DANIELE 8

₁Nga ṅwaha wa vhuraru wa muvhuso wa khosi Beleshatsara, nṋe Daniele nda vhona bono, izwo ndo vha ndo no ranga u vhona ḽiḽa ḽa u thoma. ₂Nda sedza iḽo bono; ndi tshi kha ḓi vha ndo sedza nda wana ndi musanda Shushani, shangoni ḽa Elamu. Bononi ḽeneḽo ndo vha ndi mulamboni wa Ulai. ₃Nda takusa maṱo anga nda livha-livha, nda vhona thutha yo ima tshini ha mulambo. Yo vha i na maṋanga mavhili, oṱhe o vha o lapfa, hone lwe lwa melela murahu lwo vha lu lwone lu lapfesaho. ₄Nda vhona iyo thutha i tshi tshoṱhela vhukovhela na devhula na tshipembe. Ho vha hu si na phukha ine ya nga imedzana nayo, hu si na tshine tsha nga i ponyoka. Yo vha i tshi ita zwine ya funa, maanḓa ayo a ḓi hulela a tshi ya.

₅Nde ndi tshi sedza nda vhona mbokoṱo i tshi bva vhukovhela, yo ṱanganya ḽifhasi ḽoṱhe, hone i sa vhuyi ya kwama fhasi. Iyo mbudzi yo vha i na luṋanga lu no vhonalesa vhukati ha maṱo ayo. ₆Iyo mbudzi ya sendela tsini ha iḽa thutha i re na ṋanga mbili, ye nda i vhona yo ima tsini ha mulambo, ya i fhufhela nga maanḓa ayo oṱhe yo sinyuwa. ₇Nda vhona i tshi swika kha thutha yo sinyuwa, ya gekha thutha ya wela fhasi, ya vunḓa dziḽa ṋanga mbili, thutha yo vha i si na nungo dza u imedzana nayo, ya i wisela fhasi, ya i kandekanya hu si na ane a nga lamulela iyo thutha.

₈Iyo mbokoṱo ya vha na maanḓa o kalulaho, hone ya ri i na maanḓa mangafho luṋanga lwayo lwa kulea, henefho he lwa vha lu hone ha mela maṋanga maṋa a maanḓa, luṅwe na luṅwe lwó sumba sia ḽalwo.

₉Luṅwe lwa eneo maṋanga lwa mela luṋanga luṱuku, lwa ṱoṱomowa lwa vha luhulwane lwa lapfela tshipembe na vhubvaḓuvha na thungo ya Shango ḽa vhugala. ₁₀Lwa aluwa lwo tou tswititi lwo livha nṱha lwa swika nga mara a ṱaḓulu, lwa posa mara na ṋaledzi fhasi, lwa zwi kandekanya. ₁₁Lwa ita na u nyadza Muvhusi wa ayo mara, lwa iledza nduvho dzine a ṋewa nga misi, lwa wisa thembele yawe khethwa. ₁₂Lwa kumedzwa vhathu vhanzhi-vhanzhi nge vha shandukela Mudzimu, ha fheliswa na nduvho ya nga misi; maluvhele a ngoho a poswa fhasi, lwa nakelwa nga zwoṱhe zwe lwa ita.

₁₃Nda pfa muruṅwa mukhethwa a tshi khou amba, muṅwe muruṅwa ngae a mu vhudzisa a ri, “Zwa bono iḽi zwi ḓo khunyelela lini, zwa nduvho ya nga misi i tshi fheliswa, na vhutshinyi vhu ofhisaho, na hukhethwa hu tshi kumedzwa vhavhi, na u kandekanywa ha mara a ṱaḓulu?” ₁₄Wa u ranga a fhindula a ri, “Hu ḓo ranga u fhela maḓuvha a 2 300 na vhusiku hao, ndi hone thembele i tshi ḓo dovha ya vuswa nga huswa.”

₁₅Musi nṋe Daniele ndi tshee ndo sedza bono ndi tshi linga u ḽi ṱalukanya, nda vhona muṅwe a no nga muthu o ima phanḓa hanga. ₁₆Nda pfa ipfi ḽa muthu ḽi tshi vhidzelela ḽi tshi bva mulamboni wa Ulai ḽi tshi ri, “Gabriele, vhudza muthu uyu zwine bono ḽa amba!” ₁₇A swika he nda vha ndo ima hone, a tshi sendela nda pfa ndo farwa nga nyofho, nda wa nga tshifhaṱuwo. A amba na nṋe a ri, “Iwe ṅwana wa muthu, ḓivha uri bono heḽi ḽi sumbedza zwa misi ya vhufhelo.” ₁₈Musi a tshi kha ḓi amba na nṋe, nda wa nga tshifhaṱuwo nda dzidzivhala. A nkwama, a mmvusa nda ima nga milenzhe, ₁₉a ri, “Ndi ḓo u vhudza zwine zwa ḓo itea musi mbiti dza Mudzimu dzi tshi fhela; hezwi zwi amba tshifhinga tsho vhewaho tsha uri zwi fhele. ₂₀Iḽa thutha ye wa i vhona, maṋanga ayo mavhili ndi mahosi a Media na Pheresia. ₂₁Iḽa mbokoṱo ya mamvele ndi khosi ya Giriki; luṋanga lulapfu lwe lwa vha lu vhukati ha maṱo ayo ndi khosi ya u ranga. ₂₂Maṋanga maṋa e a mela fhaḽa he ha kulea luḽa luṋanga luthihi, ndi mivhuso miṋa i no ḓo simuwa kha lushaka lwa hawe, hone a i nga vhi na maanḓa a no nga awe.

₂₃“Hu ḓo ri muvhuso wavho u tshi vho ṱoḓou fhela, musi muelo wa vhuvhi havho wo no ḓala, ha vha na khosi ya tshiṱuhu, mukoni wa vhunwa.

₂₆“Heino ṱhalutshedzo ya bono ḽa zwa matsheloni na zwa madekwana ndi ngoho; iḽo bono u range u ḽi ita tshidzumbe, ngauri hu kha ḓi ḓo ranga u fhela maḓuvha manzhi zwi sa athu bvelela.”

₂₇Nṋe Daniele nda ri u pfa zwenezwo nda kulea nungo nda lwala nda fhedza maḓuvha o vhalaho. Nda vuwa nda ita mushumo wanga wa u shumela khosi, ndo tou hanganea nga iḽo bono, hone hu si na ane a zwi vhona.