fa nga pfumo, vhukuma vhathu vha Israele vha ḓo iswa vhuthubwani kule na shango ḽa havho.’ ”
12Ndi hone Amatsia a tshi vhudza Amusi a ri, “Hee muvhoni, ṱuwa! Khezwi u sa humeli shangoni ḽa Juda, wa wana zwiḽiwa zwau henengei, wa porofita henengei? 13U songo tsha porofita fhano Bethele, hafhano ndi hukhethwa ha khosi, ndi thembele ya musanda.”
14Amusi a fhindula Amatsia a ri, “Nṋe a thi muporofita, a thi porofiteli malamba, ndi na masambi anga, ndi na tsimu yanga ya mihuyu, 15hone Muṋe washu o nnzhia ndi tshi khou lisa sambi ḽa nngu a mmbudza a ri, ‘Tshimbila u yo ḓivhadza vhathu vhanga vha Israele mafhungo anga.’ 16Zwino-ha, nga vha pfe ipfi ḽa Muṋe washu. Vhone vha ri ndi songo porofita ndi tshi kaidza Vhaisraele, ndi songo tsha ṱolou funza ndi tshi kaidza vha muṱa wa Isaka. 17Zwenezwo, Muṋe washu u ri, ‘Musadzi wau u ḓo tshila nga vhupombwe henefhano muḓini, vhana vhau vha vhatuka na vha vhasidzana vha ḓo fa nga pfumo; masimu au a ḓo eliwa a kovhiwa; iwe muṋe u ḓo fela shangoni ḽa vhannḓa; vhukuma Vhaisraele vha ḓo hwalwa vha iswa vhuthubwani, kule na shango ḽa havho.’ ”
